ខេត្តកំពង់ឆ្នាំង ៖ ជនសង្ស័យចំនួន៣នាក់ ក្នុងនោះមានម្ចាស់ផ្ទះម្នាក់ផង ត្រូវបានកម្លាំងនគរបាលព្រហ្មទណ្ឌកម្រិតស្រាលសហការជាមួយមន្ត្រីនគរបាលមូលដ្ឋានធ្វើការឃាត់ខ្លួនពីបទលួចរថយន្តពីភ្នំពេញកាលពីទៀបភ្លឺថ្ងៃទី២២ ធ្នូ ២០១៤ យកមកលាក់ទុកនៅភូមិកណ្តាល ឃុំស្រែថ្មី ស្រុករលាប្អៀរ ។ ទោះយ៉ាងណាព័ត៌មាននេះ មិនទាន់ត្រូវបានសមត្ថកិច្ចផ្តល់ប្រភពច្បាស់លាស់នៅឡើយទេ ព្រោះកំពុងសាកសួរ ។
ប្រភពពីមន្ត្រីនគរបាលខេត្តបាននិយាយថា នៅវេលាម៉ោងជិត៤ទៀបភ្លឺថ្ងៃទី២២ ធ្នូ ២០១៤ ជនជាតិចិន ស្នាក់នៅរាជធានីភ្នំពេញ ដែលជាអ្នកជួលរថយន្តពីម្ចាស់ដើម បានទូរស័ព្ទទៅប្រាប់ម្ចាស់រថយន្តថា រថយន្តបានបាត់ពីមុខផ្ទះស្នាក់ទៅហើយ ។ ពេលនោះ ម្ចាស់រថយន្តបានបើក GPS ដើម្បីពិនិត្យមើល (ឡានបំពាក់ GPS ) ហើយក៏បានឃើញរថយន្តកំពុងធ្វើដំណើរតាមផ្លូវជាតិលេខ៥ មកប៉ែកខាងលិចនៃរាជធានីភ្នំពេញ ។ ពេលនោះម្ចាស់រថយន្តបានបើករថយន្តតាម ព្រមជាមួយគ្នានោះ បានទាក់ទងជាមួយ នគរបាលខេត្តកំពង់ឆ្នាំងជាប់រហូត ។ លុះម៉ោងប្រមាណជាង៥ភ្លឺ ម្ចាស់រថយន្តបានទូរស័ព្ទប្រាប់មន្ត្រីនគរបាលថា រថយន្តរបស់ខ្លួនបានទៅឈប់នៅទីតាំងមួយកន្លែងនៅក្រោយវត្តភ្នំសន្ទូច ។ បន្ទាប់មកមន្ត្រីនគរបាលមូលដ្ឋាន និងខេត្ត បានសហការគ្នារកតែមិនឃើញ និងមួយសន្ទុះ ក្រោយមកម្ចាស់រថយន្តបានមកដល់ ហើយបានទៅតាមចំណុចបង្ហាញរបស់ GPS ក៏បានប្រទះឃើញរថយន្តនោះលាក់ទុកនៅក្រោយផ្ទះប្រជាពលរដ្ឋម្នាក់ក្នុងភូមិត្រោកកណ្តាល និងឈានដល់ការចាប់ឃាត់ខ្លួនមនុស្ស៣នាក់តែម្តង ។
បើតាមម្ចាស់រថយន្តដែលមិនព្រមផ្តល់អត្តសញ្ញាណបាននិយាយថា រថយន្តរបស់គាត់ម៉ាកកាមរីឆ្លាម ពណ៌ទឹកមាស ពាក់ស្លាកលេខភ្នំពេញ 2G.2500 ។ រថយន្តរបស់គាត់ត្រូវបានដោះស្លាកលេខ ចេញអស់ និងបានកាត់ប្រព័ន្ធខ្យែភ្លើងមួយចំនួនដែលសង្ស័យថា មានចេតនាផ្តាច់ប្រព័ន្ធ GPS ។
ប្រភពពីមន្ត្រីនគរបាលខេត្តបង្ហើបឱ្យដឹងថា ជនសង្ស័យជិះក្នុងរថយន្តលួចយកពីភ្នំពេញ មានគ្នា៣នាក់ ហើយបានឡើងរថយន្តត្រឡប់ទៅភ្នំពេញ ខ្លះមិនដឹងទៅប៉ុន្មាននាក់ទេ តែសល់ម្នាក់ឈ្មោះយ៉ា ដែលសង្ស័យថា ជាអ្នកបើករថយន្ត ត្រូវបានឃាត់ខ្លួនជាមួយនឹងម្ចាស់ផ្ទះឈ្មោះគល់ និងម្នាក់ទៀតមិនស្គាល់អត្តសញ្ញាណ ដែលពេលនេះមន្ត្រីនគរបាលខេត្តសាកសួរមិនទាន់ចប់នៅឡើយ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ