ខេត្តបន្ទាយមានជ័យ ៖ ដោយស្ថានភាពគ្រោះរាំងស្ងួតត្រូវបានអូសបន្លាយកន្លែងខ្លះគ្មានភ្លៀងធ្លាក់ ស្រូវដែលបានលូតលាស់ហើយ បែរស្វិតងាប់ជាបណ្តើរៗនៅចន្លោះវាលឃុំអូរប្រាសាទ និងឃុំរហាត់ទឹក។ ជាក់ស្តែងឃើញនៅថ្ងៃទី០៥ ខែមិថុនា ឆ្នាំ២០២០នេះ ចំណុចចន្លោះវាល ភូមិអូរប្រាសាទ និងភូមិគោកអំពិល ឃុំអូរប្រាសាទ និងភូមិ.ឃុំរហាត់ទឹក ឃើញមានស្រូវកំពុង ស្វិតងាប់ជាបណ្តើរៗ ហើយគ្មានភ្លៀងធ្លាក់ធ្វើឲ្យប្រជាកសិករមានកង្វល់យ៉ាងខ្លាំង ដោយបង្កបង្កើនផលបានដុះជាដើមដង ហើយគ្រោះរាំងស្ងួតត្រូវបានអូសបន្លាយគ្មានភ្លៀងធ្លាក់។
ប្រជាកសិករភូមិគោកអំពិលបានបញ្ជាក់ប្រាប់ថា៖ នេះហើយដែលធ្វើស្រែរំពឹងមេឃ ឬធ្វើស្រែប្រវាស់ទេវតា កន្លែងធ្វើស្រែចម្ការមិនមានភ្លៀងធ្លាក់ទេ បែជាភ្លៀងធ្លាក់នៅកន្លែងទីផ្សារទៅវិញ ជាក់ស្តែងរហូតពេលនេះនៅវាលស្រែចន្លោះឃុំអូរប្រាសាទ និងឃុំរហាត់ទឹកស្រូវស្វិតងាប់ ជាបណ្តើរៗហើយ។ លោក រ័ត្ន ដាស៊ីណង់ អភិបាលស្រុកមង្គលបូរីបានឲ្យដឹងថា៖ នៅស្រុកមង្គលបូរីឆ្នាំ២០២០នេះ ប្រជាកសិករបង្កបង្កើនផលស្រូវបានប្រមាណជាង៥ម៉ឺនហិកតា ដែលភាគច្រើនជាស្រូវប្រភេទស្រូវដើមរដូវ ឬស្រូវស្រាល។
ហើយភាគច្រើនដែលធ្វើស្រូវពង្រោះ ហើយមិនទាន់ប៉ះពាល់ ឬខូចខាតនៅឡើយទេ ទោះជាកន្លែងខ្លះមានភ្លៀងធ្លាក់ កន្លែងខ្លះទៀត ត្រូវបានរាំងគ្មានភ្លៀងធ្លាក់មានតិចតួច។ ដោយយោងតាមរបាយមន្ទីរកសិកម្ម រុក្ខាប្រមាញ់ និងនេសាទ ខេត្តបន្ទាយមានជ័យ មានផ្ទៃដីកសិកម្មចំនួន២៥២.៣២០ហិកតា ឆ្នាំ២០២០នេះ បានភ្ជួររាស់ដំណាំស្រូវរដូវវស្សាបានចំនួន១៩៤.៣២៨ហិកតា ដែលបង្កបង្កើនផលបាន ស្មើនឹង៦១.៧១% រហូតដល់ថ្ងៃទី១ ខែមិថុនា ឆ្នាំ២០២០ មានភ្លៀងធ្លាក់គ្រប់ទិសទី កម្រិតទឹកភ្លៀងសរុបជាមធ្យមគិតពីដើមវគ្គ មានចំនួន១៨១.១២ម.ម បើប្រៀបធៀបនឹងឆ្នាំកន្លងទៅ មានកម្រិតទឹកខ្ពស់ជាងចំនួន២៥.០០ម.ម រយៈពេលដូចគ្នា៕ ដោយ ៖ ប៊ុន ធឿន
ចែករំលែកព័តមាននេះ