រាជធានីភ្នំពេញ ៖ បើយោងតាមរដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បានឲ្យដឹងថា ដីសម្បទាន សេដ្ឋកិច្ចដែលរាជរដ្ឋាភិបាលបានប្រគល់សិទ្ធិឲ្យក្រុមហ៊ុនឯកជនវិនិយោគលើការដាំដុះដំណាំកសិឧស្សាហកម្ម ដូចជា កៅស៊ូ ស្វាយចន្ទី កាលពី១០ ឬ១៥ឆ្នាំមុននោះ នៅពេលនេះបច្ចុប្បន្នក្រុមហ៊ុនទាំងនោះ បានផ្តើមទទួលផលបណ្តើរៗហើយ តាមរយៈការនាំចេញកសិផលទៅលក់នៅក្រៅប្រទេស ដែលយ៉ាងហោចណាស់ ក្រុមហ៊ុនមួយអាចរកចំណូលបានពី ១ពាន់ដុល្លារដល់ទៅ ២ម៉ឺនដុល្លារ ក្នុងទំហំដីត្រឹមមួយហិកតា។
ចំណែករដ្ឋវិញ ការផ្តល់ដីសម្បទានសេដ្ឋកិច្ចធ្វើឲ្យកម្ពុជាទទួលបានប្រាក់ចំណូល ពីការជួលដីឲ្យឯកជន និងប្រាក់ពីពន្ធអាករផ្សេងៗ ជាពិសេសបានបង្កើតទីផ្សារការងារឲ្យពលរដ្ឋនៅក្នុងប្រទេស។ លោក វេង សាខុន រដ្ឋមន្ត្រីក្រសួងកសិម្មឲ្យដឹងថា ក្រុមហ៊ុនដែលដាំដុះកៅស៊ូ ស្វាយចន្ទី ជាដើមនោះបាន ប្រមូលផលរយៈពេលពីរឆ្នាំចុងក្រោយនេះ។ លោករដ្ឋមន្ត្រីឲ្យដឹងថា «ប្រាក់ចំណូលទទួលបាន ពីការនាំចេញផលិតផលផ្លែចេកស្រស់ បានប្រមាណពី ២០ ០០០ ទៅ ២៥ ០០0 ដុល្លារក្នុង១ ហិកតាក្នុង១ឆ្នាំ។ កៅស៊ូធម្មជាតិ និងស្វាយចន្ទីវិញទទួលបានត្រឹមតែជាង ១ ០០០ដុល្លារ ក្នុង១ហិកតានៅក្នុងរយៈពេល១ឆ្នាំ»។
លោក ស្រី វុឌ្ឍី អ្នកនាំពាក្យកសិកម្ម រុក្ខាប្រមាញ់ និងនេសាទ បានគូសបញ្ជាក់ថា កាលពីឆ្នាំ២០១៩ ផ្ទៃដីដាំដុះ កសិឧស្សាហកម្ម ដែលក្រុមហ៊ុនឯកបានធ្វើអាជីវកម្ម មានចំនួន ០,៤លានហិកតា ក្នុងចំនួននេះរដ្ឋទទួលបាន ប្រាក់ឈ្នួល ជួលដីប្រមាណ២,៤លានដុល្លារ រួមនឹងពន្ធសួយសារផ្សេងៗ ប្រមាណជាង៣លានដុល្លារទៀត។ លោកបានឲ្យដឹងបន្ថែមថា ការផ្តល់ដីសម្បទានសេដ្ឋកិច្ចនេះ បានផ្តល់ទីផ្សារការងារឲ្យពលរដ្ឋខ្មែរ បានចំនួន៤ម៉ឺននាក់។
លោក វេង សាខុន បានគូសបញ្ជាក់ថា ក្រោយពីរាជរដ្ឋាភិបាលបានដាក់ចេញនូវ គោលនយោបាយបើកទូលាយដល់វិស័យឯកជន ក្នុងការបោះទុនវិនិយោគលើវិស័យកសិកម្មតាមរយៈ ការផ្តល់សម្បទានដីសេដ្ឋកិច្ច កាលពី៨ ទៅ១៥ឆ្នាំកន្លងមក ស្របពេលដែលកម្ពុជាទទួលបានការចុះ ពិធីសារនៃការនាំចេញផ្លែឈើទៅកាន់បណ្តាប្រទេសមួយចំនួន ជាពិសេសប្រទេសចិននោះ កសិផលខ្មែរ បាននាំចេញជាបន្តបន្ទាប់ នាពេលប៉ុន្មានឆ្នាំចុងក្រោយនេះ។ លោករដ្ឋមន្ត្រី ធ្លាប់បានជួបក្រុមហ៊ុនដាំចេក មួយកន្លែងនៅខេត្តត្បូងឃ្មុំ ក្នុងរយ:ពេល៥ខែ ដើមឆ្នាំ២០២០ ក្រុមហ៊ុន ឡុង ស្រេង បាននាំចេញចេកអំបូងលឿង ចំនួន ២២ ៧៦២តោន ក្នុងនោះនាំទៅកាន់ទីផ្សារវៀតណាម ១៤ម៉ឺនតោន និងទីផ្សារចិនជាង៨ពាន់តោន។
លោក វេង សាខុន ឲ្យដឹងថា ការនាំចេញកសិផលទៅក្រៅប្រទេស ក្រៅពីកៅស៊ូធម្មជាតិ គឺមានគ្រប់ស្វាយចន្ទី ផ្លែចេក និងស្វាយស្រស់។ ការនាំចេញផលិតផលកសិកម្មទាំងអស់នេះ មាននិន្នាការកើនឡើងគួរឲ្យកត់សម្គាល់ ហើយបណ្តាក្រុមហ៊ុន ដែលកំពុងបោះទុនវិនិយោគលើដំណាំកសិកម្ម បាន និងកំពុងស្រូបយកកម្លាំងពលកម្ម យ៉ាងគំហុកទៀតផង។ «គ្រាន់តែសម្ព័ន្ធក្រុមហ៊ុន ថា ឌី បានទទួលវិនិយោគសម្បទានដីសេដ្ឋកិច្ចនៅខេត្តក្រចេះ និងខេត្តរតនៈគិរី បានស្រូបយកកម្មករកម្ពុជាប្រមាណជាជាង ៥ ០០០ នាក់ពេលបច្ចប្បន្ន និងកើនឡើងទ្វេរដង ក្នុងបំណាច់ឆ្នាំ២០២០នេះ ហើយឆ្នាំ២០២១ នឹងអាចស្រូបយកកម្មករកម្ពុជាជាង ១ ៥០០ នាក់ »។ នេះជាការបញ្ជាក់របស់លោក វេង សាខុន។
លោក ស្រី វុឌ្ឍី បានមានប្រសាសន៍ថា នៅពេលដំណាំកសិឧស្សាហកម្ម តាមតំបន់ដីសម្បទានសេដ្ឋកិច្ច កំពុងផ្តើមឲ្យផល បើជាកម្ពុជាមានបញ្ហាចោទ ពីកម្លាំងពលកម្មទៅវិញ។ លោកថា មនុស្សពេញកម្លាំងជាច្រើនមិនចង់ធ្វើការនៅមូលដ្ឋានរបស់ខ្លួន។ ពលរដ្ឋសុខចិត្តធ្វើចំណាកស្រុកមកការងារក្នុងទីក្រុង ឬទៅក្រៅប្រទេស តែតាមពិតទៅការងារនៅមូលដ្ឋាន របស់គេអាចរកចំណូលមិនចាញ់ទីក្រុងនោះឡើយ។ លោកអ្នកនាំពាក្យ ដើម្បីដោះស្រាយបញ្ហានេះ ក្រសួងបានជំរុញឲ្យក្រុមហ៊ុនធ្វើការអភិវឌ្ឍមធ្យោបាយធ្វើការរបស់ខ្លួនឲ្យទំនើបដើម្បីទាក់ទាញកម្លាំងពលកម្ម។ លោកពន្យល់ដូច្នេះ «ឧទាហរណណ៍ ដូចជាការប្រមូលផលផ្លែអ៊ីចឹង យើងសូមឲ្យក្រុមហ៊ុន មានឧបករណ៍បេះ ឬប្រមូលផលដោយស្វ័យប្រវត្តិ ហើយមនុស្សជាអ្នកបញ្ជាម៉ាស៊ីន។ ធ្វើបែបនេះ យើងសង្ឃឹមថា ពលរដ្ឋយើងនឹងចាប់អារម្មណ៍ចូលទៅធ្វើការនៅតាមមូលដ្ឋានរបស់គេ»៕ ដោយ ៖ អ សួស្ដី
ចែករំលែកព័តមាននេះ