រាជធានីភ្នំពេញ ៖ កម្លាំងនគរបាលប៉ុស្តិ៍ព្រៃស បានធ្វើការឃាត់ខ្លួនចោរក្បាលត្រងោលម្នាក់ ក្រោយពេលធ្វើសកម្មភាពលួចម៉ូតូអាកូនទា ១គ្រឿង ដែលជាកម្មសិទ្ធិរបស់យុវជនជនជាតិរុស្ស៊ីម្នាក់ បានសម្រេច ប៉ុន្តែយីអ៊ុនដាក់ ក្រោយពេលលួចបានជិះអត់កើត…
រាជធានីភ្នំពេញ ៖ កម្លាំងនគរបាលប៉ុស្តិ៍ព្រៃស បានធ្វើការឃាត់ខ្លួនចោរក្បាលត្រងោលម្នាក់ ក្រោយពេលធ្វើសកម្មភាពលួចម៉ូតូអាកូនទា ១គ្រឿង ដែលជាកម្មសិទ្ធិរបស់យុវជនជនជាតិរុស្ស៊ីម្នាក់ បានសម្រេច ប៉ុន្តែយីអ៊ុនដាក់ ក្រោយពេលលួចបានជិះអត់កើត ក៏អូសបណ្ដើរតាមផ្លូវ ហើយត្រូវបានកម្លាំងនគរបាល ជិះល្បាតប្រទះឃើញមានការសង្ស័យ ធ្វើការឃាត់ខ្លួនសួរនាំទើបដឹងថា ជាចោរ ក៏ឃាត់ខ្លួនតែម្ដង ។
ហេតុការណ៍នេះបានកាលពីវេលាម៉ោង០២និង១៥នាទីយប់រំលងអធ្រាត្រថ្ងៃទី០៨ ខែតុលា ឆ្នាំ២០២៥ នៅចំណុចផ្ទះជួលលេខA០១ ផ្លូវបេតុងស្ថិតនៅក្នុងបុរីធីវីស្ដារ ភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ។
លោកចោរក្បាលត្រងោលម្នាក់នោះ ឈ្មោះ សុខ ទី អាយុ៣០ឆ្នាំ ជនជាតិខ្មែរ គ្មានមុខរបរ និងទីលំនៅមិនពិតប្រាកដឡើយ ជននេះបានលួចម៉ូតូ១គ្រឿងម៉ាក Honda TODAY (អាកូនទា) ពណ៌ខៀវ ពាក់ស្លាកលេខសៀមរាប1AF-7578 ។ ម៉ូតូនេះ គឺជាកម្មសិទ្ធិរបស់យុវជនម្នាក់
ឈ្មោះ ក្រូត អាទូ អាយុ១៩ឆ្នាំ ជនជាតិរុស្ស៊ី ស្នាក់នៅផ្ទះជួលកើតហេតុខាងលើ ។
សមត្ថកិច្ចបានប្រាប់ឲ្យដឹងថា នៅវេលាយប់រំលងអាធ្រាត្រនោះកម្លាំងកម្លាំងប៉ុស្ដិ៍នគរបាលរដ្ឋបាលព្រៃស បានជិះម៉ូតូល្បាតក្នុងមូលដ្ឋាន ខណៈនោះបានឃើញលោកចោរកំពុងបណ្ដើរម៉ូតូ០១គ្រឿងខាងលើ ។ ដោយមានការសង្ស័យកម្លាំងក៏បានឃាត់ដើម្បីសួរនាំតាមជំនាញ ហើយជនសង្ស័យក៏ប្រាប់ថា ម៉ូតូដែលកំពុងបណ្ដើរនេះខ្លួនបានលួចពីចំណុចផ្ទះលេខA01 ផ្លូវបេតុង បុរីធីវីស្ដារ ភូមិប្រការ សង្កាត់ព្រៃស ខណ្ឌដង្កោ ។
សមត្ថកិច្ចបានប្រាប់ឲ្យដឹងបន្តថា បន្ទាប់មកនគរបាលបាននាំយកជនសង្ស័យ និងម៉ូតូនោះទៅកាន់ប៉ុស្តិ៍ព្រៃស ធ្វើការសាកសួរបន្ថែម ព្រមទាំងស្រាវជ្រាវរកជនរងគ្រោះ ដែលជាម្ចាស់ម៉ូតូឲ្យទៅដាក់ពាក្យបណ្ដឹង ដើម្បីចាត់ការជនសង្ស័យតាមផ្លូវច្បាប់ ៕
ចែករំលែកព័តមាននេះ