ខេត្តព្រះសីហនុ ៖ កាលពីរសៀលថ្ងៃទី២២ មីនា លោកសុខ ខៀវ ព្រមទាំងបងប្អូនប្រជាពលរដ្ឋ និងពុទ្ធបរិស័ទមកពីស្រុកព្រៃនប់ និងក្រុងព្រះសីហនុយ៉ាងច្រើនកុះករ បានរួបរួមគ្នាធ្វើបុណ្យបួងសួងសុំសេចក្តីសុខចម្រើន និងដើម្បីឧទ្ទិសកុសលផលបុណ្យជូនដល់វិញ្ញាណក្ខន្ធពលរដ្ឋស្រី-ប្រុសចំនួន១៩នាក់ ដែលស្លាប់បាត់បង់ជីវិតដោយគ្រោះថ្នាក់ចរាចរណ៍នៅចំណុចអូរត្រាវ ក្នុងភូមិពូធឿង ឃុំបិតត្រាំង ស្រុកព្រៃនប់ កាលពីថ្ងៃទី៤ កុម្ភៈ កន្លងទៅនេះ។
លោកសុខ ខៀវ អ្នកផ្តួចផ្តើមកម្មវិធីបុណ្យបានឱ្យដឹងថា ប្រជាពលរដ្ឋកម្ពុជាគ្រប់រូបតែងតែគោរពទៅតាមទំនៀមទម្លាប់ប្រពៃណី និងជំនឿសាសនា តាំងពីយូរលង់រៀងមក។ ដូច្នេះបន្ទាប់ពីឃើញឧបទ្ទវហេតុបានកើតឡើងជាញឹកញាប់ដែលជាគ្រោះថ្នាក់ចរាចរណ៍ធំៗកើតឡើងមិនឈប់ឈរនៅតាមបណ្តោយផ្លូវជាតិលេខ៤ ក្នុងភូមិសាស្ត្រខេត្តព្រះសីហនុ ទើបរូបលោក រួមជាមួយបងប្អូនប្រជាពលរដ្ឋបានមូលមតិគ្នាប្រារព្ធពិធីបុណ្យនេះឡើង ក្នុងគោលបំណងសុំសេចក្តីសុខក្នុងការធ្វើដំណើរឆ្លងកាត់របស់បងប្អូនប្រជាពលរដ្ឋ រួមទាំងភ្ញៀវទេសចរជាតិ-អន្តរជាតិ។
លោកសុខ ខៀវ បន្តទៀតថា នៅក្នុងកម្មវិធីបុណ្យនេះបាននិមន្តព្រះសង្ឃចំនួន១៩អង្គមកសូត្រមន្តប្រោះព្រំវារី ចម្រើនព្រះបរិត្ត និងសម្តែងធម្មទេសនា ដើម្បីឧទ្ទិសកុសលជូនដល់ដួងវិញ្ញាណក្ខន្ធមនុស្សប្រុស-ស្រីចំនួន១៩នាក់ដែលបានស្លាប់យ៉ាងអាណោចអាធ័មនៅក្នុងករណីគ្រោះថ្នាក់ចរាចរណ៍ដ៏រន្ធត់ដែលបានកើតឡើងកន្លងទៅថ្មីៗនេះ។ ម្យ៉ាងវិញទៀត គឺចង់សម្តែងឱ្យអ្នកបើកបរយានយន្តទាំងតូច ទាំងធំ បានឃើញ និងអង្រួនបេះដូងឱ្យពួកគេដឹងថា សោកនាដកម្មនេះតើអ្នកណាជាអ្នកបង្កឡើង? ហើយអ្នកណាជាអ្នករងគ្រោះព្រាត់ប្រាសនិរាសគ្រួសារ? បន្ទាប់ពីបានឃើញហើយគួរតែរិះរកវិធានការទាំងឡាយណាដែលចៀសផុតពីគ្រោះថ្នាក់ដល់អាយុជីវិតរបស់អ្នកដទៃ កុំមើលឃើញតែផលប្រយោជន៍ផ្ទាល់ខ្លួន និងត្រូវមានការអធ្យាស្រ័យគ្នានៅពេលបើកបរ។
លោកសុខ ខៀវ បានឱ្យដឹងទៀតថា កម្មវិធីបុណ្យនេះប្រព្រឹត្តទៅនៅថ្ងៃអង្គារ ទី២២ មីនា ឆ្នាំ២០១១ ត្រូវនឹងថ្ងៃ៣ រោច ខែផល្គុន ឆ្នាំខាល ពុទ្ធសករាជ២៥៥៤ ចាប់ផ្តើមនៅវេលាម៉ោង២និង៥០រសៀល។ ព្រឹកឡើងថ្ងៃពុធ ទី២៣ ខែមីនា ត្រូវនឹងថ្ងៃ៤ រោច ខែឆ្នាំដដែល វេលាម៉ោង៧និង៣០នាទីព្រឹក ប្រគេនយាគូដល់ព្រះសង្ឃ លុះដល់វេលាម៉ោង១០និង៣០នាទីព្រឹក រាប់បាត្រប្រគេនព្រះសង្ឃ និងបង្សុកូលជាកិច្ចបង្ហើយបុណ្យ។ គួរបញ្ជាក់ផងដែរថា បុណ្យនេះត្រូវបានប្រារព្ធធ្វើឡើងនៅនឹងកន្លែងគ្រោះថ្នាក់ចរាចរណ៍ដែលបណ្តាលឱ្យស្លាប់បាត់បង់ជីវិតមនុស្សចំនួន១៩នាក់ និងរងរបួសចំនួន៨នាក់។ ម្យ៉ាងវិញទៀត ពិធីបុណ្យនេះក៏បានឧទ្ទិសកុសលជូនដល់វិញ្ញាណក្ខន្ធអ្នកដែលបានស្លាប់បាត់បង់ជីវិតក្នុងករណីគ្រោះថ្នាក់ចរាចរណ៍នៅតាមបណ្តោយផ្លូវជាតិលេខ៤ ទាំងអស់ផងដែរ៕
ចែករំលែកព័តមាននេះ