ខណៈដែលកូវីដ១៩ បានធ្វើអោយមានផលប៉ះពាល់ដល់សេដ្ឋកិច្ចពិភពលោកបន្ថែមលោកការឆក់យកជីវិតមនុស្សជិតកន្លះលាននាក់ និងចម្លងដល់មនុស្សជិត៩លាននាក់នោះ វានឹងបង្កផលប៉ះពាល់ធ្ងន់ធ្ងរជាងគេដល់អ្នកក្រីក្រកម្ពុជា និងពិភពលោក។
ដោយពឹងផ្អែកលើប្រាក់ចំណូលបានមួយថ្ងៃរស់មួយថ្ងៃនោះ អ្នកក្រីក្រជាច្រើនត្រូវបានទម្លាក់ក្នុងស្ថានភាពជីវភាពលំបាកកាន់តែខ្លាំង ដោយខ្លះត្រូវបាត់បង់ការងារ ខ្លះបាត់បង់មុខរបរជាដើម។
វីរុសកូវីដ១៩ គឺជាវិបត្តិមួយដែលពិភពលោកមិនធ្លាប់បានប្រឈមមុខក្នុងប៉ុន្មានទសវត្សថ្មីៗនេះ ទាក់ទងនឹងផលប៉ះពាល់សេដ្ឋកិច្ច និងសង្គមដែលអាចកើតមានយ៉ាងធ្ងន់សម្បើម។ វាមានភាពធ្ងន់ធ្ងរខ្លាំងហួសប្រមាណ។
ធនាគារពិភពលោកប៉ាន់ស្មានថា រោគរាតត្បាតអាចទម្លាក់ប្រជាជនប្រមាណ ៤៩ លាននាក់ ឲ្យធ្លាក់ចូលក្នុងភាពក្រីក្រខ្លាំងនៅឆ្នាំ ២០២០ ។
មួយភាគធំនៃអ្នកក្រថ្មីនឹងត្រូវបានប្រមូលផ្តុំនៅក្នុងប្រទេសដែលកំពុងតស៊ូ ស្រាប់នឹងអត្រាភាពក្រីក្រខ្ពស់ ប៉ុន្តែប្រទេសដែលមានប្រាក់ចំណូលមធ្យមក៏នឹងរងផលប៉ះពាល់ផងដែរ។ ស្ទើរតែពាក់កណ្តាលនៃប្រជាជនក្រីក្រថ្មីដែលបានព្យាករណ៍ (២៣ លាននាក់) នឹងស្ថិតនៅក្នុងអនុតំបន់សាហារ៉ាអាហ្វ្រិកដោយមានចំនួន ១៦ លាននាក់បន្ថែមទៀតនៅអាស៊ីខាងត្បូង។
ចំនួនអ្នកក្រខ្លាំងបំផុតនៅក្នុងប្រទេសក្រីក្របំផុត ត្រូវបានព្យាករណ៍ថា នឹងកើនឡើងចំនួន ១៧ លាននាក់។ ទន្ទឹមនឹងនេះ ប្រជាជនក្រីក្រចំនួន ២២ លាននាក់ ដែលត្រូវ បានគេព្យាករថា នឹងស្ថិតនៅក្នុងប្រទេសដែលមានប្រាក់ចំណូលមធ្យម។ គេរំពឹងថា នឹងមានប្រជាជនក្រីក្រថ្មីចំនួន ១០ លាននាក់នៅក្នុងសេដ្ឋកិច្ចដែលងាយរងគ្រោះ និងមានជម្លោះ។
ចំណែកនៅប្រទេសកម្ពុជាវិញ ការឈឺចាប់បានវាយលុកចូលដល់ប្រជាជនក្រីក្រ បំផុតរួចទៅហើយ។ ការបាត់បង់ការងារធ្វើ និងមុខរបរ បានកើតមានក្នុងចំណោមកម្មករកាត់ដេរ កម្មករ ធ្វើការនៅក្រៅប្រទេស ពិសេសប្រទេសថៃ អ្នកបម្រើការងារតាមភោជនីយដ្ឋាន ក្លឹបកម្សាន្ត សណ្ឋាគារ ផ្ទះសំណាក់ និងអ្នកប្រកបរបរ និងអ្នកធ្វើការទាក់ទងនឹងផ្នែកទេសចរណ៍ផ្សេងទៀត។ រឿងដែលអាក្រក់ជាងនេះ គឺក្រុមគ្រួសាររបស់ពួកគេនៅ ឯជនបទពឹងផ្អែក ទៅលើប្រាក់ដែលពួកគេបញ្ជូនទៅផ្គត់ផ្គង់។ ដូច្នេះ វានឹងជានឹងធ្វើអោយស្ថានភាព នៃភាពក្រីក្ររបស់ក្រុមគ្រួសារគេនឹងកាន់តែយ៉ាប់យឺន បន្ថែមទៀត។
គិតត្រឹមថ្ងៃបញ្ចប់នៃការអនុវត្តនីតិវិធីអត្តសញ្ញាណកម្មគ្រួសារក្រីក្រក្នុងអំឡុងពេលនៃការរីករាលដាលជំងឺកូវីដ១៩ នៅជនបទនោះ គឺមានអ្នកក្រីក្រជាង២,៣លាននាក់ ឬជាង៥៦៧៥០០នាក់នៅទូទាំងប្រទេស។
នេះជាចំនួនមួយដ៏ច្រើននឹងជាបន្ទុកដ៏ធំសម្រាប់រដ្ឋាភិបាលផលដែរក្នុងការជួយដល់ពួកគេ។
រដ្ឋាភិបាលបានកំពុងរិះរកគ្រប់វិធី ដើម្បីជួយដល់ប្រជាជនក្រីក្រ និងជនរងគ្រោះដោយសារកូវីដ១៩នេះ។
ប្រមុខដឹកនាំកម្ពុជា បានឲ្យដឹងថា រដ្ឋាភិបាលនឹងប្រកាស កម្មវិធីឧបត្ថម្ភសាច់ប្រាក់ ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩ នៅថ្ងៃទី ២៤ មិថុនា។
តាមហ្វេសប៊ុកផេកផ្ទាល់ខ្លួនសម្តេចតេជោ ហ៊ុន សែនបាន លើកឡើងថា «ទោះបីខ្ញុំ មិនបានចុះទៅជួបបងប្អូនកូនក្មួយដោយផ្ទាល់នៅតាមមូលដ្ឋាន ឬតាមរោងចក្រ សហគ្រាសនានា ប៉ុន្តែសេចក្តីនឹករឮករបស់ខ្ញុំតែងតែដក់ជាប់នឹក គិតដល់បងប្អូនជនរួមជាតិគ្រប់ៗគ្នាជានិច្ច»។
សម្តេចបញ្ជាក់ថា «នៅថ្ងៃពុធ ទី២៤ មិថុនា ខាងមុខនេះ យើងនឹងប្រកាសដាក់អោយ ប្រើប្រាស់ជាផ្លូវការនូវ កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុង អំឡុងពេលប្រយុទ្ធនឹងជំងឺកូវីដ-១៩» ។
សម្តេចតេជោ ហ៊ុន សែន បានមានប្រសាសន៍បន្តថា «ពិតណាស់ក្នុងស្ថានការដែលជំងឺឆ្លងកូវីដ-១៩ កំពុងរាតត្បាតនៅទូទាំងពិភពលោក គឺបានធ្វើអោយប៉ះពាល់យ៉ាងខ្លាំង មកលើសេដ្ឋកិច្ចជាតិយើងផងដែរ។ ទន្ទឹមនឹងនោះ បងប្អូនកូនក្មួយមួយចំនួន ត្រូវបានផ្អាកការងារ ជាពិសេសបងប្អូនប្រជាពលរដ្ឋក្រីក្រនៅតាមជនបទដាច់ស្រយាល មួយចំនួនក៏កំពុងជួបប្រទះការខ្វះខាតម្ហូបអាហារ។ រាជរដ្ឋាភិបាលកម្ពុជាបានខិតខំរិះ រកវិធីនានាដែលអាចធ្វើបានដើម្បីជួយបងប្អូនប្រជាពលរដ្ឋក្រីក្រក្នុងស្ថានភាពចាំបាច់នេះ»។
ចំណែកយោងទៅតាមអនុក្រិតនោះ ជនក្រីក្រនឹងទទួលបានការឧបត្ថម្ភ ជាសាច់ប្រាក់ ចំនួនម្នាក់ពី១៦០០០រៀល ឬប្រហែល៤ដុល្លារទៅ១២០ ០០០ រៀល ឬប្រហែល៣០ដុល្លារទៅតាមស្ថានភាពខុសគ្នានៃជនក្រីក្រ និងងាយរងគ្រោះម្នាក់ៗ។
ចែករំលែកព័តមាននេះ