ខឹងប្អូនថ្លៃវាយប្រពន្ធខៀវភ្នែក ទាញកែវគប់ក្បាលប្អូនថ្លៃបែកហូរឈាម
រាជធានីភ្នំពេញ ៖ បុរសម្នាក់ខឹងប្អូនថ្លៃវាយប្រពន្ធខៀវភ្នែកបានទាញកែវវាយប្អូនថ្លៃមួយកែវបែកក្បាលហូរឈាម ។
រាជធានីភ្នំពេញ ៖ បុរសម្នាក់ខឹងប្អូនថ្លៃវាយប្រពន្ធខៀវភ្នែកបានទាញកែវគប់ប្អូនថ្លៃមួយកែវបែកក្បាលហូរឈាម ។ ហេតុការណ៍នេះបានបង្កឱ្យមានការភ្ញាក់ផ្អើលកាលពីវេលាម៉ោង២ និង២០នាទីរំលងអធ្រាត្រ ឈានចូលថ្ងៃទី១៦ មករា នៅហាងស៊ុប៨៨១អា ម្តុំច្រមុះជ្រូកក្បាលថ្នល់ តាមផ្លូវលេខ២៧១ សង្កាត់ផ្សារដើមថ្កូវ ខណ្ឌចំការមន ។
ជនរងគ្រោះមានឈ្មោះ ហួក បញ្ញា ភេទប្រុស អាយុ៣២ឆ្នាំ មុខរបររត់តុនៅភោជនីយដ្ឋានបុប្ជាចំការមន ចំណែកជនដៃដល់មានឈ្មោះ ពុធ មករា ភេទប្រុស អាយុ៣០ឆ្នាំ ជាសន្តិសុខយាមនៅភោជនីយដ្ឋានបុប្ជាចំការមនជាមួយគ្នា ត្រូវជាបងថ្លៃ (បងប្រុសរបស់ប្រពន្ធជនរងគ្រោះ) ។ ទាំងពីរនាក់ស្នាក់នៅផ្ទះជួលជាមួយគ្នា ផ្ទះលេខ២៧ សង្កាត់ផ្សារដើមថ្កូវ ខណ្ឌចំការមន ។
ប្រភពព័ត៌មានពីកន្លែងកើតហេតុបានឲ្យដឹងថា កន្លងមកប្តីប្រពន្ធ ហួក បញ្ញា បានឈ្លោះប្រកែកគ្នា ហើយបុរសជាប្តីបានវាយប្រពន្ធខៀវភ្នែក ទើបនៅថ្ងៃកើតហេតុក្រុមគ្រួសារ មានឪពុកមា និងម្តាយមីង ប្តីប្រពន្ធមានទំនាស់ និងបងថ្លៃប្រុសដែលជាបងប្រុសរបស់ប្រពន្ធជនរងគ្រោះបានទៅជួបជុំហូបស៊ុបនៅហាង៨៨១អា នៅក្បាលថ្នល់ ដើម្បីធ្វើការផ្សះផ្សារពីរនាក់ ប្តីប្រពន្ធដែលមានទំនាស់ ។ ប៉ុន្តែខណៈពេលនិយាយគ្នាបណ្តើរហូបស៊ុបផឹកស្រាថូអស់៣ថូ ស្រវឹងរៀងខ្លួនបន្តិច បងប្រុសឃើញប្អូនស្រីត្រូវប្តីវាយខៀវភ្នែកកើតមានចិត្តខឹងបាននិយាយទាស់ពាក្យសម្តីជាមួយប្អូនថ្លៃក៏បានយកកែវគប់ក្បាលប្អូនថ្លៃបែកទាំងកែវ បែកទាំងក្បាលហូរឈាមក៏ត្រូវបានប្រពន្ធបញ្ជូនទៅព្យាបាលនៅមន្ទីរពហុព្យាបាលបាយ័ន។
ចំណែកបងថ្លៃដែលជាជនបង្កត្រូវសមត្ថកិច្ចឃាត់ខ្លួនយកទៅសាកសួរ ហើយប្អូនថ្លៃដែលជាជនរងគ្រោះចង់ដាក់ពាក្យបណ្តឹង តែប្រពន្ធឃាត់មិនឲ្យដាក់ពាក្យបណ្តឹងទេ ព្រោះសុទ្ធតែបងប្អូន ហើយធ្វើការ និងស្នាក់នៅជាមួយគ្នាទៀត ប៉ុន្តែបុរសជាប្តីមិនស្តាប់ទេ បាននិយាយថា លែងគ្នាក៏លែងចុះគាត់ត្រូវតែប្តឹង ប្រពន្ធក៏បានតបថា ប្តឹងក៏ប្តឹងទៅគាត់លក់ទ្រព្យសម្បត្តិជួយបងប្រុសរបស់គាត់ហើយ ៕
ចែករំលែកព័តមាននេះ