អន្តរជាតិ ៖ ការរញ្ជួយដីដ៏ខ្លាំងបំផុតមួយរបស់ពិភពលោកបានវាយប្រហារតំបន់ចុងបូព៌ារបស់ប្រទេសរុស្ស៊ីនៅព្រឹកថ្ងៃទី៣០ ខែកក្កដា ឆ្នាំ២០២៥ ដែលជាការរញ្ជួយកម្រិត ៨,៨រ៉ិចទ័រ ដែលបណ្តាលឱ្យមានរលកយក្សស៊ូណាមិនៅក្នុងតំបន់ប៉ាស៊ីហ្វិកភាគខាងជើង ហើយបានជំរុញឱ្យមានការព្រមានសម្រាប់រដ្ឋអាឡាស្កា កោះហាវ៉ៃ…
អន្តរជាតិ ៖ ការរញ្ជួយដីដ៏ខ្លាំងបំផុតមួយរបស់ពិភពលោកបានវាយប្រហារតំបន់ចុងបូព៌ារបស់ប្រទេសរុស្ស៊ីនៅព្រឹកថ្ងៃទី៣០ ខែកក្កដា ឆ្នាំ២០២៥ ដែលជាការរញ្ជួយកម្រិត ៨,៨រ៉ិចទ័រ ដែលបណ្តាលឱ្យមានរលកយក្សស៊ូណាមិនៅក្នុងតំបន់ប៉ាស៊ីហ្វិកភាគខាងជើង ហើយបានជំរុញឱ្យមានការព្រមានសម្រាប់រដ្ឋអាឡាស្កា កោះហាវ៉ៃ និងឆ្នេរសមុទ្រផ្សេងទៀតនៃភាគខាងត្បូងឆ្ពោះទៅរកប្រទេសនូវែលសេឡង់។ ស្របពេលទីតាំងជាច្រើនបានចេញសេចក្តីណែនាំឱ្យការជម្លៀសមនុស្សចេញ ប៉ុន្តែមិនទាន់មានសេចក្តីរាយការណ៍ពីការខូចខាត និងអ្នករងរបួស ឬស្លាប់នៅឡើយទេ។ នេះបើតាមប្រភពពីសារព័ត៌មាន AP ចេញផ្សាយនៅមុនបន្តិច។
ប្រភពពីសារព័ត៌មាន BBC បានឱ្យដឹងថា គ្រោះរញ្ជួយដីកម្រិត ៨,៨ រ៉ិចទ័រ បានវាយប្រហារឧបទ្វីប Kamchatka ភាគខាងកើតឆ្ងាយរបស់រុស្ស៊ី នៅម៉ោងប្រហែល ១១និង២៥នាទីម៉ោងក្នុងស្រុក។ រលកយក្សស៊ូណាមិដែលមានកម្ពស់ពី ៣-៤ម៉ែត្រ ត្រូវបានកត់ត្រានៅតំបន់ខ្លះនៃឧបទ្វីប Kamchatka។
ប្រភពដដែលបន្តថា រលកទី១កម្ពស់ ៣០សង់ទីម៉ែត្របានបោកបក់លើទីក្រុង Hokkaido ភាគខាងជើងប្រទេសជប៉ុន ប៉ុន្តែអាជ្ញាធរព្រមានថា រលកបន្តបន្ទាប់អាចនឹងកាន់តែធំ។ ចំណែកអាជ្ញាធរអាមេរិកក៏បានចេញការព្រមានអំពីរលកយក្សស៊ូណាមិសម្រាប់រដ្ឋអាឡាស្កា កោះហាវ៉ៃ ហើយនាឡិកាព្រមានក៍៏ចូលជាធរមានសម្រាប់កោះ Guam របស់សហរដ្ឋអាមេរិក និងកោះដទៃទៀតនៃតំបន់ Micronesia។
ប្រភពពី Reuters ក៏បានរាយការណ៍ថា មនុស្សជាច្រើននាក់បានរងរបួសនៅតំបន់ដាច់ស្រយាលរបស់រុស្ស៊ី ខណៈដែលភាគច្រើននៃសមុទ្រភាគខាងកើតរបស់ជប៉ុន ដែលធ្លាប់ត្រូវបានបំផ្លិចបំផ្លាញដោយការរញ្ជួយដី និងរលកយក្សស៊ូណាមិកាលពីឆ្នាំ២០១១ ត្រូវបានបញ្ជាឱ្យជម្លៀសមនុស្សចេញ។
ប្រភពពី Aljazeera ក៏បានរាយការណ៍ថា ទីភ្នាក់ងារភូគព្ភសាស្ត្រឥណ្ឌូណេស៊ីបានចេញការព្រមានពីរលកយក្សស៊ូណាមិសម្រាប់តំបន់ Papua ដែលមានជម្រៅតិចជាង ០,៥ ម៉ែត្រអាចវាយប្រហារផ្នែកខ្លះនៃប្រទេសឥណ្ឌូនេស៊ីនៅរសៀលនេះ។ ទីភ្នាក់ងារនេះបានបន្តថា រលកយក្សស៊ូណាមិអាចទៅដល់ទីក្រុង និងតំបន់តាមឆ្នេរសមុទ្រមួយចំនួននៅក្នុងតំបន់ Papua ខេត្ត Maluku ភាគខាងជើង និងខេត្ត Gorontalo។
អាជ្ញាធរហ្វីលីពីនក៏បានណែនាំអ្នកស្រុកឱ្យនៅឆ្ងាយពីឆ្នេរក្នុងតំបន់ឆ្នេរប៉ាស៊ីហ្វិក ដោយវិទ្យាស្ថាន Volcanology and Seismology របស់ប្រទេសនេះ បានជូនដណឹងថា តំបន់ឆ្នេរប៉ាស៊ីហ្វិក នៅក្នុងប្រទេសហ្វីលីពីនត្រូវបានពឹងថា នឹងជួបប្រទះរលកយក្សស៊ូណាមិ ដែលមានកម្ពស់តិចជាងមួយម៉ែត្រ។ រលកយក្សស៊ូណាមិដំបូងត្រូវបានរំពឹងថានឹងបោកបក់មកដល់ចន្លោះម៉ោង ១និង២០នាទី ដល់ម៉ោង ២និង៤០នាទីរសៀលថ្ងៃពុធនេះ៕
ចែករំលែកព័តមាននេះ