រាជធានីភ្នំពេញ ៖ ជំងឺកូវីដ១៩ ដែលបានជះឥទ្ធិពលលើសេដ្ឋកិច្ចប្រជាពលរដ្ឋ ទំនងបានធ្វើឲ្យប៉ះពាល់ដល់ការធ្វើបុណ្យទាន របស់ប្រជាពុទ្ធបរិស័ទផងដែរ។
ភិក្ខុគង្គនៅតាមវត្តមួយចំនួនក្នុងរាជធានីភ្នំពេញ បានឲ្យដឹងថាសកម្មភាពធ្វើបុណ្យទានរបស់ប្រជាពលរដ្ឋ នៅមុនឱកាសពិធីបុណ្យចូលព្រះវស្សានៅឆ្នាំនេះមានការថយចុះជាងរាល់ឆ្នាំ
។
ការនាំទេយ្យទាន និងទៀនព្រះវស្សា ប្រគេនព្រះសង្ឃបានធ្លាក់ចុះ។ ព្រះសង្ឃបានលើកឡើងថា នៅភ្នំពេញសកម្មភាពធ្វើបុណ្យបានថយចុះ ដូច្នេះលោកមានជំនឿថា វត្តអារាមនៅទីជនបទអាចមានប្រជាពលរដ្ឋអញ្ជើញទៅធ្វើបុណ្យទាន កាន់តែតិចជាងនៅភ្នំពេញទៅទៀត ។
លោក សេង សុមុនី អ្នកនាំពាក្យក្រសួងធម្មការ និងសាសនា បានទទួលស្គាល់ថា ការធ្វើបុណ្យទាននៅក្នុងពេលមានជំងឺកូវីដ១៩ រាតត្បាតនេះពិតជាបានធ្លាក់ចុះមែន ។
លោកសុមុនី ថា ការធ្លាក់ចុះដោយសារពិធីបុណ្យសាសានានានាមិនថា សាសនាព្រះពុទ្ធនោះទេ ត្រូវបានហាមការជួបជុំជាបណ្តុះអាសន្ន ដើម្បីទប់ស្កាត់ការឆ្លងរាលដាលជំងឺកូវីដ១៩ ។ ការធ្លាក់ចុះមួយទៀត លោកថា ជំងឺនេះបានធ្វើឲ្យប៉ះពាល់ដល់សេដ្ឋកិច្ចពលរដ្ឋជាសកល ដូច្នេះ នៅពេលខ្វះខាតខាងសេដ្ឋកិច្ច ពលរដ្ឋត្រូវបានរឹតត្បិតការចាយវាយ និងការធ្វើបុណ្យជាមិនខាន ។
ពិធីបុណ្យចូលព្រះវស្សាជា ដែលតែងតែប្រារព្ធធ្វើឡើងជារៀងរាល់ឆ្នាំ ចាប់ពីថ្ងៃ១ រោចខែអាសាធ ដល់ថ្ងៃ១៥កើត ខែអស្សុជ ក្នុងរយៈពេលបីខែ ។ ពិធិបុណ្យចូលព្រះវស្សានៅឆ្នាំនឹងចាប់ផ្តើមប្រារព្ធធ្វើឡើងចាប់ពីទី៦ ខែកក្កដា ខាងមុខតទៅ ។
ជាទម្លាប់មុនដល់ថ្ងៃចូលព្រះវស្សានេះ ប្រជាពុទ្ធបរិស័ទ តែងតែនាំបច្ច័យគ្រឿងបរិភោគឧបភោគ ទៀនព្រះវស្សា ប្រគេនព្រះសង្ឃ តាមទីអារាម ដើម្បីទ្រង់ទ្រដល់សកម្មភាពប្រតិបត្តិធម៌វិន័យរបស់ព្រះសង្ឃ នៅក្នុងរយៈពេលចូលព្រះវស្សាដែលមិនអាចនិមន្តចេញបិណ្ឌបាត្យបាន ។ លោកសេង សុមុនី ថា ព្រះសង្ឃនៅទីជនបទអាចនឹងមានការខ្វះខាត ។
លោកធ្វើការអំពាវនាវដល់ប្រជាពលរដ្ឋបន្តធ្វលបុណ្យតាមទម្លាប់ ដោយគ្រាន់តែប្រកាន់ឲ្យបានខ្ជាប់ខ្ចួននូវវិធានការពាររបស់ក្រសួងសុខា ដូចជា ការមិនជួបជុំមនុស្សច្រើន ត្រូវរក្សាគម្លាត ពាក់ម៉ាសជាដើម ។
មន្ត្រីបញ្ជាក់ថា ព្រះសង្ឃនៅតាមវត្តអារាមនានាបានយល់ដឹងពីវិធីការពារជំងឺកូវីដ១៩នេះ ហើយដែរ ។ ទោះជាកូវីដ១៩ បានរំខានដល់ចេញទៅធ្វើបុណ្យតាមវត្តអារាមខ្លះៗ តែលោក សេង សុមុនី អះអាងគណៈនាយកសង្ឃ និងអាជ្ញាធរគ្រប់ជាន់ថ្នាក់បានយកចិត្តទុកដាក់ យជាខ្លាំងដល់ការទ្រទ្រង់ជីវភាពប្រចាំថ្ងៃរបស់ព្រះសង្ឃនៅតាមទីរាមទូទាំងប្រទេសមិនឲ្យខ្វះចង្វាន់នោះឡើយ ៕
ចែករំលែកព័តមាននេះ