ខេត្តបន្ទាយមានជ័យ ៖ កាលពីព្រឹកថ្ងៃទី១៣ កុម្ភៈ លោកឧត្តមសេនីយ៍ទោ ប៊ុន សេង ទីប្រឹក្សាផ្ទាល់សម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាមេបញ្ជាការយោធភូមិភាគទី៥ និងលោកh‘I ហេង តំណាងលោកឧកញ៉ាសុខ គង់ ប្រធានក្រុមហ៊ុនសណ្ឋាគារសុខារីសតសូគីម៉ិចបានអញ្ជើញជាអធិបតីក្នុងពិធីប្រគល់អំណោយជាគ្រឿងឧបភោគ បរិភោគជូនដល់កងទ័ពក្នុងអង្គភាពកងពលតូចលេខ៥១ និងកងកំលាំងនគរបាលការពារព្រំដែនគោកលេខ៨១៧ និង៨១៩។ ពិធីនេះធ្វើឡើងនៅបញ្ជាការដ្ឋានកងពលតូចលេខ៥១ ដោយមានការចូលរួមពីលោកមេបញ្ជាការ មេបញ្ជាការរង នាយ នាយរង ពលទាហាននៃកងពលលេខ៥១ និងលោកស្នងការរង លោកមេបញ្ជាការនគរបាលការពារព្រំដែនគោកនៃស្នងការដ្ឋាននគរបាលខេត្តបាត់ដំបង។
លោកឧត្តមសេនីយ៍ត្រីសូ ចាន់ហេង មេបញ្ជាការកងពលតូចលេខ៥១បានបញ្ជាក់ថា ក្នុងនាមថ្នាក់ដឹកនាំកងពលតូចលេខ៥១ មានក្តីសោមនស្សរីករាយ និងមានមោទនភាពយ៉ាងក្រៃលែងចំពោះវត្តមានលោកឧត្តមសេនីយ៍ទោប៊ុន សេង មេបញ្ជាការយោធភូមិភាគទី៥ដែលបានអញ្ជើញជាអធិបតីភាពក្នុងពិធីសាកសួរសុខទុក្ខរបស់ក្រុមហ៊ុនសណ្ឋាគារសុខារីសតសូគីម៉ិចចំពោះកងកំលាំងប្រដាប់អាវុធក្នុងទិសទី១ ខេត្តបន្ទាយមានជ័យ និងកងកំលាំងនគរបាលការពារព្រំដែនគោកលេខ៨១៧-៨១៩ ប្រចាំទិសខេត្តបាត់ដំបង។
លោកមេបញ្ជាការកងពលតូចលេខ៥១បានរាយការណ៍ថា ក្នុងភូមិសាស្ត្រខេត្តបន្ទាយមានជ័យកាលពីថ្ងៃទី២៩ ខែធ្នូ ឆ្នាំ២០១០ កន្លងទៅនេះក្រុមជ្រុលនិយមអាវលឿងសៀមចំនួន៧នាក់ ប្រុស៥នាក់ ស្រី២នាក់ បានលួចចូលមកក្នុងទឹកដីកម្ពុជាតាមចំណុចបង្គោលសីមាលេខ៤៦ក្នុងភូមិសាស្ត្រភូមិជោគជ័យ ឃុំអូរបីជាន់ ស្រុកអូរជ្រៅ ហើយត្រូវកងកំលាំងចាប់ខ្លួនបញ្ជូនឱ្យរាជរដ្ឋាភិបាលកម្ពុជា កាត់ទោសតាមច្បាប់។ ក្រោយព្រឹត្តិការណ៍នេះ សៀមបានបញ្ជូនកំលាំង និងគ្រឿងយុទ្ធភណ្ឌមានរថក្រោះ រថពាសដែក អាវុធគាំទ្រមកប្រឈមទល់មុខជាមួយកំលាំងយើងនៅតំបន់ភូមិជោគជ័យ។ សកម្មភាពរបស់ពួកសៀមនេះគេអះអាងថា មកទប់ស្កាត់ក្រុមបាតុករអាវលឿងដែលមានបំណងមកធ្វើបាតុ កម្មនៅភូមិជោគជ័យទាមទារតវ៉ាឱ្យរាជរដ្ឋាភិបាលកម្ពុជាដោះលែងជនជាតិសៀមទាំង៧នាក់ត្រឡប់មកវិញ។
លោកហី ហេង តំណាងឱ្យលោកឧកញ៉ា សុខ គង់ ប្រធានក្រុមហ៊ុនសណ្ឋាគារសុខារីសត សូគីម៉ិចបានវាយតំលៃខ្ពស់ និងកោតសរសើរ និងដឹងគុណចំពោះវីរភាពដ៏អង់អាចក្លាហានរបស់លោកមេបញ្ជាការ មេបញ្ជាការរង នាយ នាយរង និងវីរយុទ្ធជនដែលមានឆន្ទៈមោះមុត និងលះបង់កំលាំងកាយចិត្ត លះបង់ញើសឈាម និងអាយុជីវិតក្នុងបុព្វហេតុការពារបូរណភាពទឹកដីនៃព្រះរាជាណាចក្រកម្ពុជាយើងក៏ដូចជាការពារអាជីវករក្រុមហ៊ុនក្នុងស្រុក និងប្រជាពលរដ្ឋឱ្យរស់នៅក្នុងភាពសុខដុមរមនា។
លោកហី ហេង មានប្រសាសន៍ទៀតថា ក្នុងនាមតំណាងឱ្យក្រុមហ៊ុន និងអាជីវករក្នុ្ងងស្រុក រួមទាំងប្រជាពលរដ្ឋទូទាំងប្រទេសសូមរួមចំណែក និងផ្សារភ្ជាប់នូវកាតព្វកិច្ចសមរភូមិក្រោយជាមួយកាតព្វកិច្ចសមរភូមិមុខ។ តំណាងលោកឧកញ៉ាប្រធានក្រុមហ៊ុនបាននាំយកអំណោយរបស់ក្រុមហ៊ុនសណ្ឋាគាររីសតសូគី ម៉ិចឧបត្ថម្ភដល់អង្គភាពកងពលតូចលេខ៥១ ទឹកបរិសុទ្ធចំនួន៥០០យួរ មីចំនួន៥កេសតូច ទឹកស៊ីអ៊ីវចំនួន២៥០យួរ ត្រីខចំនួន៥០កេសធំ និងឆៃប៉ូវចំនួន២៥០គីឡូក្រាម។ កំលាំងនគរបាលការពារព្រំដែនគោកលេខ៨១៧-៨១៩ ឈរជើងតាមខ្សែបន្ទាត់ព្រំដែនខេត្តបាត់ដំបងក្នុងមួយអង្គភាពទទួលបានទឹកសុទ្ធចំនួន២៥០យួរ មីកេសតូច២៥០កេស ទឹកស៊ីអ៊ីវ១២៥យួរ ត្រីខ២៥កេសធំ និងឆៃប៉ូវ១២៥គីឡូក្រាម។
លោកឧត្តមសេនីយ៍ទោ ប៊ុន សេង មេបញ្ជាការយោធភូមិភាគទី៥បានថ្លែងអំណរគុណដល់ក្រុមហ៊ុនសណ្ឋាគារសុខារីសត ដែលបានយកចិត្តទុកដាក់ឧបត្ថម្ភស្បៀងអាហារដល់កងកំលាំងកងទ័ព និងកងកំលាំងនគរបាលជាតិដែលចងសម្ព័ន្ធមេត្រីភាព សមរភូមិក្រោយឧបត្ថម្ភសមរភូមិមុខស្របតាមអនុសាសន៍របស់សម្តេចតេជោ ។ ក្រុមហ៊ុនក៏បានឧបត្ថម្ភអគារ ថវិកា មធ្យោបាយសំភារជាច្រើនដល់កងកំលាំងប្រដាប់អាវុធឈរជើងការពារបូរណភាពទឹកដីនៅជួរមុខ ។
លោកឧត្តមសេនីយ៍មានប្រសាសន៍ថា ថ្ងៃទី៤ រហូតដល់ថ្ងៃទី៧ ខែកុម្ភៈ ឆ្នាំ២០១១ កងទ័ពសៀមបានបង្កសង្គ្រាមឈ្លានពានបូរណភាពទឹកដីកម្ពុជានៅ តំបន់ប្រាសាទព្រះវិហារបង្កឱ្យខូចខាតទ្រព្យសម្បត្តិ ជីវិតមនុស្ស ខូចខាតវត្តអារាម និងប្រាសាទព្រះវិហារដែលជាបេតិកភណ្ឌពិភពលោក។ ក្នុងស្ថានការណ៍បែបនេះលោកឧត្តមសេនីយ៍មេបញ្ជាការបានណែនាំឱ្យកងកំលាំងទាំងអស់ត្រូវត្រៀមកំលាំងប្រយុទ្ធជាប្រចាំ ជីកលេណដ្ឋាន និងក្តាប់ឱ្យជាប់នូវសកម្មភាពសត្រូវ ។ ក្នុងឱកាសនោះគណៈអធិបតីបានប្រគល់លិខិតសរសើរដល់ក្រុមហ៊ុនសណ្ឋាគារសុខារីសតសូគីម៉ិចផងដែរ។
សូមបញ្ជាក់ថា អាណិកជនខ្មែរនៅក្រុងស៊ីដនីប្រទេសអូស្ត្រាលី ១-ឈ្មោះសួន, ២-ឈ្មោះកែវ ឆដាភា ផ្តល់គោចំនួន១០ក្បាល និងអាណិកជនខ្មែរនៅសហរដ្ឋអាមេរិក ១-ឈ្មោះបូ វីស៊ូន និងភរិយាឧបត្ថម្ភ១.០០០ដុល្លារ, ២-ឈ្មោះសូ មើធ និងភរិយាឧបត្ថម្ភ១០០ដុល្លារ,៣-អ្នកស្រីសាន់ ហិចងួន ឧបត្ថម្ភ១០០ដុល្លារ សរុប១.២០០ដុល្លារជូនដល់វរសេនាតូចការពារព្រំដែនគោកលេខ៥១៣នៃកងពល៥១ ៕
ចែករំលែកព័តមាននេះ