ខេត្តកណ្ដាល ៖ ជនសង្ស័យម្នាក់ពេលស្រវឹងស្រាក៏ប្រច័ណ្ឌប្រពន្ធ បង្កជាទំនាស់មិននិយាយស្តីរកគ្នាជាងមួយខែមកហើយ លុះក្រោយមកសុំប្រពន្ធជានាគ្នាវិញ តែប្រពន្ធមិនព្រម ក៏យកសាំងដុតប្រពន្ធ ខណៈដែលនាងកំពុងដេកលង់លក់ បណ្ដាលឲ្យរងរបួសធ្ងន់ ក្រោយមកក៏បានបាត់បង់ជីវិតនៅពេលបញ្ជូនទៅដល់មន្ទីរពេទ្យ ។ ក្នុងហេតុការណ៍នេះក៏ឃើញមានលិខិតមួយដែលជនសង្ស័យបានសរសេរថា «ទីមួយផិតក្បត់ ទីពីស្រឡាញ់កូនក្រៅខោធ្វើបាបយើង បញ្ឈឺចិត្តយើងយកអ្នកជក់ថ្នាំមកនៅផ្ទះ» ។
ករណីខាងលើនេះបានកើតឡើងកាលពីវេលាម៉ោង១រំលងអធ្រាត្រថ្ងៃទី៦ ខែមិថុនា ឆ្នាំ២០២០ ស្ថិតក្នុងភូមិព្រៃផ្ចឹក ឃុំឈ្វាំង ស្រុកពញាឮ ខេត្តកណ្តាល។
មន្ត្រីនគរបាលស្រុកពញាឮបានឲ្យដឹងថា ជនសង្ស័យជាប្តីឈ្មោះ ងួន ហៅ តឿ ភេទប្រុស អាយុ៥១ឆ្នាំ មុខរបរកម្មករសំណង់ មានទីលំនៅស្រុកឱរ៉ាល់ ខេត្តកំពង់ស្ពឺ ។ ចំណែកជនរងគ្រោះជាប្រពន្ធឈ្មោះ សរ ចាន់ ភេទស្រី អាយុ៤៧ឆ្នាំ មុខរបរកម្មការិនីរោងចក្រ មានទីលំនៅក្នុងភូមិឃុំកើតហេតុខាងលើ ។
តាមប្រភពដដែលបានបន្តថា ក្នុងអំឡុងឆ្នាំ២០១៨ ជនរងគ្រោះ និងជនសង្ស័យបានរស់នៅជាមួយគ្នាជាប្តីប្រពន្ធរហូតមក។ លុះមកដល់អំឡុងខែឧសភា ឆ្នាំ២០២០ ជនសង្ស័យបានផឹកស្រាស្រវឹង ហើយបានមករករឿងជនរងគ្រោះ ដោយសារតែប្រច័ណ្ឌ និងចោទថា ជនរងគ្រោះលួចមានប្រុសថ្មី ហើយប្តីប្រពន្ធទាំង២នាក់មិននិយាយរកគ្នាជាង១ខែហើយ។
តាមប្រភពដដែលបានបន្តទៀតថា លុះដល់វេលាម៉ោងកើតហេតុខាងលើ ជនសង្ស័យបានសុំជនរងគ្រោះត្រូវរ៉ូវគ្នាវិញ ប៉ុន្តែជនរងគ្រោះមិនព្រមនោះទេ រហូតដល់វេលាម៉ោង១រំលងអធ្រាត្រឈានចូលថ្ងៃទី៦ ខែឆ្នាំដដែល ជនសង្ស័យបានយកសាំងចំនួន២លីត្រដុតជនរងគ្រោះខណៈកំពុងដេកលក់ បណ្ដាលឲ្យរងរបួសធ្ងន់ ភ្លាមៗនោះជនរងគ្រោះត្រូវបានក្រុមគ្រួសារសាច់ញាតិបញ្ជូនយកទៅសង្គ្រោះបន្ទាន់នៅមន្ទីរពេទ្យកាល់ម៉ែត រាជធានីភ្នំពេញ តែជាអកុសលជនរងគ្រោះបានបាត់បង់ជីវិតនៅពេលទៅដល់មន្ទីរពេទ្យ។ ចំណែកជនសង្ស័យបានរត់គេចខ្លួនបាត់ ដោយឃើញមានលិខិតមួយដែលជនសង្ស័យបានសរសេរថា «ទីមួយផិតក្បត់ ទីពីស្រឡាញ់កូនក្រៅខោធ្វើបាបយើង បញ្ឈឺចិត្តយើងយកអ្នកជក់ថ្នាំមកនៅផ្ទះ» ។
ពាក់ព័ន្ធនឹងករណីខាងលើនេះ កម្លាំងជំនាញបានសហការជាមួយកម្លាំងនគរបាលប៉ុស្តិ៍ឈ្វាំង កំពុងកសាងសំណុំរឿងនិងស្រាវជ្រាវរកជនសង្ស័យដើម្បីចាប់ខ្លួនយកមកចាត់ការតាមច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ