រាជធានីភ្នំពេញ ៖ ឈាន ហុង មកពីក្លិបខ្លារខិនមានរិទ្ធ ត្រូវបានគេរៀបចំឱ្យជួបប្រកួតជាមួយឡុង សំណាង មកពីក្លិបសាលវ័ន្តកីឡានៅលើសង្វៀនស៊ីអិនស៊ី នាថ្ងៃសៅរ៍ទី២០ មិថុនា…
រាជធានីភ្នំពេញ ៖ ឈាន ហុង មកពីក្លិបខ្លារខិនមានរិទ្ធ ត្រូវបានគេរៀបចំឱ្យជួបប្រកួតជាមួយឡុង សំណាង មកពីក្លិបសាលវ័ន្តកីឡានៅលើសង្វៀនស៊ីអិនស៊ី នាថ្ងៃសៅរ៍ទី២០ មិថុនា ដើម្បីជម្រះបញ្ជីចាស់ដែលឈាន ហុង បានចាញ់ចំនួន២លើកជាប់គ្នា។
ក្នុងជំនួបលើកទី៣នេះ គេមិនទាន់ដឹងថាឈាន ហុង មានឱកាសស្ដារមុខមាត់បានវិញឬអត់នោះទេ ។ ទោះជាយ៉ាងណា សម្រាប់អ្នកតាមដានការប្រកួតភាគច្រើនអះអាងថា បើនិយាយពីបច្ចេកទេសប្រកួតឈាន ហុងក៏មិនជាអន់ប៉ុន្មានដែរ ប៉ុន្តចំពោះកម្លាំងស៊ុហ្វវិញគឺមិនអាចទៅរួចជាមួយឡុង សំណាង ដែលជាអ្នកប្រដាល់ជំនាន់ក្រោយនោះទេ ។
ការប្រកួតពីរលើកមុនឈាន ហុងពិតជាធ្វើបានល្អណាស់ ជាពិសេសផ្លែកែងនិងជង្គង់របស់គេបានធ្វើឱ្យឡុង សំណាង តក់ស្លុតមិនតិចទេ ទោះបីចុងក្រោយគេចាញ់ពិន្ទុទាំងប្រផិតប្រផើយដោយសារតែចាញ់កម្លាំងនៅចុងទឹកទី៤និងទី៥ប៉ុណ្ណោះ ។ រីឯអ្នកគាំទ្រមួយចំនួនក៏ចង់ឃើញឈាន ហុង ឈ្នះការប្រកួតលើកនេះដែរ តែសំខាន់មិនដឹងថាអ្នកប្រដាល់មកពីក្លិបខ្លារខិនមានរិទ្ធម្នាក់នេះធ្វើបានសម្រេចឬអត់នោះទេ។
ផាន រះ មកពីក្លិបជ័យសែនជ័យខេត្តកំពង់ស្ពឺ ត្រូវបានគេរៀបចំឱ្យប៉ះជាមួយរិន សារ័ត្ន មកពីក្លិបខេត្តព្រៃវែងជាលើកដំបូង ។ ផាន រះ និងរិន សារ័ត្ន ប៉ុន្មានឆ្នាំមុនក៏ជាអ្នកប្រដាល់ជើងខ្លាំងពិបាករកដៃគូប្រកួតម្នាក់ដែរ ប៉ុន្តែក្រោយពីបាត់មុខពីលើសង្វៀនមួយរយៈមកនេះ ថ្វីដៃប្រកួតរបស់គេរាងធ្លាក់ចុះបន្តិច ។
ទោះជាយ៉ាងណាល្បិចប្រយុទ្ធរបស់គេនៅតែល្អដដែលអន់តែកម្លាំងប៉ុណ្ណោះ ដោយសារតែការហ្វឹកហាត់មិនបានដិតដល់ ។ សម្រាប់ការប្រកួតលើកនេះគេមិនហ៊ានអះអាងថាអ្នកណាខ្លាំងឬខ្សោយនោះទេ ព្រោះអីជាការជួបគ្នាលើកដំបូង និងទើបតែឈានជើងឡើងសង្វៀនដូចគ្នា៕ (កែសម្រួលដោយ ៖ បុប្ផា)
ចែករំលែកព័តមាននេះ