ទីតាំង​សត្តឃាត​ឆ្កែ​មួយ​ក្នុង​ស្រុក​សន្ទុក សម្រេចចិត្ត​ប្តូរ​អាជីវ​កម្ម ​


ខេត្តកំពង់ធំ ៖ ​បន្ទាប់​ពី​មានការ​ពន្យល់​ណែនាំ​ស្តី​ពី​ផល​ប៉ះពាល់​នៃ​ការ​សម្លាប់សត្វ​ឆ្កែ ដែល​អាច​បង្ក​គ្រោះថ្នាក់​ផ្សេង​ៗ​ដល់​អ្នក​បរិភោគ និង​ការ​ណែនាំ​ឱ្យ​ចេះ​ស្រលាញ់​សត្វ​ចិញ្ចឹម​របស់​ខ្លួន ពី​សំណាក់​បុគ្គលិក​របស់​អង្គការ​គាំពារ​សុ​ខុ​មា​ល​ភាព​សត្វ​ពិភពលោក
​( FOUR PAWS )​រួច​មក ម្ចាស់​ទីតាំង​សត្តឃាត់​សត្វ​ឆ្កែ​ធំ​មួយ​កន្លែង​នៅ​ស្រុក​ស​ន្ទុ​ក ខេត្ត​កំពង់ធំ កាលពី​ថ្ងៃ​ទី​០៧ ​សីហា ឆ្នាំ​២០២០​នេះ បាន​ភ្ញាក់រលឹក​និង​បាន​សន្យា​ប្តេជ្ញា​ចិត្ត​ថា​ ចាប់ពី​ពេល​នេះ​តទៅ​ លោក​ឈប់​រកស៊ី​ជួញដូរ​សាច់សត្វ​ឆ្កែ​ទៀត​ហើយ និង​សម្រេច​ចិត្ត​រកមុខ​របរ​ថ្មី ដើ​ម្បី​រក​ចំណូល​ផ្គត់ផ្គង់​គ្រួសារ​វិញ​ ជំនួស​មុខរបរ​សត្តឃាត​ឆ្កែ ។

អង្គការ​គាំពារ​សុ​ខុ​​មា​ល​ភាព​សត្វ​ពិភពលោក​បន្ថែម​ថា នេះ​ជា​ការ​បិទ​ដោយ​ជោគជ័យ​លើក​ទី​២ បន្ទាប់​ពី​អង្គការ FOUR PAWS បាន​បិទ​កន្លែង​ផ្គត់ផ្គង់​សាច់​ឆ្កែ​ធំ​មួយ​នៅ​ចុងឆ្នាំ​២០១៩ នៅ​ក្នុង​ខេត្តសៀមរាប នៅ​ក្នុង​កំឡុង​ពេល​បិទ​ទី​សត្តឃាត​ខាងលើ​នេះ អង្គការ FOUR PAWS បាន​ជួយ​សង្គ្រោះ​សត្វ​ឆ្កែ​ចំនួន​១៥​ក្បាល និង​បាន​ដឹក​ពួក​វា ទៅ​កាន់​អង្គ​ការ​សប្បុរសធម៌​ជា​ដៃគូរ​នៅ​ក្នុងស្រុក​របស់​ខ្លួន គឺ​អង្គការ​សង្គ្រោះ​សត្វ​កម្ពុជា ក្រោយ​ពី​បាន​ធ្វើ​ការ​ព្យាបាល​សត្វ​ឆ្កែ​ទាំងនោះ​ភ្លាម​ៗ​រួច​មក​ ។

ក្នុង​នោះ​ផង​ដែរ អង្គការ FOUR PAWS ក៏​បាន​អំពាវនាវ​សូម​ឱ្យ​មានការ​ហាមឃាត់​ដាច់​ខាត កុំ​ឲ្យ​មានការ​ជួញដូរ​សាច់​ឆ្កែ និង​ឆ្មា​នៅ​ទូ​ទាំង​ប្រទេស ដោយសារ​តែ​បច្ចុប្បន្ន​នេះ មានការ​គំរាមកំហែង​ដល់​សុខុមាលភាព​សត្វ​។ អ្នកស្រី​បណ្ឌិត ខា​ធើ​រី​ន​ ប៉ូ​ឡាក់ ជា​ពេទ្យសត្វ និង​ជា​ប្រធាន​ផ្នែក​ថែរក្សា​សត្វ​អនាថា​នៅ​អាស៊ី​អាគ្នេយ៍ បានឱ្យ​ដឹង​ថា វា​មាន​សន្ទុះ​មិន​គួរ​ឱ្យ​ជឿ​នៅ​ពាសពេញ​ប្រទេស​កម្ពុជា នៅ​ក្នុង​ការ​បញ្ចប់​ការ​ជួញដូរ​សាច់​ឆ្កែ លោកស្រី​ក៏​មាន​អារម្មណ៍​ធូរស្បើយ​នៅ​ពេល​ឃើញ​កន្លែង​សត្វឃាត​នេះ​ត្រូវ​បាន​បិទ ដែល​វា​មិន​ត្រឹមតែ​បាន​ផ្លាស់​ប្តូរជីវិត​របស់​សត្វ​ឆ្កែ ត្រូវ​បាន​ជួយ​សង្គ្រោះ​ប៉ុណ្ណោះ​ទេ ហើយ​ឆ្កែ​រាប់​ម៉ឺន​ក្បាល​ទៀត នឹង​ត្រូវ​រួច​ផុត​ពី​សេចក្តីស្លាប់​ដ៏​គួរ​ឱ្យ​រន្ធត់​ផង​ដែរ ។

អ្នកស្រី​បាន​បន្ថែម​ថា យើង​អាច​ធ្វើការ​ដោយ​ជោគជ័យ​ជាមួយ​ម្ចាស់​ទីតាំង​ដែល​គាត់​បាន​ចូលរួម ប៉ុន្តែ​ការងារ​នេះ​មិន​បញ្ចប់​ដោយ​ការ​បិទ​នោះ​ទេ ដោយ​ប៉ុន្មាន​ស​ប្តា​ហ៍ ទៅ​ប៉ុន្មាន​ខែ​ខាង​មុខ​នេះ គឺ​មាន​សារៈសំខាន់​ក្នុង​ការ​ផ្តល់​ការ​ព្យាបាល​ជា​បន្ត​ដល់​សត្វ​ឆ្កែ​ដែល​បាន​ជួយ​សង្គ្រោះ​បន្ថែម​ពីលើ​សេចក្តី​ស្រឡាញ់ និង​ការ​យកចិត្តទុកដាក់​ដែល​ត្រូវ​ជួយ​ឱ្យ​ពួក​គេ​រួច​ផុត​ពី​បទ​ពិសោធន៍​ដ៏​ឈឺចាប់​នេះ។

អ្នកស្រី​បណ្ឌិត បានឱ្យ​ដឹង​ទៀត​ថា ក្នុងអំឡុងពេល​នៃ​ការ​ស៊ើបអង្កេត​ដំបូង​នៃ​អង្គការ FOUR PAWS បាន​ជួប​ជាមួយ​ម្ចាស់​សត្តឃាត​សត្វ​ឆ្កែ​នៅ​ខេត្តកំពង់ធំ ដែល​ពួក​គាត់​បាន​សម្តែង​ការ​សោកស្ដាយ​ចំពោះ​ការ​សម្លាប់សត្វ​ឆ្កែ និង​មាន​អារម្មណ៍​ចង់​ចាក​ចេញពី​ការ​ជួញដូរ​នេះ ដោយ​មានការ​ប្រកាស​ថ្មី​ៗ​អំពី​ការ​ហាមឃាត់​ការ​ហូប​សាច់​ឆ្កែ​នៅ​ខេត្ត​សៀមរាប​រួច​មក ដើម្បី​ជួយ​ម្ចាស់​សត្ត​ឃាត​ឱ្យ​ផ្លាស់​ប្តូរ​ចេញពី​ការ​ធ្វើ​ជួញដូរ​នេះ ។

អង្គការ FOUR PAWS ក៏​បាន​សម្រួល​ដល់​ជីវភាព​រស់នៅ​របស់​ម្ចាស់​សត្វឃាត តាម​រយៈ​ការ​សាងសង់ និង​ប្រតិបត្តិការ​ហាង​លក់​គ្រឿងទេស​តូច​មួយ​ដើម្បី​ធានា​ថា​ម្ចាស់​សត្ត​ឃាត​អាច​មាន​លទ្ធភាព​ផ្លាស់​ប្តូរ​ចេញពី​ការ​ជួញដូរ​សាច់​ឆ្កែ​បាន មិនតែប៉ុណ្ណោះ​!​នៅ​ប្រទេស​កម្ពុជា​អង្គការ FOUR PAWS ក៏​បាន​សហការ​ជាមួយ​អង្គការ​មនុស្សធម៌​ក្នុងស្រុក​មួយ​គឺ​អង្គការ​សង្គ្រោះ​សត្វ​កម្ពុជា ដើម្បី​លើកកម្ពស់​សុខុមាលភាព​សត្វ​នៅ​ក្នុង​ប្រទេស បន្ថែម​លើ​ការ​ចុះ​អនុ​ស្សណៈ​យោគយល់​ជាមួយ​ម​ជ្ឍ​មណ្ឌល​កំចាត់​មីន​កម្ពុជា (​ស៊ី​ម៉ាក់​) ដែល​ជា​ភ្នាក់ងារ​រដ្ឋាភិបាល​កម្ពុជា​ដើម្បី​បញ្ចប់​ការ​ធ្វើ​ជួញដូរ​សាច់​ឆ្កែ​ផង​ដែរ​។​

Facebook Google Twitter Email

Live

Sponsored News

០៨:៤៦ | ក្នុងស្រុក

ក្រុមហ៊ុនបុត្រសម្ព័ន្ធ រ៉ូយ៉ាល់គ្រុប ទទួលស្វាគមន៍ទស្សនកិច្ចពិសេសរបស់ឯកឧត្តម ឧត្តមសេនីយ៍ឯក ហ៊ុន ម៉ាណែត សម្រាប់ដំណើរស្វែងយល់អំពីឌីជីថលនីយកម្ម និងបច្ចេកវិទ្យាបណ្តាញ 5G !

ការស្ទង់មតិគេហទំព័រថ្មី




សូម​អរគុណ