រដូវភ្លៀង​ផ្សិត​សម្បូរ​បែប​កំពុង​ផ្តល់​ផល​ក្នុង​ព្រៃ​ពូជ​គ្រញូង


ខេត្តសៀមរាប ៖ មន្ត្រី​ជំនាញ​អភិរក្ស​ព្រៃឈើ​អះអាង​ថា អនុ​ផល​ព្រៃឈើ​ដែល​វា​ដុះ​ឡើង​យ៉ាង​សម្បូរ​បែប ពិត​ណាស់​បាន​ទ្រទ្រង់​ជីវភាព​ប្រជា​សហគមន៍ តែ​ក៏​អាច​ក្លាយជា​តំបន់​ដ៏​មាន​សក្តានុ​ពល​សម្រាប់​ការ​ពង្រីក​វិស័យ​ទេសចរណ៍​នៅ​កម្ពុជា​ផង​ដែរ ។

ជាក់ស្តែង​អនុ​ផល​ព្រៃឈើ​នៅ​ក្នុង​តំបន់​ព្រៃ​ពូជ​គ្រញូង កន្ទួត​ខ្នារ​ក្រៅ ក្នុងភូមិ​សាស្ត្រ​ស្រុក​ស្វាយ​លើ និង​ស្រុក​បន្ទាយស្រី នៃ​ខេត្តសៀមរាប នៅ​ក្នុង​ខែកក្កដា​នេះ​បាន​និង​កំពុង​បង្ហាញ​ផល​ផ្សិត​ក្ងោក ផ្សិត​ទន្សោង និង​មាន​ផ្សិតកញ្ចូរ​ផង​ដែរ ហើយ​ប្រភេទ​ផ្សិត​ទាំងនេះ បាន​បន្ត​ផ្តល់​ផល​រហូត​ដល់​ចុងខែ​សីហា​ខាង​មុខ ។ បន្ទាប់​ពី​ក្នុង​តំបន់​ព្រៃ​មួយ​នេះ កាលពី​ខែមេសា​កន្លង​មក ពេល​ធ្លាក់​ភ្ញៀ​ង​ដំបូង​ៗ​បាន​ផ្តល់​ផល​ផ្សិត​ប៉ក់ និង​ការ​លូតលាស់​ស្លឹក​ព្រិច​ប្រភេទ​បន្លែ​ព្រៃ​សម្រាប់​ប្រជា​ពលរដ្ឋ​រស់នៅ​ជុំវិញ​តំបន់​នោះ បាន​អាស្រ័យ​ផល​តាម​រដូវ​កាល​ជា​រៀង​រាល់​ឆ្នាំ ។

លោក សេង លន នាយ​សង្កាត់​រដ្ឋបាល​ព្រៃឈើ​កន្ទួត​ខ្នារ​ក្រៅ បាន​ឲ្យ​ដឹង​យ៉ាង​ដូច្នេះ នា​ថ្ងៃ​ទី​២៥ ខែកក្កដា ឆ្នាំ​២០២០​នេះ ក្នុង​ពេល​ដែល​លោក​កំពុង​ស្ថិត​នៅ​ជាមួយ​ក្រុម​ប្រជាពលរដ្ឋ​ប្រមាណ​ជាង​៣០​នាក់ កំពុង​ដក​ផ្សិត​ទាំងនោះ ។

លោក​បាន​បញ្ជាក់​ឲ្យ​ដឹង​ដែរ​ថា ដោយសារ​តែ​តំបន់​នេះ​ជា​តំបន់​ព្រៃ​ត្រូវ​ការពារ ដូច្នេះ​បងប្អូន​ប្រជាពលរដ្ឋ​ដែល​ចូល​មក​ប្រមូល​ផល​ផ្សិត​ទាំងនេះ គឺ​ត្រូវ​ទទួល​បានការ​អនុញ្ញាត​ត្រឹមត្រូវ និង​ត្រូវ​ទទួល​បាន​នូវ​ការ​ការពារ​សុវត្ថិភាព​ពី​ក្រុម​ឆ្មាំ​ការពារ​ព្រៃ​ផង​ដែរ ។ លោក​ថា កិច្ចការ​អភិរក្ស​និង​ថែរក្សា​ព្រៃឈើ វា​ច្បាស់​ណាស់ អនុ​ផល​ព្រៃឈើ​ដ៏​សម្បូណ៌​បែប វា​នឹង​ប្រាកដ​កើតឡើង ជួយ​ចិញ្ចឹម​ប្រជា​សហគមន៍​ដោយ​រីករាយ ។

ប្រជាពលរដ្ឋ​ដែល​បាន​ចូល​មក​ប្រមូល​ផល​ផ្សិត​នៅ​ក្នុង​ព្រៃ​នោះ ពួក​គេ​ក្នុង​ម្នាក់​ៗ អាច​ដក​ផ្សិត​បាន​ពី​៥ ដល់​១០​គីឡូក្រាម តាម​ស្ថានភាព​ជាក់ស្តែង ព្រោះ​ការ​ប្រទះ​ឃើញ​ផ្សិត​នៅ​ក្នុង​ព្រៃ​នេះ វា​ផ្អែក​ទៅ​លើ​របប​ទឹកភ្លៀង​ផង​ដែរ ។ ពួក​គាត់​និយាយ​មិន​ខុស​គ្នា​ទេ​ថា បើសិនជា​រក​ផ្សិត​បាន​តិច​គឺ​ទុក​សម្រាប់​ហូប​ក្នុង​គ្រួសារ ហើយ​បើ​រកបាន​ច្រើន​គឺ​ទុក​សម្រាប់​ហូប​ខ្លះ និង​សម្រាប់​លក់​ខ្លះ ។

ការ​និយាយ​ឲ្យ​ដឹង​យ៉ាង​ដូច្នេះ គឺ​ចង់​បង្ហាញ​ក្នុង​ន័យ​ថា វា​ពុំ​មែន​ដោយសារ​តែ​ភាព​ក្រីក្រ​បង្ខំ​ឲ្យ​ពួក​គាត់​មក​បេះ​ផ្សិត​នោះ​ទេ តែ​ជា​ប្រពៃណី​ប្រចាំ​រដូវ ដែល​ពួក​គាត់​ត្រូវ​ចូល​មក​ប្រមូល​ផល​នៅ​ក្នុង​ព្រៃ​នេះ ។ យ៉ាងណា​ក៏​ដោយ អនុ​ផល​ព្រៃឈើ​បាន​ជួយ​ទ្រទ្រង់​ជីវភាព​គ្រួសារ​របស់​ពួក​គាត់ ហើយ​ពួក​គាត់​ក៏​ទទួលស្គាល់​ដែរ​ថា មិន​នាំ​គ្នា​បំផ្លាញ​ព្រៃឈើ តទៅ​ទៀត ទើប​យើង​ទទួល ផល​យ៉ាង​ដូច្នេះ ។

គួរ​បញ្ជាក់​ដែរ​ថា តំបន់​ព្រៃ​ពូជ​ក្រ​ញូ​ង​នេះ មាន​ទំហំ​១.៨៨៨​ហិ​កតា មិន​ត្រឹមតែ​ជា​ចំការ​ឈើ​ពូជ​គ្រញូង​ដ៏​មានគុណ​ភាព និង​ធំ​ជាងគេ​ក្នុង​ប្រទេស​កម្ពុជា​នោះ​ទេ តែ​ដោយសារ​មាន​សក្តានុពល​ចម្រុះ​នោះ តំបន់​នេះ​កំពុង​ធ្វើ​ដំណើរ​ក្នុង​គំរោង​ដ៏​ធំ​មួយ ឆ្ពោះទៅ​រក​គោលដៅ​ទេសចរណ៍​លំហែ​ធម្មជាតិ សម្រាប់​អនាគត​ផង​ដែរ ៕

Facebook Google Twitter Email

Live

Sponsored News

០៨:៤៦ | ក្នុងស្រុក

ក្រុមហ៊ុនបុត្រសម្ព័ន្ធ រ៉ូយ៉ាល់គ្រុប ទទួលស្វាគមន៍ទស្សនកិច្ចពិសេសរបស់ឯកឧត្តម ឧត្តមសេនីយ៍ឯក ហ៊ុន ម៉ាណែត សម្រាប់ដំណើរស្វែងយល់អំពីឌីជីថលនីយកម្ម និងបច្ចេកវិទ្យាបណ្តាញ 5G !

ការស្ទង់មតិគេហទំព័រថ្មី




សូម​អរគុណ