រាជធានីភ្នំពេញ៖ កងកម្លាំងមកពីអង្គភាពចម្រុះចំនួន១០០នាក់ ផ្តើមធ្វើការហ្វឹកហាត់ ដើម្បីបំពេញសមត្ថភាព និងជំនាញ នៅក្នុងការជួយសង្គ្រោះក្នុងឧបទ្វវហេតុនានាដែលអាចនឹងកើតមាននៅលើគោក ក្នុងទឹក និងលើអាកាស។ ក្នុងពិធីបើកវគ្គហ្វឹកហ្វឺន ដែលធ្វើឡើងនៅទីបញ្ជាការដ្ឋានកងពលតូចទ័ពពិសេស…
រាជធានីភ្នំពេញ៖ កងកម្លាំងមកពីអង្គភាពចម្រុះចំនួន១០០នាក់ ផ្តើមធ្វើការហ្វឹកហាត់ ដើម្បីបំពេញសមត្ថភាព និងជំនាញ នៅក្នុងការជួយសង្គ្រោះក្នុងឧបទ្វវហេតុនានាដែលអាចនឹងកើតមាននៅលើគោក ក្នុងទឹក និងលើអាកាស។ ក្នុងពិធីបើកវគ្គហ្វឹកហ្វឺន ដែលធ្វើឡើងនៅទីបញ្ជាការដ្ឋានកងពលតូចទ័ពពិសេស ឆ័ត្រយោង៩១១ នាពព្រឹកថ្ងៃទី២៩ មិថុនានេះ លោក គន់ គីម ប្រធានគណៈកម្មាធិការជាតិគ្រប់គ្រង គ្រោះមហន្តរាយ បានថ្លែងថា ការបើកវគ្គបណ្តុះបណ្តាល និងបំពាក់ឧបករណ៍ សម្ភារបច្ចេកទេស ដល់កងកម្លាំងនាពេលនេះ គឺជាការពង្រឹងសមត្ថភាពក្រុមការងារជួយសង្គ្រោះពេលហេតុការណ៍ គ្រោះមហន្តរាយផ្សេងៗ ដូចជាការបាក់រលំអគារ គ្រោះមហន្តរាយបណ្តាលមកធម្មជាតិ និងឧបទ្វវហេតុផ្សេងៗ។
លោកថា ការបណ្តុះបណ្តាលនេះធ្វើឡើង ដើម្បីបម្រើដល់ប្រតិបត្តិការសង្គ្រោះ ក្នុងឧបទ្ទវហេតុនានា ដែលអាច នឹងកើតមានទាំងលើគោកក្នុងទឹក និងលើអាកាស។ ក្រុមអ្នកសង្គ្រោះដែលចូលវគ្គបណ្តុះបណ្តាលនាពេលនេះ មកពីអង្គភាពចំនួន៦ផ្សេងគ្នា មានកងពលតូចលេខ៧០ ចំនួន១០នាក់ កងពលតូចឆ័ត្រយោងពិសេស ចំនួន ៥០នាក់ កងរាជអាវុធហត្ថលើផ្ទៃប្រទេស ចំនួន១០នាក់ កងវិស្វកម្មអគ្គបញ្ជាការ ចំនួន១០នាក់ កងពលតូចលេខ១ ចំនួន១០នាក់ និងបញ្ជាការដ្ឋានកងទ័ពជើងទឹក ចំនួន១០នាក់។
ការបណ្តុះបណ្តាល មានចំនួនម៉ោង៣៧ម៉ោង និង៣០នាទី ក្នុងរយៈពេល៥ថ្ងៃ ដោយបណ្តុះបណ្តាលទៅលើមូលដ្ឋានគ្រឹះ ស្តីពីការគ្រប់គ្រងគ្រោះមហន្តរាយ យន្តការគ្រប់គ្រងគ្រោះមហន្តរាយ និងតួនាទី និងការទទួលខុសត្រូវ ជំនាញក្នុងការសម្របសម្រួលឆ្លើយតបគ្រោះមហន្តរាយមូលដ្ឋានគ្រឹះនៃប្រព័ន្ធបញ្ជាឧបទ្វវហេតុ ការប៉ាន់ប្រមាណឧបទ្វវហេតុ ប្រព័ន្ធបញ្ជាឧបទ្វវហេតុ និងធនធានសម្ភារ នៅក្នុងប្រព័ន្ធបញ្ជាប្រតិបត្តិការ និងការគ្រប់គ្រងធនធានក្នុងឧបទ្វវហេតុ។
វគ្គបណ្តុះបណ្តាលនេះ បានធ្វើឡើងក្រោយពីកម្ពុជា បានជួបឧបទ្វវហេតុបាក់អគារចំនួនបី នៅចុងឆ្នាំ២០១៩ និងដើមឆ្នាំ២០២០ ដែលក្នុងព្រឹត្តិការណ៍ មិនបានដឹងជាមុនទាំងនោះ ការជួយសង្គ្រោះរបស់កងកម្លាំងកម្ពុជា ត្រូវគេមើលឃើញថាខ្វះជំនាញ និងសម្ភារក្នុងបេសកកម្មជួយសសង្គ្រោះអាយុជីវិតជនរងគ្រោះបន្ទាន់នោះ៕ ដោយ ៖ អ សួស្ដី
ចែករំលែកព័តមាននេះ