ប្រទេស​ហ្វី​លី​ពី​ន ៖ ការ​បង្ហោះ​លើ​កម្មវិធី TikTok កាលពី​ពេល​ថ្មី​ៗ​នេះ ដែល​បង្ហាញ​អំពី​អតីត​ប្រធានាធិបតី​ហ្វី​លី​ពី​ន​លោក រ៉ូ​ឌ្រី​ហ្គោ ឌូ​តឺ​តេ (Rodrigo Duterte) ដែល​កំពុង​ជាប់​ឃុំ ស្ថិត​ក្នុង​ស្ថានភាព​រាង​កាយ​ស្គមស្គាំង និង​ទន់ខ្សោយ​ខ្លាំង​បំផុត ដោយ​បាន​បង្ក​ឱ្យ​មានការ​ព្រួយបារម្ភ​យ៉ាង​ខ្លាំង​ក្នុង​ចំណោម​បណ្តា​អ្នកគាំទ្រ​របស់​លោក​។ ទោះ​យ៉ាងណា​ក៏​ដោយ សេចក្តីរាយការណ៍​ពី​សារព័ត៌មាន​ហ្វី​លី​ពី​ន Rappler និង Philippine Star បានឱ្យ​ដឹង​ថា អនុ​ប្រធានាធិបតី​ហ្វី​លី​ពី​ន លោកស្រី សា​រ៉ា ឌូ​តឺ​តេ (Sara Duterte) ដែល​ជា​កូនស្រី​លោក រ៉ូ​ឌ្រី​ហ្គោ ឌូ​តឺ​តេ បាន​អះអាង​ថា រូប​ដែល​បង្ហោះ​គឺជា​រូប​ក្លែងក្លាយ​។

រូបថត​ចំនួន​២​សន្លឹក ដែល​ត្រូវ​បាន​ចែកចាយ​លើ​បណ្តាញ​សង្គម ជា​ពិសេស​លើ​កម្មវិធី TikTok ដោយ​រូប​មួយ​សន្លឹក​បង្ហាញ​ពី​លោក រ៉ូ​ឌ្រី​ហ្គោ ឌូ​តឺ​តេ មើលទៅ​ស្គមស្គាំង និង​ទន់ខ្សោយ​ខ្លាំង ដោយ​ស្លៀក​ឈុត​អ្នកជំងឺ​សម្រាក​លើ​គ្រែង​មន្ទីរពេទ្យ​។ ក្រោយមក រូប​មួយ​សន្លឹក​ទៀត​បាន​បង្ហាញ​ពី​អតីត​ប្រធានាធិបតី​ហ្វី​លី​ពី​ន ដែល​កំពុង​ត្រូវ​បាន​ឃុំខ្លួន​រូប​នេះ អង្គុយ​លើ​កៅអី​រុញ​ជាមួយ​រាង​កាយ​ស្គមស្គាំង និង​ទន់ខ្សោយ​ខ្លាំង នៅ​ពេល​ដែល​លោក​កាន់​ពែង​កាហ្វេ​។

អ្នក​និយម​លេង​បណ្តាញ​សង្គម​មានការ​ភ្ញាក់ផ្អើល​យ៉ាង​ខ្លាំង ចំពោះ​រូប​ទាំងនោះ ពិស​ស​អ្នកគាំទ្រ​អតីត​ប្រធានាធិបតី​ហ្វី​លី​ពី​ន​វ័យ​៨០​ឆ្នាំ ដែល​ត្រូវ​បាន​ចាប់ខ្លួន​ដោយ​តុលាការ​ឧក្រិដ្ឋកម្ម​អន្តរជាតិ ហៅ​កាត់​ថា ICC កាលពី​ខែមីនា​កន្លង​ទៅ ពី​បទឧក្រិដ្ឋ​កម្ម​ជុំវិញ​អំពើ​ហិង្សា​បង្ក្រាប​គ្រឿងញៀន​រូប​នេះ​។

ប្រភព​ពី Rappler នៅ​ថ្ងៃ​ទី​១៨ ខែកក្កដា ឆ្នាំ​២០២៥ បានឱ្យ​ដឹង​ថា មិន​មាន​ប្រភព​ផ្ទៀងផ្ទាត់ ឬ​ផ្លូវការ​បញ្ជាក់​ពី​ភាព​ត្រឹមត្រូវ​នៃ​រូប​ទាំងនោះ​ទេ ដោយ​បច្ចុប្បន្ន​លោក ឌូ​តឺ​តេ កំពុង​ត្រូវ​បាន​ឃុំខ្លួន​នៅ​មជ្ឈមណ្ឌល​ឃុំខ្លួន​របស់ ICC ហើយ​តុលាការ​មិន​បាន​បញ្ចេញ​រូបភាព ឬ​វី​ដេ​អូ​ណាមួយ​បង្ហាញ​ពី​លោក​នោះ​ទេ​។ វី​ដេ​អូ​តែ​មួយ​គត់ ដែល​គ្រប់​គ្នា​បានឃើញ​ពី​វត្តមាន​របស់​លោក ទាក់ទង​នឹង​ដំណើរការ​របស់​តុលាការ ICC គឺ​បាន​មក​ពី​ការ​បង្ហាញខ្លួន​លើក​ដំបូង​ចំពោះ​មុខ​អង្គ​បុ​រេ​ជំនុំជម្រះ​លើក​ទី​១ កាលពី​ថ្ងៃ​ទី​១៤ មីនា ឆ្នាំ​២០២៥​។ នៅ​ក្នុង​សវនាការ​នោះ​បាន​ធ្វើ​ឡើង​តាម​រយៈ​តំណ​ភ្ជាប់​វី​ដេ​អូ​ពី​មន្ទីរឃុំឃាំង​រូប​លោក​ដោយ​មិន​មាន​រូបរាង​ស្គមស្គាំង និង​ទន់ខ្សោយ​ខ្លាំង​គួរ​ឱ្យ​ព្រួយបារម្ភ​នោះ​ទេ​។

ជាមួយ​គ្នា​នោះ Rappler ព្រមទាំង​ស្ថាប័ន​ត្រួតពិនិត្យ​ការ​ពិត​ផ្សេង​ទៀត ពី​មុន​បាន​ធ្វើការ​បដិសេធ​រូប​ស្រ​ដៀង​គ្នា​ដែល​បង្ហាញ​ពី​លោក ឌូ​តឺ​តេ ស្លេកស្លាំង និង​សម្រាក​លើ​គ្រែពេទ្យ ដោយ​រូប​នោះ ត្រូវ​បាន​អះអាង​ថា​ក្លែងក្លាយ​ដោយ​ផ្ទាល់​ពី​អនុ​ប្រធានាធិបតី លោកស្រី សា​រ៉ា ឌូ​តឺ​តេ បន្ទាប់​ពី​លោកស្រី​បាន​ទៅ​ជួប​ឪពុក​ដែល​កំពុង​ជាប់​ឃុំ​។

លោកស្រី​បាន​ថ្លែង​ក្នុង​បទ​សម្ភាស​មួយ​ជាមួយ​បណ្តា​អ្នក​យក​ព័ត៌មាន​ថា «​រូបថត​នោះ​មិនមែន​ជា​រូប​ពិត​ទេ​។ រូប​នោះ​ក្លែងក្លាយ គ្មាន​រូប​ណាមួយ​ត្រូវ​បាន​បញ្ចេញ​ពី​មជ្ឈមណ្ឌល​ឃុំខ្លួន​នោះ​ទេ​។ លោកស្រី​បន្ថែម​ថា ឪពុក​លោកស្រី​មិន​បាន​សម្រាក​នៅ​មន្ទីរពេទ្យ​ទេ ប៉ុន្តែ​បច្ចុប្បន្ន​កំពុង​ត្រូវ​បាន​ឃុំខ្លួន​ក្នុង​មន្ទីរឃុំឃាំង​ជា​ប្រចាំ​របស់ ICC​។ លោកស្រី​ថែម​ទាំង​អះអាង​ទៀត​ថា ឪពុក​លោកស្រី​ដើរ​ដោយ​ខ្លួនឯង គាត់​មិន​ឈឺ​ទេ​។

កាលពី​ថ្ងៃ​ទី​៤ ខែកក្កដា កន្លង​ទៅ អតីត​ភរិយា​របស់​លោក ឌូ​តឺ​តេ លោកស្រី Elizabeth Zimmerman បាន​ថ្លែង​ក្នុង​បទ​សម្ភាសន៍​ជាមួយ​អ្នកគាំទ្រ​នៅ​ឯ​ទីក្រុង​ឡា​អេ​ថា រាង​កាយ​លោក ឌូ​តឺ​តេ ស្គម​ជាង​មុន ស្រប​ពេល​ដែល​លោកស្រី សា​រ៉ា ឌូ​តឺ​តេ ក៏​បាន​និយាយ​បែប​នេះ​ដែរ​។ ប៉ុន្តែ​អ្នក​ទាំង​ពីរ​បាន​សង្កត់ធ្ងន់​ថា លោក ឌូ​តឺ​តេ បាន​ស្រក​ទម្ងន់ ហើយ​មើលទៅ​គាត់​មាន​សុខភាព​ល្អ​។ គាត់​មើលទៅ​មិន​មាន​ខ្វះ​អាហារូបត្ថម្ភ ឬ​សុខភាព​ទន់ខ្សោយ​ទេ ប៉ុន្តែ​គាត់​គ្រាន់តែ​ស្រក​ទម្ងន់​តាម​ធម្មជាតិ​។

សូម​ជម្រាប​ថា លោក ឌូ​តឺ​តេ ត្រូវ​បាន​ឃុំខ្លួន​នៅ​មជ្ឈមណ្ឌល​ឃុំខ្លួន Scheveningen នៅ​ទីក្រុង​ឡា​អេ ប្រទេស​ហូ​ឡង់ ចាប់តាំងពី​ថ្ងៃ​ទី​១១ ខែមីនា បន្ទាប់​ពី​ការ​ចាប់ខ្លួន​នៅ​ក្នុង​ប្រទេស​ហ្វី​លី​ពី​ន ពី​បទឧក្រិដ្ឋ​កម្ម​ប្រឆាំង​មនុស្សជាតិ ដែល​ពាក់ព័ន្ធ​នឹង​សង្គ្រាម​គ្រឿងញៀន​ដ៏​បង្ហូរឈាម​របស់​លោក​។

លោក​នឹង​បង្ហាញខ្លួន​នៅ​ចំពោះ​មុខ​តុលាការ ICC នៅ​ថ្ងៃ​ទី​២៣ ខែកញ្ញា សម្រាប់​ការ​បញ្ជាក់​អំពី​សវនាការ​លើ​ការ​ចោទប្រកាន់ ដើម្បី​កំណត់​អំពី​សំណុំរឿង​របស់​លោក​នឹង​បន្ត​ដំណើរការ​កាត់ក្តី​បែប​ណា​៕