ចៅក្រមស៊ើបសួរសម្រេចឃុំខ្លួនជនឆបោកលក់វត្ថុស័ក្តិសិទ្ធិគោបា.ក្លែងក្លាយ
- ភ្នំពេញ
រាជធានីភ្នំពេញ ៖ សេចក្តីរាយការឲ្យដឹងថា កាលពីព្រឹកថ្ងៃទី៨ ខែសីហា ឆ្នាំ ២០២០ លោក ពេជ្រ វិជ្ជាធរ…
រាជធានីភ្នំពេញ ៖ សេចក្តីរាយការឲ្យដឹងថា កាលពីព្រឹកថ្ងៃទី៨ ខែសីហា ឆ្នាំ ២០២០ លោក ពេជ្រ វិជ្ជាធរ អនុប្រធាននិងជាចៅក្រមស៊ើបសួរសាលាដំបូងរាជធានីភ្នំពេញបានសម្រេចធ្វើការឃុំខ្លួនជនសង្ស័យម្នាក់ ពាក់ព័ន្ធករណីលក់វត្ថុគោបាក្លែងក្លាយថា ជាវត្ថុស័ក្តិសិទ្ធិ.ឆបោកប្រាក់អ្នកដទៃប្រមាណជាង ២០ម៉ឺនដុល្លារអាមេរិក ។
សេចក្តីរាយការបន្តថា កាលពីថ្ងៃទី១ ខែសីហា ឆ្នាំ២០២០ ដោយមានការចង្អុលបង្ហាញពីលោកឧត្តមសេនីយ៍ឯក អុិន បូរ៉ា អគ្គស្នងការរងនគរបាលជាតិ ទទួលផែននាយកដ្ឋានកណ្តាលនគរបាលយុត្តិធម៍ សហការជាមួយកម្លាំងស្នងការដ្ឋាននគរបាលខេត្តកំពង់ស្ពឺបានធ្វើការចុះបង្ក្រាបបទល្មើសជាក់ស្តែងមួយករណី គឺករណី.ឆបោក (លក់វត្ថុស័ក្តិសិទ្ធិគោបា) ត្រង់ចំណុចភូមិត្រពាំងជ្រៃ ឃុំក្រាំងដីវ៉ាយ ស្រុកភ្នំស្រួច ខេត្តកំពង់ស្ពឺ និងបានឃាត់ខ្លួនជនសង្ស័យម្នាក់ឈ្មោះ រិន សុភ័ក្ត្រ ហៅ រិន សារ៉េត ហៅរ៉ា ភេទប្រុស អាយុ៤១ឆ្នាំ ដេីម្បីយកទៅសាកសួរ នៅការិយាល័យព្រហ្មទណ្ឌ ។
តាមចម្លើយជនសង្ស័យឈ្មោះ រិន សុភ័ក្ត្រ ហៅ រិន សារ៉េត បានសារភាពថា ខ្លួនពិតជាបានធ្វេីសកម្មភាព.ឆបោកប្រាក់អ្នកដទៃ ដែលជាជនរងគ្រោះ ភេទប្រុស អាយុ៦២ឆ្នាំ លើទឹកប្រាក់ចំនួន ១០០ ០០០ (ដប់ម៉ឺនដុល្លារអាមេរិក) ប្រាកដមែន ។
នៅពេលចាប់ខ្លួនជនសង្ស័យសមត្ថកិច្ចបានធ្វើការដកហូតសម្ភារៈមាន ៖ ១.រថយន្ត១គ្រឿង ម៉ាកLexus RX 300 ផលិតឆ្នាំ១៩៩៨ ពណ៌ទឹកមាស ពាក់ស្លាកលេខ កំពង់ចាម 2C-2324 ។ ២.ទូរស័ព្ទ៣គ្រឿង.ម៉ាកណូគៀ ចុចពិលពណ៌ខ្មៅមួយគ្រឿង.ម៉ាកSAMSUNG NOTE9 ពណ៌ព្រីងទុំមួយគ្រឿង និង ម៉ាកSAMSUNG ពណ៌ស ។ ៣.លោហៈធាតុ ពណ៌ខ្មៅ (រូបកូនគោ) ដាក់ក្នុងប្រអប់ពណ៌ខ្មៅ១ ។ ៤.គាថា រុំស្កុត ១ ។ ៥.ប្រេងសម្រាប់លាបវត្ថុ(កូនគោពណ៌ខ្មៅ) ។ ៦.ក្រណាត់ស ។ ៧.ឈេីគូសមួយចំនួនធំ។ ៨.គាថា ស្លឹករឹត ចំនួន ១ ។ ៩.ឯកសារពាក់ព័ន្ធ ក្នុងការទិញលក់វត្ថុបុរាណមួយចំនួនទៀត ។
ក្រោយពីការសាកសួរបានចម្លើយគ្រប់គ្រាន់ និងករណីបង្ក្រាបជាបទល្មើសជាក់ស្តែង សមត្ថកិច្ចបានកសាងសំណុំរឿងបញ្ជូនជនសង្ស័យទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធី ។ លុះដល់ព្រឹកថ្ងៃទី៨ ខែសីហា ទើបចៅក្រមស៊ើបសួរសម្រេចឃុំខ្លួនជនសង្ស័យរូបនេះដាក់ពន្ធនាគារព្រៃសជាបណ្តោះអាសន្ន ។
សូមគួររំលឹកថា កាលពីថ្ងៃទី២១ ខែឧសភា ឆ្នាំ២០២០ លោកវរសេនីយ៍ ឯក ព្រំ សារឿន នាយការិយាល័យអនុវត្តដីកាបានធ្វើការឃាត់ខ្លួនឈ្មោះ សៀវ សុខនឿន ភេទប្រុស អាយុ៤១ឆ្នាំ តាមពាក្យបណ្តឹងរបស់ជនរងគ្រោះចំនួន៥នាក់ ក្នុងករណី ឆបោកប្រាក់ចំនួន ១៥៩ ៥០០ (ដប់ប្រាំម៉ឺនប្រាំបួនពាន់ប្រាំរយដុល្លារអាមេរិក) តាមរូបភាព ឆបោក.លក់សំរិទ្ធិគោបា នេះដែលក្នុងនោះជនសង្ស័យមានបក្ខពួកចំនួន២នាក់ ប៉ុន្តែចាប់បានម្នាក់ ។
ក្រោយពីចាប់ខ្លួនឈ្មោះ ស៊ីវ សុខនឿន បានសារភាពថា ខ្លួនរួមជាមួយបក្ខពួកឈ្មោះ រិន សុភ័ក្ត្រ ហៅ រិន សារ៉េត ពិតជាបានប្រព្រឹត្តករណី ឆបោកប្រាក់ ពីជនរងគ្រោះទាំង៥ នាក់នោះប្រាកដមែន ។ ពេលចាប់ខ្លួនឈ្មោះ ស៊ីវ សុខនឿន សមត្តកិច្ចបានធ្វើការដកហូតសម្ភារ:រួមមាន ៖ ១.ក្រឡពណ៌ក្រហម ២ ២.ខ្សែកអំបោះ ២ ខ្សែ ៣.ទូរដែក ១ ៤.ក្រឡទឹក ១ ៥.អំបោះឆៅ ១ ដុំ ។
ក្រោយពីសាកសួរយកចម្លើយជនសង្ស័យឈ្មោះ ស៊ីវ សុខនឿន បានសារភាពប្រព្រឹត្តបទល្មើសជាក់ស្តែង សមត្ថកិច្ចបានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ រហូតដល់ថ្ងៃទី២៤ ខែឧសភា ឆ្នាំ២០ ២០ លោក ឡុង វណ្ណា ចៅក្រមស៊ើបសួរបានចេញដីកាបង្គាប់ឲ្យឃុំខ្លួនជនសង្ស័យដាក់ពន្ធនាគារជាបណ្តោះអាសន្ន ។ លុះដល់ថ្ងៃទី២ ខែសីហា ឆ្នាំ២០២០ នាយកដ្ឋាននគរបាលព្រហ្មទណ្ឌបានទទួលដីកាចាត់ឲ្យស៊ើបសួរជំនួសលេខ៤៤១ ព្រទ ចុះថ្ងៃទី០២ ខែកក្កដា ឆ្នាំ២០២០ របស់លោក ស៊ លីនណា ចៅក្រមស៊ើបសួរ សាលាដំបូងរាជធានីភ្នំពេញឲ្យស្រាវជ្រាវរកសាវតាជាតិរបស់ឈ្មោះ រិន សារ៉េត ហៅ រិន សុភ័ក្ត្រ ភេទប្រុស អាយុ៤១ឆ្នាំ ដែលជាបក្ខពួកម្នាក់ទៀត រហូតឈានដល់ការចាប់ខ្លួន នឹងឃុំខ្លួនជនសង្ស័យរូបនេះតែម្តងទៅ ។
សូមបញ្ជាក់ផងដែរថា ករណីខាងលើនេះជនសង្ស័យមានគ្នា២ នាក់ បានធ្វើសកម្មភាពប្រព្រឹត្តបទល្មើសចំនួន២ ករណី សរុបទឹកប្រាក់ប្រមាណជាង២៥មឺនដុល្លារអាមេរិក រឿង (លក់វត្ថុស័ក្តិសិទ្ធិគោបា) ការពិតវត្ថុគោបាក្លែងក្លាយសោះ ។ ចុងក្រោយជនឆបោកជាប់គុកទាំង២នាក់ ៕
ចែករំលែកព័តមាននេះ