ប្រទេសវៀតណាម ៖ រដ្ឋាភិបាលវៀតណាម នៅថ្ងៃទី១៨ ខែកក្កដា ឆ្នាំ២០២៥ បានព្រមានថា ជំងឺប៉េស្តជ្រូកអាហ្វ្រិក (ASF) កំពុងតែរីករាលដាលក្នុងប្រទេសវៀតណាម…
ប្រទេសវៀតណាម ៖ រដ្ឋាភិបាលវៀតណាម នៅថ្ងៃទី១៨ ខែកក្កដា ឆ្នាំ២០២៥ បានព្រមានថា ជំងឺប៉េស្តជ្រូកអាហ្វ្រិក (ASF) កំពុងតែរីករាលដាលក្នុងប្រទេសវៀតណាម ដោយគំរាមកំហែងដល់ការផ្គត់ផ្គង់ស្បៀងនៅក្នុងប្រទេសអាស៊ីអាគ្នេយ៍មួយនេះ។
ប្រភពពីទីភ្នាក់ងារសារព័ត៌មាន Reuters បានឱ្យដឹងថា រដ្ឋាភិបាលបានបញ្ជាក់ក្នុងសេចក្តីថ្លែងការណ៍មួយថា នៅក្នុងឆ្នាំនេះ ប្រទេសវៀតណាមបានរកឃើញការផ្ទុះឡើងចំនួន ៥១៤ករណីក្នុងទីក្រុង និងខេត្តចំនួន ២៨ ក្នុងចំណោម ៣៤ ទូទាំងផ្ទៃប្រទេស ដោយបន្ថែមថា អាជ្ញាធរបានសម្លាប់ជ្រូកមានមេរោគជាង៣ម៉ឺនក្បាលរួចហើយ។ រដ្ឋាភិបាលបានបន្តថា ហានិភ័យនៃជំងឺប៉េស្តជ្រូកអាហ្វ្រិក កំពុងស្ថិតនៅលើចំណុចនៃការកើនឡើង ដែលជះឥទ្ធិពលអវិជ្ជមានដល់ឧស្សាហកម្មចិញ្ចឹមជ្រូក ការផ្គត់ផ្គង់ស្បៀង និងបរិស្ថានផងដែរ។
ការរាតត្បាតកាលពីពេលថ្មីៗនេះ នៅក្នុងប្រទេសវៀតណាមបានជំរុញឱ្យលោកនាយករដ្ឋមន្ត្រី ផាំ មិញជិញ (Phạm Minh Chính) ផ្ញើការណែនាំជាបន្ទាន់មួយទៅកាន់បណ្តាខេត្ត និងទីភ្នាក់ងាររដ្ឋាភិបាលក្នុងសប្តាហ៍នេះ ដើម្បីដាក់ចេញវិធានការទប់ស្កាត់។
ប្រទេសវៀតណាមក្នុងឆ្នាំ២០២៣ បានអនុម័តលើការប្រើប្រាស់វ៉ាក់សាំងពាណិជ្ជកម្មក្នុងស្រុកសម្រាប់ជំងឺប៉េស្តជ្រូកអាហ្វ្រិកដំបូងគេបង្អស់របស់ខ្លួន ប៉ុន្តែទោះយ៉ាងណាក៏ដោយ ក្រុមមន្ត្រីបានអះអាងថា អត្រានៃការចាក់វ៉ាក់សាំងជ្រូកនៅមានកម្រិតទាបនៅឡើយ។ តួយ៉ាង មន្ត្រីសុខភាពសត្វនៃខេត្តក្វាងង៉ៃ (Quang Ngai) បានឱ្យដឹងថា មានតែជ្រូកប្រហែល ៣០% ក្នុងខេត្តប៉ុណ្ណោះ ដែលត្រូវបានចាក់វ៉ាក់សាំង។ មន្ត្រីខេត្តម្នាក់ទៀតដែលសុំមិនបញ្ចេញឈ្មោះបានថ្លែងថា វាមិនច្បាស់ថា ហេតុអ្វីបានជាអត្រាទាបនោះទេ វាអាចជាបញ្ហានៃភាពអាចរកបាន ក៏ដូចជាប្រសិទ្ធភាព ឬថ្លៃដើមនៃវ៉ាក់សាំង។
នាយកដ្ឋានសុខភាពសត្វក្រសួងកសិកម្មវៀតណាម មិនបានឆ្លើយតបទៅនឹងសំណើសុំការអត្ថាធិប្បាយរបស់ Reuters ជុំបញ្ហានេះទេ ស្របពេលដែលការហៅទូរសព្ទទៅកាន់ AVAC Vietnam JSC ដែលជាក្រុមហ៊ុនផលិតវ៉ាក់សាំងជំងឺប៉េស្តជ្រូកអាហ្វ្រិកដ៏សំខាន់របស់ប្រទេសវៀតណាមទៀតសោត ក៏មិនមានការឆ្លើយតបដូចគ្នា។ AVAC ធ្លាប់បានលើកឡើងកាលពីខែមុនថា ខ្លួនបានលក់វ៉ាក់សាំងចំនួន៣លានដូសនៅក្នុងទីផ្សារក្នុងស្រុក និងបាននាំចេញចំនួន ៦០ម៉ឺនដូសទៅកាន់ប្រទេសហ្វីលីពីន និងឥណ្ឌូណេស៊ីផងដែរ៕ ប្រភព ៖ Reuters
ចែករំលែកព័តមាននេះ