រាជធានីភ្នំពេញ ៖ ភ្លៀងមួយមេធំ កាលពីល្ងាចថ្ងៃទី៦ ខែសីហា ឆ្នាំ២០២០ បានបង្កជាជំ
នន់ទឹកភ្លៀងលិចផ្លូវជាច្រើនកន្លែង និងប៉ះពាល់ដល់លំនៅឋានប្រជាពលរដ្ឋ ជាពិសេសអ្នករស់នៅក្បែរប្រឡាយបង្ហូរទឹកស្អុយបឹងទំពុន ចំណុចស្ពានទី៣ ស្ថិតក្នុងសង្កាត់បឹងទំពុនទី១ ព្រំប្រទល់ជាមួយសង្កាត់បឹងទំពុន២ ខណ្ឌមានជ័យ ។
ប្រជាពលរដ្ឋដែលរងគ្រោះក្នុងការជន់លិចមានចំនួន២ភូមិ គឺភូមិសន្សំកុសលទី១ និងសន្សំកុសលទី២ ប៉ុន្តែមិនមែនមានន័យថា ត្រូវទឹកជន់លិចទូទាំងភូមិទាំង២ខាងលើនោះទេ ពោលគឺលិចលង់តែអ្នករស់នៅជាប់មាត់ប្រឡាយ និងនៅក្បែរនោះប៉ុណ្ណោះ។
រីឯនៅតាមផ្លូវមួយចំនួនក៏បានជន់លិចដែរ ដោយសារទឹកហូរមិនទាន់ តែក្នុងរយៈពេល២ទៅ៣ម៉ោងក្រោយមកទឹកក៏ស្រកវិញ ។
ឱ្យប្រជាពលរដ្ឋវាងផ្លូវលេខ៣៧១ ដែលកំពុងបូមទឹកភ្លៀង ៖ រដ្ឋបាលរាជធានីភ្នំពេញ បានជូនដំណឹងភ្លាមៗដល់បងប្អូនប្រជាពលរដ្ឋដែលធ្វើដំណើរឆ្លងកាត់តាមផ្លូវលេខ៣៧១ សូមវាងទៅផ្លូវផ្សេង ដោយសារតែនៅលើកំណាត់ផ្លូវនេះ រដ្ឋបាលរាជធានីភ្នំពេញបានដាក់ម៉ាស៊ីនបូមទឹកចំនួន៤គ្រឿង នៅចំណុចស្ថានីយបូមទឹកបឹងទំពុន ដែលរាយទុយោទឹកកាត់លើផ្លូវដើម្បីបូមទឹកចេញពីរាជធានីភ្នំពេញ ដែលជន់លិចខ្លាំង ។
សាលារាជធានីភ្នំពេញ បានផ្អាកការធ្វើចរាចរណ៍លើកំណាត់ផ្លូវលេខ៣៧១ ជាបណ្ដោះអាសន្ន ចាប់ពីវេលាម៉ោង៣និង៣០នាទីទៀបភ្លឺ ថ្ងៃទី៧ ខែសីហា ឆ្នាំ២០២០ រហូតដល់បូមទឹកអស់ ។ ដោយសារទឹកភ្លៀងធ្លាក់ច្រើននៅក្នុងរាជធានីភ្នំពេញក្នុងរយៈពេលប៉ុន្មានថ្ងៃកន្លងមកនេះ ធ្វើឲ្យបរិមាណទឹកនៅចំណុចស្ថានីយបូមទឹកបឹងទំពុនកើនឡើងយ៉ាងខ្លាំង និងបណ្តាលឲ្យផ្ទះសម្បែងនិងផ្លូវមួយចំនួននៅក្បែរប្រឡាយទឹកនៅក្នុងតំបន់ខាងលើ មានការជន់លិច ។
ដើម្បីដោះស្រាយបញ្ហាកង្វល់របស់ប្រជាពលរដ្ឋ រដ្ឋបាលរាជធានីភ្នំពេញបានសម្រេចដាក់បន្ថែមម៉ាស៊ីនបូមទឹក ដែលមានមុខកាត់ទំហំ២តឹក មានសមត្ថភាពបូមទឹក៣០ម៉ែត្រគូបក្នុង១នាទី ចំនួន៤គ្រឿង នៅចំណុចស្ថានីយបូមទឹកបឹងទំពុន ដែលស្ថិតក្នុងសង្កាត់បឹងទំពុនទី១ ខណ្ឌមានជ័យ និងពង្រាយទុយោកាត់លើផ្លូវលេខ៣៧១ ដើម្បីបូមរំដោះទឹកចេញពីរាជធានីភ្នំពេញ ទម្លាក់ចូលទៅ
ក្នុងបឹងទំពុន ស្ថិតក្នុងសង្កាត់ដង្កោ ខណ្ឌដង្កោ ។
បរិមាណទឹកភ្លៀងមានកម្រិតខ្ពស់ ដែលធ្វើឱ្យតំបន់មួយចំនួនក្នុងរាជធានីភ្នំពេញ
ត្រូវលិចលង់៖ មន្ត្រីជំនាញនៅរដ្ឋបាលរាជធានីភ្នំពេញបានអះអាងថា បរិមាណទឹកភ្លៀងកាលពីល្ងាចថ្ងៃទី៦ ខែសីហាមានកម្រិតខ្ពស់ ដែលធ្វេីឲ្យតំបន់មួយចំនួនក្នុងរាជធានីភ្នំពេញត្រូវលិចលង់ ប៉ុន្តែបន្តិចក្រោយមកបានស្រកវិញអស់ នៅសល់តែតំបន់មួយចំនួនតូចដែលមិនទាន់ស្រកភ្លាមដោយសារតំបន់នោះកំពុងដំណើរការការដ្ឋានស្ថាបនាប្រឡាយ លូជាដើម ។
ជាក់ស្ដែង បរិមាណកម្រិតទឹកភ្លៀងកាលពីល្ងាចថ្ងៃទី៦ ខែសីហា ឆ្នាំ២០២០ នៅផ្សារដើមគ=១០៧,៥មីល្លីម៉ែត្រ ុ សែនសុខ= ៣១មីល្លីម៉ែត្រ , ចោមចៅ=៦៦មីល្លីម៉ែត្រ ,សាក់សំពៅ=២៩,២មីល្លីម៉ែត្រ , បឹងធំ=៣៥,៥មីល្លីម៉ែត្រ , ទួលសង្កែ=៣៧,៥មីល្លីម៉ែត្រ ,ចាក់អង្រែ=៤៩,២មីល្លីម៉ែត្រ ,ព្រែកឯង= ៤៥មីល្លីម៉ែត្រ ។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ មានប្រសាសន៍ថា បរិមាណទឹកភ្លៀងកាលពីល្ងាចថ្ងៃទី៦ ខែសីហា មានកម្រិតខ្ពស់ ដែលធ្វើឲ្យតំបន់មួយចំនួនក្នុងរាជធានីភ្នំពេញត្រូវលិចលង់ ប៉ុន្តែបានស្រកទៅវិញអស់ភ្លាម នៅសល់តែតំបន់មួយចំនួនតូចដែលមិនទាន់ស្រកភ្លាម ដោយសារភ្លៀងលេីសកម្រិត ។
លោកបន្តថា ជាក់ស្ដែងនៅផ្លូវមួយចំនួនមានសភាពល្អប្រសើរ ដូចជាផ្លូវលេខ២០០៤ តំបន់ព្រលានយន្តហោះ ទោះបីភ្លៀងខ្លាំងក៏ស្រកបានលឿនដែរ ។ លោកបានបន្ថែមថា ស្ថានីយថ្មីដែលបានដាក់ឲ្យដំណើរការនេះ វានឹងជួយបញ្ចៀសការលិចលង់ នៅពេលភ្លៀងខ្លាំងលើកក្រោយៗទៀត ។
លោក សាំ ពិសិដ្ឋ បញ្ជាក់ថា កម្រិតទឹកភ្លៀងកាលពីល្ងាចថ្ងៃទី៦ ខែសីហាគឺ១០៥មីល្លីម៉ែត្រ ហើយភ្លៀងខ្លាំងរាយប៉ាយពេញស្មើរាជធានីភ្នំពេញ ។ អុីចឹងហើយធ្វើឲ្យតំបន់មួយចំនួនរងការលិចលង់ ប៉ុន្តែតំបន់មួយចំនួនក៏ទឹកស្រកបានលឿន ហើយតំបន់ដែលស្រកយូរមាននៅម្តុំស្តុបម៉ុងឌីយ៉ាល់ ហើយនិងតំបន់បឹងទំពុន ដោយសារបរិមាណទឹកច្រើនហួសកម្រិត ធ្វើឲ្យការបូមរបស់យើងមិនទាន់ ។ ប៉ុន្តែនៅម៉ោង១២និង១៥នាទីថ្ងៃត្រង់ថ្ងៃទី៧ ខែសីហា យើងបានដាក់ឲ្យដំណើរការម៉ាស៊ីនបូមទឹកថ្មីខ្នាតធំ១ម៉ែត្រចំនួន២គ្រឿង ដែលមានសមត្ថភាពបូម៦ម៉ែត្រគូបមួយគន្លងទៀត ។ អុីចឹងធ្វើឲ្យស្ថានីយបឹងទំពុនមានសមត្ថភាពដល់១៨ម៉ែត្រគូបក្នុងមួយវិនាទី គឺបានបូមលឿនស្រកកាន់តែលឿន នៅតំបន់ម៉ុងឌីយ៉ាល់ និងបឹងទំពុនដែលរហូតដល់ម៉ោង៥ល្ងាច បានស្រកអស់៧០%ហើយ ។
លោកបន្តថា ទោះបីតំបន់មួយចំនួនមានការលិចលង់ក្តី ប៉ុន្តែមន្ត្រីក្រោមឱវាទរដ្ឋបាលរាជធានីភ្នំពេញ បាននាំគ្នាចុះកាយសំរាម និងកំណកមុខលូដែលកំពុងស្ទះ ។ លោកក៏បានអំពាវនាវដល់បងប្អូនប្រជាពលរដ្ឋ សូមជួយសម្អាតប្រមូលសំរាមទុកដាក់ឲ្យបានស្រួលបួល ចៀសវាងកុំឲ្យមានការកកស្ទះក្នុងប្រព័ន្ធលូ ឬប្រឡាយជាដើម ៕
អត្ថបទសរសេរ ដោយ
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ