ក្រុមហ៊ុនរ៉ែអូស្ត្រាលី មួយបានកំពុងពង្រីកប្រតិបត្តិការវិនិយោគលើកំណប់រ៉ែមាសនៅកម្ពុជាបន្ថែមទៀត ហើយរំពឹងថា នឹងអាចធ្វើអាជីវកម្មរ៉ែមាស រហូតដល់ទៅ៣៦តោនបន្ថែម ។ តាមការប្រកាសរបស់ក្រសួងរ៉ែ និងថាមពល បានឲ្យដឹងថា ក្រុមហ៊ុន…
ក្រុមហ៊ុនរ៉ែអូស្ត្រាលី មួយបានកំពុងពង្រីកប្រតិបត្តិការវិនិយោគលើកំណប់រ៉ែមាសនៅកម្ពុជាបន្ថែមទៀត ហើយរំពឹងថា នឹងអាចធ្វើអាជីវកម្មរ៉ែមាស រហូតដល់ទៅ៣៦តោនបន្ថែម ។
តាមការប្រកាសរបស់ក្រសួងរ៉ែ និងថាមពល បានឲ្យដឹងថា ក្រុមហ៊ុន Renaissance និងក្រសួងរ៉ែ និងថាមពលបានចុះហត្ថលេខាលើកិច្ចព្រមព្រៀងវិនិយោគទុនធនធានរ៉ែចំនួន២បន្ថែមទៀតហើយ កាលពីថ្ងៃទី១៧ ខែវិច្ឆិកា ឆ្នាំ២០២៥ ។
ប្រភពដដែលបានអះអាងថា គម្រោងទី១ គឺកិច្ចព្រមព្រៀងកែសម្រួលបន្ថែមទៅលើកិច្ចព្រមព្រៀងលើកទី១ នៅតំបន់អូរខ្វាវ ស្រុកកែវសីម៉ា ខេត្តមណ្ឌលគិរី ដោយបញ្ចូលបន្ថែមគម្រោង អណ្តូងរ៉ែក្រោមដី ដែលអាចផ្តល់ផលិតផលមាសបានប្រមាណ១០តោនបន្ថែមទៅលើជម្រករ៉ែម៉ាសចាស់ ចំនួនប្រមាណ៣៤តោន ។
ប្រភពដដែលបានបន្ថែមថា គម្រោងទី២ គឺកិច្ចព្រមព្រៀងវិនិយោគទុនធនធានរ៉ែ នៅតំបន់ជាំតាម៉ៅ ស្រុកមេមត់ ខេត្តត្បូងឃ្មុំ ដែលមានលក្ខណៈសេដ្ឋកិច្ចដែលអាចទាញយកមាសសរុបប្រមាណ២៦តោនក្នុងអាយុកាល៧ឆ្នាំនៃអណ្ដូងរ៉ែបើក ។
ប្រភពដដែលបន្តថា គម្រោងទី១ រំពឹងថា នឹងផ្តល់ចំណូលជូនរដ្ឋសរុបប្រមាណ១ពាន់លានដុល្លារ ហើយគម្រោងទី២ នឹងផ្តល់ចំណូលជូនរដ្ឋសរុបប្រមាណជា៥៨៣លានដុល្លារ ។
មកដល់ពេលនេះគេដឹងថា ក្រុមហ៊ុន Renaissance គឺជាក្រុមហ៊ុនមួយដែលបានធ្វើអាជីវកម្មជីក និងចម្រាញ់រ៉ែមាស នៅកម្ពុជាតាំងពីឆ្នាំ២០១៩ នៅតំបន់អូរខ្វាវ ស្រុកកែវសីម៉ា ខេត្តមណ្ឌលគិរី ៕
ចែករំលែកព័តមាននេះ