ម៉ិកស៊ិក ៖ រដ្ឋមន្ត្រីក្រសួងការបរទេសម៉ិកស៊ិក លោក Marcelo Ebrard បាននិយាយនៅក្នុងសន្និសីទកាសែតកាលពីព្រឹកថ្ងៃអង្គារ៍ថា ប្រទេសម៉ិកស៊ិក មានកិច្ចព្រមព្រៀងជាមួយក្រុមហ៊ុនចិនចំនួន២ និងក្រុមហ៊ុនអាមេរិកមួយ…
ម៉ិកស៊ិក ៖ រដ្ឋមន្ត្រីក្រសួងការបរទេសម៉ិកស៊ិក លោក Marcelo Ebrard បាននិយាយនៅក្នុងសន្និសីទកាសែតកាលពីព្រឹកថ្ងៃអង្គារ៍ថា ប្រទេសម៉ិកស៊ិក មានកិច្ចព្រមព្រៀងជាមួយក្រុមហ៊ុនចិនចំនួន២ និងក្រុមហ៊ុនអាមេរិកមួយ សម្រាប់ការសាកល្បងវ៉ាក់សាំងកូវីដ១៩។
ប្រទេសម៉ិកស៊ិក នឹងចូលរួមក្នុងការសាកល្បងវ៉ាក់សាំង ដែលត្រូវបានបង្កើតឡើងដោយក្រុមហ៊ុន Janssen Pharmaceuticals (គ្រប់គ្រងដោយ Johnson & Johnson) និងក្រុមហ៊ុនចិន Cansino Biologics Inc និង Walvax Biotechnology Co Ltd ដែលនាំឱ្យចំនួននៃការសាកល្បងវ៉ាក់សាំងនៅក្នុងប្រទេសឈានដល់ចំនួនបួន។
លោករដ្ឋមន្ត្រីមានប្រសាសន៍ថា៖ «យើងមានកិច្ចព្រមព្រៀងជាមួយក្រុមហ៊ុនចំនួនបីផ្សេងគ្នា គឺមួយមកពីសហរដ្ឋអាមេរិក និងពីរមកពីប្រទេសចិន។ វាត្រូវបានគេហៅថា អនុស្សរណៈនៃការយោគយល់។ គោលបំណង គឺពិធីសារសម្រាប់ដំណាក់កាលទី៣ នឹងប្រព្រឹត្តទៅនៅប្រទេសនេះ។ បន្ទាប់ពីការប្រកាសនេះម៉ិកស៊ិកនឹងចូលរួមពិធីសារចំនួន៤ ពីខែកញ្ញាដល់ខែមករា»។
នៅខែកក្កដា ប្រទេសម៉ិកស៊ិក ចូលរួមក្នុងការសាកល្បងវ៉ាក់សាំងកូវីដ ដំណាក់កាលទី៣ ពីក្រុមហ៊ុនឱសថបារាំង Sanofi-Pasteur ប្រចាំប្រទេសម៉ិកស៊ិក៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ