រាជធានីភ្នំពេញ ៖ នៅលើសង្វៀនស៊ីអិនស៊ីថ្ងៃសៅរ៍ទី៨ សីហា សប្ដាហ៍នេះ គណៈកម្មការរៀបចំការប្រកួតបានផ្គូផ្គងឱ្យអ្នកប្រដាល់ជើងខ្លាំងចំនួន៣គូប៉ះគ្នា ធ្វើឱ្យរំពឹងថាកក្រើកសង្វៀន
មិនខានដោយសារកីឡាករដែលជាសមាសភាពចូលរួមប្រកួតនៅក្នុងពេលនោះសុទ្ធតែជាជើង
ខ្លាំងមិនធម្មតានៅក្នុងពិភពប្រដាល់។
គូទី១ កីឡាករ បាង កាយ៉ាក មកពីសមាគមកីឡាប្រដាល់ខេត្តកោះកុង ត្រូវប៉ះជាមួយកីឡាករសោម វិឆ័យ មកពីក្លិបកងពលតូចលេខ៧០ ។ គូនេះសុទ្ធតែជាអ្នកប្រដាល់ចាស់វស្សាធ្លាប់មានបទពិសោធន៍ប្រកួតនៅលើសង្វៀនជោកជាំដូចគ្នា គ្រាន់តែអ្នកទាំងពីរមិនធ្លាប់ជួបគ្នាកន្លងមកប៉ុណ្ណោះ ។ បើនិយាយពីកីឡាករ បាង កាយ៉ាក មិនត្រឹមតែល្បីឈ្មោះនៅក្នុងប្រទេសប៉ុណ្ណោះទេ គេធ្លាប់ឈានជើងចូលប្រឡូកនៅលើសង្វៀនស្រុកថៃរាប់មិនអស់ទៀតផង ។
មិនតែប៉ុណ្ណោះអ្នកប្រដាល់មកពីជាយដែនខ្មែ-ថៃរូបនេះស្នៀតកែងនិងជង្គង់របស់គេល្អខ្លាំងណាស់ ប៉ុន្តែលើកនេះគេមកប៉ះចំ សោម វិឆ័យ ដែលមានស្នៀតជើងល្អមិនដឹងថាយ៉ាងណានោះទេ ដោយគេបានត្រឹមគិតថា ជើងខ្លាំងប៉ះជើងខ្លាំងបែបនេះនឹងធ្វើឱ្យសង្វៀនទាំងមូលកក្រើកមិនខាន ។
គូទី២ កីឡាករ ផាន រះ មកពីក្លិបជ្រៃសែនជ័យខេត្តកំពង់ស្ពឺ ប៉ះជាមួយកីឡាកររិន សារ័ត្ន មកពីក្លិបកងទ័ពជើងទឹក ។ ផាន រះជាអ្នកប្រដាល់ចាស់វស្សាមួយរូបដែលមានបទពិសោធន៍ប្រកួតនៅលើសង្វៀនច្រើនឆ្នាំជាងគូប្រកួត ប៉ុន្តែមិនប្រាកដថាអាចយកឈ្នះ រិន សារ័ត្ន បានដោយងាយនោះទេ ។ ម្យ៉ាងវិញទៀត កម្លាំងស៊ុហ្វរបស់គេពេលនេះក៏រាងចុះខ្សោយជាងមុនបន្តិចដែរ ប៉ុន្តែបើនិយាយពីល្បិចប្រយុទ្ធវិញនោះមិនអាចប្រៀបជាមួយផាន រះបានឡើយ ។
រិន សារ័ត្ន ធ្លាប់ជាអ្នកប្រដាល់វាយក្នុងទ្រុង ហើយវ័យក៏នៅក្មេងជាងទៀត តែទោះជាយ៉ាងណា រិន សារ័ត្ន ក៏មិនអាចមើលស្រាលលើរៀមច្បងម្នាក់នេះបាននោះទេ។គូនេះរឹតតែមិនអាចទាយទុកមុនថាអ្នកណាខ្លាំងជាងអ្នកណាណាស់មានតែរង់ចាំទស្សនាការប្រកួតជាក់ស្ដែងទាំងគ្នាប៉ុណ្ណោះ។
គូទី៣ កីឡាករ ឡុង ឡា មកពីក្លិបអប់រំកាយស្រុកអន្លង់វែងខេត្តបន្ទាយមានជ័យ ប៉ះជាមួយកីឡាករ ឌុម កែវដា មកពីក្លិបមកុដរាជសីហ៍ ។ ការប៉ះគ្នារវាងអ្នកប្រដាល់ជើងខ្លាំងទាំងពីរមិនមែនជារឿងចៃដន្យនោះទេគឺជាការរៀបចំដោយមើលលើសមត្ថភាពជាធំដោយសារអ្នកទាំងពីរបានយកឈ្នះកីឡាករខ្លាំងៗជាច្រើននាក់ដូចគ្នានាពេលកន្លងមក ។ តាមរយៈជ័យជម្នះផ្ទួនៗគ្នាបែបនេះ ទើបគណៈកម្មការសម្រេចផ្គូផ្គងឱ្យពួកគេទាំងពីរប៉ះគ្នាដោយសារចង់ដឹងថាអ្នកណាគឺជាជើងខ្លាំងពិតប្រាកដ៕
ចែករំលែកព័តមាននេះ