ទីក្រុងហាណូយ ៖ បុរសជនជាតិវៀតណាមវ័យ៥៩ឆ្នាំម្នាក់ ស្ទើរតែស្លាប់បាត់បង់ជីវិតទៅហើយ បន្ទាប់ពីឆ្លងមេរោគ «Vibrio vulnificus» ដែលត្រូវបានស្គាល់យ៉ាងច្បាស់ថាជាពពួកបាក់តេរីស៊ីសាច់ដ៏កម្រពីទឹកសមុទ្រ ដែលជំរុញឱ្យគ្រូពេទ្យចេញការព្រមានអ្នកទេសចរកម្សាន្តនៅតាមឆ្នេរសមុទ្រឱ្យមានការប្រុងប្រយ័ត្នខ្ពស់នៅរដូវក្តៅនេះ។ យោងតាមសេចក្តីរាយការណ៍ពីសារព័ត៌មានវៀតណាម…
ទីក្រុងហាណូយ ៖ បុរសជនជាតិវៀតណាមវ័យ៥៩ឆ្នាំម្នាក់ ស្ទើរតែស្លាប់បាត់បង់ជីវិតទៅហើយ បន្ទាប់ពីឆ្លងមេរោគ «Vibrio vulnificus» ដែលត្រូវបានស្គាល់យ៉ាងច្បាស់ថាជាពពួកបាក់តេរីស៊ីសាច់ដ៏កម្រពីទឹកសមុទ្រ ដែលជំរុញឱ្យគ្រូពេទ្យចេញការព្រមានអ្នកទេសចរកម្សាន្តនៅតាមឆ្នេរសមុទ្រឱ្យមានការប្រុងប្រយ័ត្នខ្ពស់នៅរដូវក្តៅនេះ។
យោងតាមសេចក្តីរាយការណ៍ពីសារព័ត៌មានវៀតណាម VnExpress ចេញផ្សាយនៅថ្ងៃទី៧ ខែសីហា ឆ្នាំ២០២៥ បានឱ្យដឹងថា ក្រុមវេជ្ជបណ្ឌិតបានបញ្ជាក់កាលពីថ្ងៃទី៦ ខែសីហា ថា បុរសរូបនោះបានធូរស្រាលហើយ និងកំពុងទទួលបានការព្យាបាលយ៉ាងយកចិត្តទុកដាក់ បន្ទាប់ពីបានទទួលការវះកាត់យ៉ាងឆាប់រហ័សនៅឯមន្ទីរពេទ្យ Bach Mai នៅក្នុងទីក្រុងហាណូយ។
យោងតាមការបញ្ជាក់ពីមន្ទីរពេទ្យ អ្នកជំងឺត្រូវបានសត្វសមុទ្រមួយក្បាលខាំចំភ្លៅពេលកំពុងហែលទឹកសមុទ្រ។ ប្រហែល១៥ម៉ោងក្រោយមក មុខរបួសតូចនោះបានប្រែជាហើម ក្រហម និងឈឺចាប់យ៉ាងខ្លាំង។ អ្នកជំងឺបានស្វែងរកជំនួយផ្នែកវេជ្ជសាស្ដ្រភ្លាមៗ ហើយត្រូវបានផ្ទេរទៅកាន់មជ្ឈមណ្ឌលគ្រប់គ្រងជាតិពុល Bach Mai ក្នុងស្ថានភាពធ្ងន់ធ្ងរ។
វេជ្ជបណ្ឌិតម្នាក់នៅមជ្ឈមណ្ឌលបាននិយាយថា នៅក្នុងរយៈពេលតិចជាង២៤ម៉ោង បាក់តេរីបានបំផ្លាញជាលិកាជ្រៅ និងចូលទៅក្នុងចរន្តឈាម ដែលបណ្តាលឱ្យខូចមុខងារសរីរាង្គធ្ងន់ធ្ងរ និងការបញ្ចូលជាលិកាមិនគ្រប់គ្រាន់។ ស្ថានភាពមូលដ្ឋានអ្នកជំងឺរូបនោះ រួមមានជំងឺរលាកសន្លាក់ហ្គោដ (Gout) លើសឈាម និងប្រព័ន្ធការពាររាងកាយចុះខ្សោយ បានធ្វើឱ្យការឆ្លងកាន់តែធ្ងន់ធ្ងរ។ អ្នកជំងឺជួបប្រទះនឹងបញ្ហាផ្លូវដង្ហើម សម្ពាធឈាមទាប និងខ្សោយតម្រងនោម។ វេជ្ជបណ្ឌិតបានដាក់អ្នកជំងឺលើម៉ាស៊ីនខ្យល់ ផ្តល់ថ្នាំលេប និងលាងឈាមជាបន្តបន្ទាប់។
ការធ្វើតេស្តបានបញ្ជាក់ពីការឆ្លងមេរោគ Vibrio vulnificus ដែលជាបាក់តេរីរស់នៅក្នុងធម្មជាតិនៃទឹកសមុទ្រ និងទឹកប្រៃ ជាពិសេសនៅរដូវក្តៅ។ ទោះបីជាករណីកម្រក៏ពិតមែន ប៉ុន្តែការឆ្លងអាចវិវឌ្ឍន៍យ៉ាងឆាប់រហ័ស គំរាមកំហែងដល់អាយុជីវិត ប្រសិនបើមិនបានព្យាបាលទាន់ពេលវេលា។
ដោយដឹងពីភាពបន្ទាន់នោះហើយ ទើបគ្រូពេទ្យបានធ្វើការវះកាត់យកជាលិកា Necrotic និងសំអាតតំបន់ដែលមានមេរោគចេញ។ អ្នកជំងឺក៏ទទួលបានថ្នាំអង់ទីប៊ីយោទិចជាច្រើន និងការថែទាំដ៏យកចិត្តទុកដាក់បំផុត។ ជាលទ្ធផលស្ថានភាពអ្នកជំងឺបានប្រសើរឡើងបន្ទាប់ពីការវះកាត់ ហើយចាប់តាំងពីពេលនោះមកអ្នកជំងឺត្រូវបានផ្លាស់ទៅនាយកដ្ឋានស្តារ ដើម្បីថែទាំមុខរបួស។
វេជ្ជបណ្ឌិត Nguyen Trung Nguyen នាយកមជ្ឈមណ្ឌលគ្រប់គ្រងជាតិពុលវៀតណាម បានថ្លែងថា គ្រប់គ្នាគួរតែយកចិត្តទុកដាក់ឱ្យបានខ្ពស់នៅពេលហែលទឹក ឬទទួលទានអាហារសមុទ្រ ពិសេសប្រសិនបើអ្នកមានរបួសចំហរ ឬស្ថានភាពសុខភាពរ៉ាំរ៉ៃ។ ជាមួយគ្នានោះ លោកបានណែនាំថា ប្រជាជនគួរចម្អិនអាហារសមុទ្រឱ្យបានឆ្អិន ចៀសវាងការបរិភោគអយស្ទ័រឆៅ និងស្វែងរកការព្យាបាលជាបន្ទាន់ ប្រសិនបើមានការហើម ក្រហម ឬឈឺចាប់មុខរបួស បន្ទាប់ពីប៉ះពាល់ទឹកសមុទ្រ ឬទទួលទានអាហារសមុទ្រ៕ ប្រភព ៖ VnExpress
ចែករំលែកព័តមាននេះ