ខេត្តស្វាយរៀង ៖ បើតាមសេចក្តីរាយការណ៍បានឱ្យដឹងថា មានចោរមួយក្រុមមានគ្នាប្រមាណ២នាក់បានដឹកគ្នា ដោយជិះមកទម្លាក់ម្នាក់ចូលប្លន់ផ្ទះលក់ចាប់ហួយមួយកន្លែងយកបានម៉ូតូ១គ្រឿងរត់ទៅបាត់ដោយសុវត្ថិភាព ចំណែកម្នាក់ទៀតជិះបាត់ បង្កឱ្យមានការភ្ញាក់ផ្អើលកាលពីម៉ោងប្រហែលជា៨ព្រឹក ថ្ងៃទី៩ ខែសីហា ឆ្នាំ២០២០…
ខេត្តស្វាយរៀង ៖ បើតាមសេចក្តីរាយការណ៍បានឱ្យដឹងថា មានចោរមួយក្រុមមានគ្នាប្រមាណ២នាក់បានដឹកគ្នា ដោយជិះមកទម្លាក់ម្នាក់ចូលប្លន់ផ្ទះលក់ចាប់ហួយមួយកន្លែងយកបានម៉ូតូ១គ្រឿងរត់ទៅបាត់ដោយសុវត្ថិភាព ចំណែកម្នាក់ទៀតជិះបាត់ បង្កឱ្យមានការភ្ញាក់ផ្អើលកាលពីម៉ោងប្រហែលជា៨ព្រឹក ថ្ងៃទី៩ ខែសីហា ឆ្នាំ២០២០ នៅតាមដងផ្លូវជាតិលេខ១៣ ស្ថិតក្នុងភូមិព្រះទន្លេ សង្កាត់សង្ឃ័រ ក្រុងស្វាយរៀង ។
បើតាមសមត្ថកិច្ចនគបាលប៉ុស្ត៍រដ្ឋបាលសង្កាត់សង្ឃ័របានឲ្យដឹងថា មានចោរមួយក្រុមបានចូលលួចម៉ូតូ១គ្រឿង ម៉ាកហុងដា សេ១២៥ សេរីឆ្នាំ២០២០ ពណ៌ខ្មៅ ពាក់ស្លាកលេខស្វាយរៀង 1O-2042 ដែលជាកម្មសិទ្ធិរបស់ជនរងគ្រោះឈ្មោះទិន ភក្តី ភេទប្រុស អាយុ៣៦ឆ្នាំ មានទីលំនៅនៅភូមិពភ្លា សង្កាត់សង្ឃ័រ ក្រុងស្វាយរៀង។
ប្រភពដដែលបន្តទៀតថា មុនពេលកើតហេតុ ប្រពន្ធជនរងគ្រោះបានជិះម៉ូតូមួយគ្រឿងមកផ្ទះម្ដាយនៅភូមិកើតហេតុខាលើ ដែលម្តាយមានលក់ឥវ៉ាន់ចាប់ហ៊ួយ ដើម្បីទិញសំណាញ់ត្រងកូនត្រី ។ ខណៈពេលដែលស្ត្រីរងគ្រោះកំពុងតែវាស់សំណាញ់ ភ្លាមនោះក៏មានបុរសម្នាក់មិនស្គាល់អត្តសញ្ញាណបានចូលមកយកម៉ូតូជនរងគ្រោះដែលបញ្ឈរនៅលើចិញ្ចើមថ្នល់ខាងមុខតូប។
ប្រភពដដែលបន្តថា ពេលនោះប្អូនស្រីដែលជាម្ចាស់ផ្ទះឃើញក៏ដើរចូលទៅបម្រុងប្រវាយប្រតប់យកម៉ូតូវិញ ក៏ស្រាប់តែត្រូវជនសង្ស័យដកកាំភ្លើងខ្លីភ្ជង់ប្អូនស្រីរបស់គាត់អាយុ១៨ឆ្នាំ (ជាម្ចាស់ផ្ទះលក់ឥវ៉ាន់ចាប់ហ៊ួយ) ដោយគំរាមថា «កុំស្រែក» ខណៈនោះនារីរងគ្រោះភ័យមិនហ៊ានស្រែកនោះទេ ខ្លាចចោរបាញ់ក៏នៅស្ងៀម។
ប្រភពដដែលបន្តទៀតថា ចំណែកជនសង្ស័យក៏បានឡើងជិះម៉ូតូចេញទៅទិសខាងត្បូងបាត់ ភ្លាមៗនោះប្រជាពលរដ្ឋក៏ស្រែកឆោឡោ និងចេញស្កាត់ផ្លូវ ជនសង្ស័យក៏ចាប់ហ្វ្រាំងបត់ម៉ូតូមកទិសខាងជើងវិញកាត់កន្លែងកើតហេតុទៅបាត់ស្រមោលតែម្ដង។ ភ្លាមៗនោះប្អូនស្រីក៏ស្រែកឆោឡោថា «ចោរៗ» ធ្វើឲ្យមានការភ្ញាក់ផ្អើលដល់ប្រជាពលរដ្ឋឃើញក៏បានធ្វើការដេញតាមពីក្រោយ តែដេញមិនទាន់ដោយសារមានរថយន្តបាំងពីមុខ។
ប្រភពពីប្រជាពលរដ្ឋជិតខាងបានឲ្យដឹងថា មុនកើតហេតុ គេឃើញជនសង្ស័យមានគ្នា២នាក់ជិះម៉ូតូពីទិសខាងត្បូងទៅជើង (ចេញពីក្រុងស្វាយរៀង) លុះមកដល់ជិតកន្លែងកើតហេតុ ក៏បានទម្លាក់គ្នាវាម្នាក់នៅជិតកន្លែងកើតហេតុ ចំណែកបក្សពួកម្នាក់ទៀតដែលជិះម៉ូតូនោះបានបើកម៉ូតូទៅទិសខាងជើង។
ពលរដ្ឋបន្តថា រីឯជនសង្ស័យម្នាក់ដែលបក្សពួកទម្លាក់ចុះនោះ បានដើរចូលទៅលួចម៉ូតូដែលជនរងគ្រោះមិនបានដកសោម៉ូតូទុកនៅខាងមុខតូប ហើយជនសង្ស័យក៏ឡើងជិះម៉ូតូបម្រុងជិះចេញទៅ ខណៈនោះប្អូនស្រីជាម្ចាស់ផ្ទះឃើញក៏ស្ទុះចូលមកបម្រុងប្រវាយប្រតប់យកម៉ូតូវិញ តែត្រូវជនសង្ស័យដកកាំភ្លើងខ្លីផ្ជង់ ហើយស្រែកសំឡុតថា «កុំស្រែក»។ ជនរងគ្រោះឃើញកាំភ្លើងក៏លែងហ៊ានចូល ហើយចោរក៏ជិះម៉ូតូចេញទៅដោយសុវត្ថិភាព។
ក៏ប៉ុន្តែពេលសមត្ថិច្ចសួរបញ្ជាក់ថា ពិតជាមានកាំភ្លើងខ្លីពិតមែន ឬកាំភ្លើងជ័រ? ជនរងគ្រោះប្រាប់ថា មិនដឹងដែរ ដោយឃើញកាំភ្លើងដែលភ្ជង់ គឺពណ៌ខ្មៅព្រាលៗ មិនដឹងថា កាំភ្លើងពិតឬកាំភ្លើងជ័រនោះទេ? ភ័យពេក ដោយឃើញជនសង្ស័យមានស្ពាយកាបូបផង។
ក្រោយពេលកើតហេតុ ជនរងគ្រោះក៏បានទៅប្តឹងសមត្ថកិច្ច ដើម្បីឲ្យជួយស្វែងរកជនសង្ស័យចាប់មកផ្តន្ទាទោសផងដែរ។
លោកវរសេនីយ៍ត្រី កែន វុទ្ធី អធិការនៃអធិការដ្ឋាននគបាលក្រុងស្វាយរៀង បានសន្និដ្ឋានថា ករណីខាងលើនេះ គឺជាករណីចោរលួច ពុំមែនជាករណីចោរប្លន់ប្រដាប់អាវុធនោះទេ។ បើតាមការបំភ្លឺពីជនរងគ្រោះ គឺសង្ស័យចោរប្រើកាំភ្លើងជ័រគំរាម ទោះបីយ៉ាងណាសមត្ថកិច្ចកំពុងតាមប្រម៉ាញ់ និងធ្វើការស្រាវជ្រាវ ដើម្បីស្វែងរកជនសង្ស័យមកចាត់ការតាមនីតិវិធីច្បាប់ឲ្យខាងតែបាន៕
ចែករំលែកព័តមាននេះ