រាជធានីភ្នំពេញ ៖ ការធ្លាក់ចុះសេដ្ឋកិច្ចជាតិដល់កម្រិត -១,៩% នៅឆ្នាំ២០២០ ដោយសារការវាយប្រហាររបស់ជំងឺកូវីដ១៩នោះ បានបង្ខំឲ្យរដ្ឋាភិបាលមាន «គម្រោងមិនធ្វើការដំឡើងប្រាក់បៀវត្សឲ្យមន្ត្រីរាជការនៅឆ្នាំ២០២១» ខាងមុខនេះទេ ។…
រាជធានីភ្នំពេញ ៖ ការធ្លាក់ចុះសេដ្ឋកិច្ចជាតិដល់កម្រិត -១,៩% នៅឆ្នាំ២០២០ ដោយសារការវាយប្រហាររបស់ជំងឺកូវីដ១៩នោះ បានបង្ខំឲ្យរដ្ឋាភិបាលមាន «គម្រោងមិនធ្វើការដំឡើងប្រាក់បៀវត្សឲ្យមន្ត្រីរាជការនៅឆ្នាំ២០២១» ខាងមុខនេះទេ ។
លោក មាស សុខសេនសាន្ត អ្នកនាំពាក្យក្រសួងសេដ្ឋកិច្ច បានឲ្យដឹងថា ការដំឡើងប្រាក់បៀវត្សមន្ត្រីរាជការ នៅឆ្នាំ២០២១ ទំនងមិនអាចធ្វើបានទេ ចំណែកឆ្នាំ២០២២ ឬឆ្នាំបន្តទៀតអាស្រ័យលើស្ថានភាពធូរស្រាលសេដ្ឋកិច្ចពីជំងឺកូវីដ១៩ ។ កម្ពុជាមានមន្ត្រីរាជការស៊ីវិលប្រមាណ២០ម៉ឺននាក់ ។ ឆ្នាំ២០២១ ក្រៅពីគ្រោងមិនដំឡើងប្រាក់ខែហើយ ការជ្រើសរើសមន្ត្រីថ្មីក៏មិនត្រូវអនុញ្ញាតដែរ ។ ការជ្រើសរើសមន្ត្រីថ្មី អាចធ្វើបានត្រឹមចំនួនមួយទៅជំនួសមន្ត្រីដែលត្រូវចូលនិវត្តប៉ុណ្ណោះ ។
លោក មាស សុខសាន្តថា ការចំណាយសម្រាប់ប្រាក់បៀវត្សមន្ត្រីរាជការមានប្រមាណ៤៩%នៃការចំណាយសរុបរបស់ជាតិប្រចាំឆ្នាំ ។ មន្ត្រីរាជការមានប្រាក់បៀវត្សជាមធ្យមជាង១លានរៀល ។ នៅក្នុងរយៈពេលប៉ុន្មានឆ្នាំចុងក្រោយនេះ មន្ត្រីរាជការទទួលបានការដំឡើងប្រាក់បៀវត្សក្នុង១ឆ្នាំ២ដង ម្តងនៅខែមករា និងម្តងនៅខែមេសា ។
លោក ប៉ិច ពិសី នាយកប្រតិបត្តិអង្គការតម្លាភាពកម្ពុជា បានសម្តែងការព្រួយបារម្ភចំពោះការមិនដំឡើងប្រាក់បៀវត្សឲ្យមន្ត្រីរាជការ នៅឆ្នាំ២០២១នោះ ។ សម្រាប់លោកពិធីការមិនដំឡើងប្រាក់ខែអាចធ្វើឲ្យប៉ះពាល់ដល់ជីវភាពមន្ត្រីរាជការ ប៉ះពាល់ដល់ប្រសិទ្ធភាពការងាររដ្ឋ និងអាចបង្កឲ្យមានអំពើពុករលួយខ្នាតតូចៗច្រើននៅតាមស្ថាប័នរដ្ឋ ។
នាយកប្រតិបត្តិអង្គការតម្លាភាពកម្ពុជាបញ្ជាក់ថា«នៅពេលប្រាក់ខែមិនដំឡើងហើយ មានអតិផរណាទីផ្សារខ្ពស់ពីជាង២% រហូតដល់៧%នោះ មន្ត្រីរាជាការពិបាករស់ណាស់ ។ សាលារៀនកូនឡើងថ្លៃ ទំនិញគ្រប់មុខឡើងថ្លៃ ចំណែកប្រាក់ខែមិនឡើងពេលនេះគាត់នឹងចេញទៅធ្វើការក្រៅពីការងាររដ្ឋ ដែលធ្វើប្រសិទ្ធិភាពការងាររដ្ឋធ្លាក់ចុះ ។ ម្យ៉ាងទៀតយើងបារម្ភចំពោះអំពើរពុករលួយខ្នាតតូច អាចនឹងកើតមានឡើងច្រើន«។
លោក មាស សុខសេនសាន្តថា ការធ្លាក់ចុះកំណើនសេដ្ឋកិច្ចជាទូទៅមិនប៉ះពាល់អ្វីធ្ងន់ធ្ងរដល់សេដ្ឋកិច្ចកម្ពុជានោះទេ ដោយសាររដ្ឋាភិបាលមានការប្រុងប្រយ័ត្ន និងត្រៀមទុកជាមុន ។ លោកបានអះអាងថាបើករណីធ្ងន់ធ្ងររដ្ឋាភិបាលនឹងចាក់បញ្ចូលថវិការដ្ឋដែលសន្សំទុកទៅក្នុងសេដ្ឋកិច្ចជាតិ ។
មន្ត្រីអះអាងថា ការធ្លាក់ចុះសេដ្ឋកិច្ចនេះមិនធ្វើឲ្យប៉ះពាល់ដល់ជីវភាពមន្ត្រីរាជការឡើយ ។ មិនប៉ះពាល់ដោយសារមន្ត្រីទទួលបានប្រាក់បៀវត្សជាធម្មតា គ្រាន់តែមិនបានដំឡើងប៉ុណ្ណោះ ។ ទាំងរាជរដ្ឋាភិបាល និងស្ថាប័នសេដ្ឋកិច្ចអន្តរជាតិបានព្យាករណ៍ពីការធ្លាក់ចុះដ៏អាក្រក់នៃសេដ្ឋកិច្ចកម្ពុជា នៅក្នុងឆ្នាំ២០២០នេះ ដោយសារផលប៉ះពាល់ពីវិបត្តិកូវីដ១៩ ទៅលើដង្ហើមសេដ្ឋកិច្ចសំខាន់របស់កម្ពុជាដូចជា វិស័យទេសចរណ៍ ឧស្សាហកម្ម និងកសិកម្ម ។
ការធ្លាក់ចុះសេដ្ឋកិច្ចមិនធ្លាប់មានតាំងពីឆ្នាំ១៩៩៤មក បានធ្វើឲ្យរដ្ឋាភិបាលកម្ពុជាគ្រោងកាត់បន្ថយការចំណាយជិត៥០% លើវិស័យជាច្រើនក្នុងឆ្នាំ២០២១ ។ តាមផែនការយុទ្ធសាស្ត្រថវិកាជាតិឆ្នាំ២០២១-២០២៣ រដ្ឋគ្រោងកាត់ចំណាយនានាឲ្យទាបជាងឆ្នាំ២០២០ក្នុងនោះវិស័យរដ្ឋបាលទូទៅកាត់បន្ថយជាង៦%ធៀបចំណាយឆ្នាំ២០២០ វិស័យការពារជាតិកាត់បន្ថយជិត៤% វិស័យសង្គមកិច្ចកាត់បន្ថយជាង១១% ហើយវិស័យសេដ្ឋកិច្ចកាត់បន្ថយជាង ៥%៕
ចែករំលែកព័តមាននេះ