អាជ្ញាធរកូវ៉ែតត្រៀមដោះស្រាយបញ្ហាស្ទះចរាចរណ៍នៅក្នុងប្រទេសដោយកាត់បន្ថយការចេញប័ណ្ណបើកបរដល់ជនបទេស ។ តាមរបាយការណ៍ពីភ្នាក់ងារព័ត៌មានបរទេសចេញផ្សាយថា ចាប់តាំងពីដើមឆ្នាំ២០១៥នេះ តទៅជនបរទេសដែលមានសិទ្ធិសុំប័ណ្ណបើកបររថយន្តរួមទាំងយានយន្តគ្រប់ប្រភេទត្រូវជាបុគ្គលចូលស្រុកស្របច្បាប់ ស្នាក់នៅក្នុងប្រទេសកូវ៉ែតរយៈពេល២ឆ្នាំឡើងទៅរួមទាំងបានបញ្ចប់ការសិក្សាថ្នាក់ឧត្តម និងមានចំណូលមិនតិចជាង២០៦០ដុល្លារក្នុងមួយខែ ។
លោកឧត្តមសេនីយ៍ឯកអាប់ឌុលឡា មេហានណា ជាមន្ត្រីជាន់ខ្ពស់ផ្នែកទេសចរណ៍នៅក្រសួងមហាផ្ទៃកូវ៉ែតបានបង្ហើបឱ្យដឹងថា បទដ្ឋានខាងលើគឺចង់ដោះស្រាយបញ្ហាចរាចរណ៍ដែលមានការកកស្ទុះអស់រយៈពេលជាច្រើនឆ្នាំមក
ហើយ ។ លើសពីនេះក៏ជួយគ្រប់គ្រងដល់យានយន្តលើដងផ្លូវមិនឱ្យមានចំនួនច្រើនហួសកំណត់ ។
តាមរបាយការណ៍ពីកាសែត«កូវ៉ែតថែម»បញ្ជាក់ថា ច្បាប់ថ្មីដែលគ្រោងដាក់ឱ្យប្រើនេះនឹងលើកលែងដល់ជនបរទេសទាំងឡាយណាដែលបំពេញការងារផ្សេងៗដូចជា មន្ត្រីផ្នែកកាទូត កីឡាករអាជីព គ្រូបង្វឹក អ្នកសារព័ត៌មាន វេជ្ជបណ្ឌិត សាស្ត្រាចារ្យក្នុងមហាវិទ្យាល័យ ឱសថការី វិស្វករ អ្នកស្រាវជ្រាវ និងអ្នកបកប្រែ ដោយជនបរទេសក្នុងកូវ៉ែតដែលមានជំនាញទាំងនេះអាចសុំលិខិតបើកបរបានជាធម្មតា និងគ្មានផលប៉ះពាល់អ្វីមួយលើបទដ្ឋានខាងលើឡើយ ។
កាលពីខែមេសាកន្លងមករដ្ឋាភិបាលរបស់ប្រទេសជិតខាងដូចជាប្រទេសកាតាជាដើមបានប្រកាសផ្អាកការចេញប័ណ្ណបើកបររថយន្តដល់ជនបរទេសក្នុងបំណងជួយដោះស្រាយការកកស្ទុះចរាចរណ៍នៅក្នុងប្រទេស និងចាត់ទុកថាជាការក្សាសិទ្ធិដល់ការប្រើរថយន្តលើដងផ្លូវសម្រាប់តែជនជាតិកាតា ។
តាមទិន្នន័យរបស់រដ្ឋាភិបាលកាតាបញ្ជាក់ថា បច្ចុប្បន្នមានតំបន់ជួបវិបត្តិលើបញ្ហាចរាចរណ៍ដ៏អាក្រក់បំផុតនៅក្នុងប្រទេសមានចំនួន១៣៨កន្លែងក្នុងនោះរួមមានផ្លូវឆ្ពោះទៅអាកាសយានដ្ឋានអន្តរជាតិក្រុងដូហាផងដែរ ៕
ចែករំលែកព័តមាននេះ