ក្នុងកិច្ចប្រជុំរបស់ខ្លួនមួយកាលពីពេលថ្មីៗកន្លងទៅនេះ គណៈកម្មាធិការអូឡាំពិកអន្តរជាតិហៅកាត់ IOC បានសម្រេចចាយប្រាក់២០លានដុល្លារអាមេរិកបន្ថែមទៀតដើម្បីអនុវត្តឱ្យជោគជ័យនូវយុទ្ធនាការប្រឆាំងនឹងការប្រើប្រាស់សារធាតុញៀន ក៏ដូចជាការកែប្រែលទ្ធផលប្រកួត ។ សារធាតុញៀន និងការ
ក្នុងកិច្ចប្រជុំរបស់ខ្លួនមួយកាលពីពេលថ្មីៗកន្លងទៅនេះ គណៈកម្មាធិការអូឡាំពិកអន្តរជាតិហៅកាត់ IOC បានសម្រេចចាយប្រាក់២០លានដុល្លារអាមេរិកបន្ថែមទៀតដើម្បីអនុវត្តឱ្យជោគជ័យនូវយុទ្ធនាការប្រឆាំងនឹងការប្រើប្រាស់សារធាតុញៀន ក៏ដូចជាការកែប្រែលទ្ធផលប្រកួត ។ សារធាតុញៀន និងការកែប្រែលទ្ធផលប្រកួត គឺជាការគំរាមកំហែងដ៏ធំដែលប៉ះពាល់យ៉ាងធ្ងន់ធ្ងរដល់កិត្តិយស ក៏ដូចជាទំនុកចិត្តមកលើព្រឹត្តិការណ៍ប្រកួតអូឡាំពិក ។
ប្រធានថ្មីរបស់ IOC លោក Thomas Bach បានឱ្យដឹងថា គម្រោងមូលនិធិថ្មីនេះបានកើតចេញបន្ទាប់ពីមានការប្រជុំពិគ្រោះយោបល់ដ៏កម្រមានមួយរបស់ក្រុមប្រឹក្សាប្រតិបត្តិរយៈពេល៤ថ្ងៃ ដែលផ្តោតសំខាន់ទៅលើបញ្ហាជាគន្លឹះសម្រាប់អនាគតអូឡាំពិក ។ សម្រាប់លោក Bach លទ្ធផលការប្រជុំលើកនេះ គឺជាការបោះជំហានមួយក្នុងផែនការដែលលោកហៅថា «របៀបវារៈអូឡាំពិកឆ្នាំ២០២០» ។
លោកបានថ្លែងថា កញ្ចប់មូលនិធិមានទឹកប្រាក់១០លានដុល្លារ គឺមានគោលដៅចំណាយលើកិច្ចការស្រាវជ្រាវកែលំអ និងបង្កើតបច្ចេកវិទ្យាថ្មីចាប់អត្តពលិកដែលប្រើប្រាស់សារធាតុហាមឃាត់ ។ ក្នុងគម្រោងនេះ IOC ក៏មានបំណងសុំឱ្យរដ្ឋាភិបាលសាមី ក៏ដូចជាភ្នាក់ងារប្រឆាំងសារធាតុញៀនពិភពលោក (WADA) ចូលរួមចំណែកផងដែរ ។
ឯទឹកប្រាក់១០លានដុល្លារផ្សេងទៀត នឹងត្រូវចំណាយលើគម្រោងទប់ស្កាត់បណ្តាអត្តពលិកស្អាតស្អំមិនឱ្យជាប់ពាក់ព័ន្ធក្នុងអំពើពុករលួយ ការភ្នាល់មិនស្របច្បាប់ ក៏ដូចជាធ្លាក់ចូលការបោកប្រាស់របស់ជនទុច្ចរិត ។
កាលដើមឆ្នាំ២០១៤នេះ IOC បានចុះហត្ថលេខាលើអនុស្សរណៈយោគយល់គ្នាមួយជាមួយភ្នាក់ងារប៉ូលិសអន្តរជាតិ Interpol និងព្រមទាំងដាក់ចេញនូវកម្មវិធីត្រួតពិនិត្យពិសេសមួយឈ្មោះថា ៖ «ប្រព័ន្ធតាមដានការភ្នាល់ IBIS» ដើម្បីពិនិត្យមើលភាពមិនប្រក្រតីអំឡុងការប្រកួតអូឡាំពិក ។ លោក Bach បាននិយាយថា គណៈកម្មាធិការ IOC ចង់ស្វែងយល់បន្ថែមថា ក្រៅពីការធ្វើតេស្តទឹកនោម និងឈាម តើមានវិធីសាស្ត្រណាមួយផ្សេងដែលមានប្រសិទ្ធភាពជាងនេះទេ ។ លោកបន្ថែមថា ៖ «វាពិតជាអាចជួយបានយ៉ាងច្រើន ប្រសិនជាមានវិធីសាស្ត្រធ្វើតេស្តថ្មីផ្សេងពីនេះដែលនាំឱ្យយើងរកឃើញសារធាតុញៀនប្រើក្នុងពេលកន្លងមកយ៉ាងយូរ។ នេះគឺជាចំណុចសំខាន់ដែលយើងចង់បង្ហាញជាពិសេសនៅពេលនេះ» ៕
ចែករំលែកព័តមាននេះ