សមាគម​ហិរញ្ញវត្ថុ​ថា របាយការណ៍​បំណុល​ហិរញ្ញ​ជំរុញ​ចលនា​ចំណាកស្រុក គឺ​មិន​ពិត​ឡើយ


រាជធានី​ភ្នំពេញ ៖ សមាគម​មីក្រូហិរញ្ញវត្ថុ​កម្ពុជា រក​ឃើញ​ថា របាយការណ៍​របស់​អង្គការ​លី​កាដូ​មួយ​ដែល​បាន​ចេញផ្សាយ កាល​ដើមខែ​ឧសភា មាន​ចំណងជើង​ថា «​ការ​នាំ​ឱ្យ​មាន​ចំណាកស្រុក​៖ បទ​ពិសោធន៍​នៃ​ភូមិ​មួយ​អំពី​បំណុល​គ្រឹះស្ថាន​មីក្រូហិរញ្ញវត្ថុ និង​ការ​ចំណាកស្រុក​ឆ្លង​ដែន​» ជា​របាយការណ៍​មិន​ពិត​ឡើយ ។

ឆ្លង​តាម​ការ​ពិនិត្យ​របស់​ការណ៍​របស់​លី​កាដូ សមាគម​ហិរញ្ញវត្ថុ​កម្ពុជា បាន​ចុះ​ស្រា​ជ្រាវ​ដល់​ផ្ទះ​ពលរដ្ឋ​ដែល​បាន​ផ្តល់​បទ​សម្ភាស​ឲ្យ​អង្គការ​លី​កាដូ ដោយ​បាន​ជួប​ជាមួយ​ពលរដ្ឋ និង​អាជ្ញាធរ​ផ្ទាល់ ។ សមា គម​បាន​ជួប​មនុស្ស​ពីរ​នាក់​ដែល​បាន​ផ្តល់​សម្ភាស​ឲ្យ​អង្គការ​លី​កាដូ គឺ​បុរស​ឈ្មោះ ខុន រ៉េ​ត និង​ស្ត្រី​ឈ្មោះ ឈុំ វ៉ា​ន់​ឌី ។ ពលរដ្ឋ​ទាំង​ទាំង​ពីរ​នាក់​នេះ​រស់នៅ​ក្នុងភូមិ​គោក​ស្រុក ឃុំ​ស្រះ​រាំង ស្រុក​មង្គលបុរី ខេត្តបន្ទាយមានជ័យ បាន​ប្រាប់​សមាគម​មីក្រូហិរញ្ញវត្ថុ​ថា ការ​ធ្វើ​ចំណាកស្រុក​ទៅ​រក​ការងារ​ធ្វើ​នៅ​ប្រទេស​ថៃ បាន​ធ្វើ​ឲ្យ​ជីវភាព​ពលរដ្ឋ​រីក​ចម្រើន ហើយ​ការ​ចេញ​ទៅ​រក​ការងារ​ធ្វើ​នៅ​ថ្ងៃ​នោះ គ្មាន​ការ​បង្គាប់ ឬ​បញ្ជា​ឲ្យ​ទៅ ពី​សំណាក់​ម្ចាស់​គ្រឹះស្ថាន​ហិរញ្ញវត្ថុ​ណាមួយ​ឡើយ​។

លោក ខុន រ៉េ​ត ជា​បុរស​ពោះម៉ាយ អាយុប្រមាណ​ជា​ជាង ៦០​ឆ្នាំ និយាយ​ថា គាត់​មិន​ដែល​មានបទពិសោធន៍​ពាក់ព័ន្ធ​ក្នុង​ការ​ខ្ចីប្រាក់​ពី​គ្រឹះស្ថាន​មីក្រូហិរញ្ញវត្ថុ​ណាមួយ​ទេ​។ មេ​ភូមិ​បាន​បញ្ជាក់​ដូច​ការ​អះអាង​របស់ លោក​រ៉េ​ត​ដែរ​។ ប៉ុន្តែ​គាត់​ធ្លាប់​បាន​ខ្ចីប្រាក់ ២៥០០​បាត​មួយ​ដង ពី​អ្នក​ចងការ​ប្រាក់​ឯកជន មុន​ពេល​ដែល​គាត់​ធ្វើ​ចំណាកស្រុក​ក្នុង​អំឡុង​ឆ្នាំ​ជាង​២០០០ ។ លោក​បាន​ពន្យល់​ថា អ្នក​ភូមិ​នេះ ជា​ពិសេស​ប្រជាជន​ដែល​គ្មាន​ដីធ្លី​ស្រែ​ចំការ ហើយ​ធ្វើ​ចំណាកស្រុក​ទៅ​ប្រទេស​ថៃ គឺ​អាច​ធ្វើ​ឱ្យ​ជីវិត​របស់​ពួក​គេ​មាន​ភាព​ប្រសើរ​ឡើង ដោយសារ​តែ​ការងារ​នៅ​ទីនោះ​ជា​ការងារ​មាន​ស្ថេ​រ​ភាព និង​ទទួល​ប្រាក់​ចំណូល​ខ្ពស់ ។

លោក​បាន​និយាយ​ថា វា​មិនមែន​ជា​ការ​ពិត​នោះ​ទេ ពីព្រោះ​ថា ការ​ធ្វើការ​នៅ​ប្រទេស​ថៃ ប្រជាជន​អាច​រក​ប្រាក់​ចំណូល​បាន​ច្រើន ដោយសារ​នៅ​ទីនោះ​មានការ​ងារ​ធ្វើ​ច្រើន​។ កាលពីដើម​ខែឧសភា កន្លង​មកនេះ អង្គការសិទ្ធិមនុស្ស​លី​កាដូ បាន​ចេញ​របាយការណ៍​មួយ​មាន​ចំណងជើង​ថា «​ការ​នាំ​ឱ្យ​មាន​ចំណាកស្រុក​៖ បទ​ពិសោធន៍​នៃ​ភូមិ​មួយ​អំពី​បំណុល​គ្រឹះស្ថាន​មីក្រូហិរញ្ញវត្ថុ និង​ការ​ចំណាកស្រុក​ឆ្លង​ដែន​» ។

អង្គការ​លី​កាដូ​ផ្ដោត​សំខាន់​ទៅ​លើ​ភូមិ​មួយ​នៅ​ក្នុង​ខេត្តបន្ទាយមានជ័យ ដែល តាម​រយៈ​ការ​ធ្វើ​បទ​សម្ភាស​ជាមួយ​សមាជិកគ្រួសារ​ដែល​ស្នាក់​នៅផ្ទះ​ចំនួន​៣០​គ្រួសារ អ្នក​ស្រាវជ្រាវ​របស់​អង្គការ​លី​កាដូ បាន​រក​ឃើញ​ថា ការ​ជាប់ជំពាក់​បំណុល​គ្រឹះស្ថាន​មីក្រូហិរញ្ញវត្ថុ​ច្រើន​លើសលុប គឺជា​កត្តា​ចម្បង​លើកទឹកចិត្ត នាំ​ឱ្យ​មានការ​ធ្វើ​ចំណាកស្រុក​ចេញពី​ភូមិ ។

អ្នក​នាង ណា​លី ពី​ឡូ​ក នាយិកា​អង្គការ​លី​កាដូ បាន​មាន​ប្រសាសន៍​បញ្ជាក់​លើ​របាយការណ៍​នោះ​ថា «​គ្រួសារ​ជា​ច្រើន​បាន​ចាក​ចេញពីផ្ទះ និង​ប្រទេស​កំណើត​របស់​ពួក​គាត់ ដើម្បី​រក​ប្រាក់​សងបំណុល​គ្រឹះស្ថាន​មីក្រូហិរញ្ញវត្ថុ​» ។ អ្នក​នាង​បាន​បន្ត​ទៀត​ថា​៖ «​ពេល​នេះ អតីត​ពលករ​ចំណាកស្រុក​រាប់​សែន​នាក់ មិន​អាច​ធ្វើការ​នៅ​ក្នុង​ប្រទេស​ថៃ​ទៀត​បាន​ទេ ដោយសារ​បញ្ហា​វីរុស​កូ​វី​ដ​១៩ ដូច្នេះ​អង្គការ​លី​កាដូ​សង្ឃឹមថា រាជរដ្ឋាភិបាល និង​គ្រឹះស្ថាន​មីក្រូហិរញ្ញវត្ថុ អាច​ជួយ​អ្នក​ខ្ចីប្រាក់​ទាំងនេះ​ដោយ​ផ្អាក​ការ​សងបំណុល និង​ប្រគល់​ប័ណ្ណកម្មសិទ្ធិ​ដីធ្លី​ជូន​ម្ចាស់ទ្រព្យ​វិញ​» ។

ជាមួយ​ការ​ចុះ​សម្ភាស​ផ្ទាល់ ជាមួយ​ពលរដ្ឋ​និង​អាជ្ញាធរ សមាគម​ហិរញ្ញវត្ថុ​កម្ពុជា នៅ​ថ្ងៃ​ទី​៣ ខែកក្កដា​នេះ បាន​បញ្ជាក់​ថា ស្ថាប័ន​មីក្រូហិរញ្ញវត្ថុ គឺ​ពិតជា​ដៃគូ​ដែល​មិន​អាច​ខ្វះ​បាន​ក្នុង​ការ​ចូលរួម​លើកកម្ពស់​ជីវភាព​រស់នៅ​របស់​អ្នក​ភូមិ ក៏​ដូច​ជា​ការ​អភិវឌ្ឍន៍​សហគមន៍​ដែល​ផ្ទុយ​ពី​របាយការណ៍​របស់​អង្គការ​លី​កាដូ​៕

Facebook Google Twitter Email

Live

Sponsored News

ការស្ទង់មតិគេហទំព័រថ្មី




    សូម​អរគុណ