ខេត្តតាកែវ ៖ តាឃី គឺជាគ្រូសិល្បៈយីកេដ៏ល្បីនៅខេត្តតាកែវ និងចាត់ទុកជាជង្រុកក្បួនខ្នាតសិល្បៈយីកេដែលជាសិល្បៈបុរាណដ៏មានតម្លៃមួយរបស់ជាតិខ្មែរ ។ គាត់បង់ជីវិតទៅច្រើនឆ្នាំហើយ តែបច្ចុប្បន្ននៅសល់កូនចៅបន្តវេនសិល្បៈយីកេ ដូចជាលោកយាយឃី មុំ…
ខេត្តតាកែវ ៖ តាឃី គឺជាគ្រូសិល្បៈយីកេដ៏ល្បីនៅខេត្តតាកែវ និងចាត់ទុកជាជង្រុកក្បួនខ្នាតសិល្បៈយីកេដែលជាសិល្បៈបុរាណដ៏មានតម្លៃមួយរបស់ជាតិខ្មែរ ។ គាត់បង់ជីវិតទៅច្រើនឆ្នាំហើយ តែបច្ចុប្បន្ននៅសល់កូនចៅបន្តវេនសិល្បៈយីកេ ដូចជាលោកយាយឃី មុំ ជាកូន និងអ្នកស្រីឃី សាខន ជាចៅ ព្រមទាំងសិស្សរបស់គាត់លោកយាយយិន យ៉ុន ។ អស់ពីលោកតាឃី ទៅ លោកយាយយ៉ុន ក៏ជាប្រភពក្បួនខ្នាតយីកេដ៏សំខាន់ដែរ ។
កាលពីពេល ថ្មីៗកន្លងមកមន្ត្រីការិយាល័យសិល្បៈទស្សនីយភាពខេត្តតាកែវ បានទៅជួបលោកយាយយ៉ុន ដល់លំនៅដ្ឋាន ។
ដឹកនាំដោយលោកង៉ែត ជុំ អនុប្រធានមន្ទីរវប្បធម៌ និងវិចិត្រសិល្ប:ខេត្តតាកែវ មន្ត្រីការិយាល័យសិល្ប:ទស្សនីយភាពខេត្តមាន លោកស្រីអ៊ាង ច័ន្ទថាវី និងលោកស្រីង៉ែត សុគួន បានទៅស្រាវ ជ្រាវ និងសួរសុខទុក្ខ ក្រុមសិល្ប:ល្ខោនយីកេលោកតាឃីនៅភូមិដក់ពរ ឃុំបឹងត្រាញ់ខាងត្បូង ស្រុកសំរោង ខេត្តតាកែវ ដោយបានជួបជាមួយលោកយាយយិន យ៉ុន ដែលជាសិស្សរបស់លោកតាឃី ហើយត្រូវជាគ្រូក្នុងវង់ល្ខោនយីកេលោកតាឃី ។
នេះបើតាមការផ្សាយឲ្យដឹងពីការិយាល័យសិល្បៈទស្សនីយភាពខេត្តតាកែវ ហើយថានាពេលនោះលោកយាយយ៉ុន បានផ្តល់បទចម្រៀងយីកេ ក្បាច់រាំ និងសម្លេងច្រៀងទាំងស្រុងក្នុងពិធី ហោមរោងយីកេ ព្រមទាំងសៀវភៅរឿងល្ខោនយីកេ ដល់ការិយាល័យសិល្ប:ទស្សនីយភាពខេត្តតាកែវដើម្បីតម្កល់ទុកជាឯកសារសម្រាប់បង្ហាត់បង្រៀនដល់ក្មេងជំនាន់ក្រោយ ។
ស្របពេលនោះលោកអ៊ាង ច័ន្ទថន ប្រធានការិយាល័យសិល្ប:ទស្សនីយភាពបានឧបត្ថម្ភប្រាក់ផ្ទាល់ខ្លួនមួយចំនួនជូនដល់ក្រុមសិល្ប:លោកតាឃីផងដែរ ។
ខេត្តតាកែវជាជង្រុកសិល្បៈយីកេ និងកិត្តិនាមសិល្បៈបុរាណមួយនេះល្បីល្បាញ រហូតមកដល់បច្ចុប្បន្ន ។ ជាក់ស្ដែងទូរទស្សន៍ជាតិបានថតយីកេខេត្តតាកែវផ្សព្វផ្សាយជូនទស្សនិកជនទស្សនា ដូចជារឿងព្រះថោងនាងនាគ រឿងកាកី រឿងព្រះវិធុរបណ្ឌិត និងរឿងសុវណ្ណសាម ជាដើម ៕
ចែករំលែកព័តមាននេះ