ខេត្តសៀមរាប ៖ កម្លាំងសមត្ថកិច្ចចំរុះ រួមមានជំនាញរដ្ឋបាលព្រៃឈើ អាជ្ញាធរមូលដ្ឋាន ក្រោមការដឹកនាំផ្ទាល់ដោយលោក សំរិទ្ធ សុខុន ព្រះរាជអាជ្ញារងអមសាលាដំបូងខេត្តបានចុះធ្វើការដកហូតឆ្អឹង ស្នែង ក្រពះសត្វព្រៃមួយចំនួននៅលំនៅឋានមួយកន្លែង កាលពីវេលាម៉ោង២ និង៣០នាទីរសៀល ថ្ងៃទី២៦ ធ្នូ ២០១៤ ស្ថិតនៅក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ដើម្បីយកមកធ្វើការផាកពិន័យ។
ករណីនេះត្រូវបានសមត្ថកិច្ចប្រាប់ឲ្យដឹងនៅរសៀលថ្ងៃទី០២ មករា ២០១៥ថា លំនៅឋានខាងលើនេះ សមត្ថកិច្ចធ្លាប់បានធ្វើការផាកពិន័យម្តងរួចហើយពីបទធ្វើពាណិជ្ជកម្មសំណាកសត្វព្រៃខុសច្បាប់។
លោក យឹម ស៊ីវន នាយសង្កាត់រដ្ឋបាលព្រៃឈើសៀមរាប បានមានប្រសាសន៍តាមទូរស័ព្ទនៅរសៀលថ្ងៃទី០២ មករា ២០១៥ នេះថា ការចុះទៅដកហូតសំណាកសត្វព្រៃនេះមានការដឹកនាំផ្ទាល់ដោយលោក សំរិទ្ធ សុខុន ព្រះរាជអាជ្ញារងអមសាលាដំបូងខេត្ត ព្រមទាំងកម្លាំងជំនាញរដ្ឋបាលព្រៃឈើ និងអាជ្ញាធរមូលដ្ឋាន ឈានដល់ការដកហូតបាននូវវត្ថុតាងមួយចំនួនរួមមាន ឆ្អឹងសត្វតេះចំនួន៦គីឡូក្រាម, ស្នែងសត្វប្រើសចំនួន១គូរ, ស្មៅក្រពះសត្វតេះចំនួន០,៩គីឡូក្រាម។
លោកបន្តថា វត្ថុតាងទាំងអស់នេះត្រូវបានជំនាញដកហូតយកទៅរក្សាទុកនៅផ្នែករដ្ឋបាលព្រៃឈើបន្ទាយស្រី ដើម្បីរៀបចំសំណុំរឿងបញ្ជូនទៅតុលាការចាត់ការទៅតាមផ្លូវច្បាប់ រីឯជនល្មើសឈ្មោះ ទា ម៉ុយហួត ភេទប្រុស អាយុ៥២ឆ្នាំ រស់នៅភូមិឃុំខាងលើ ត្រូវបានចោទពី(បទធ្វើពាណិជ្ជកម្មលើសំណាកសត្វព្រៃ) ព្រមទាំងធ្វើការផាកពិន័យទៅតាមផ្លូវច្បាប់ដើម្បីឱ្យរៀងចាល៕
ចែករំលែកព័តមាននេះ