ប្រទេសអង់គ្លេស ៖ បើយោងតាមការចុះផ្សាយពី BBC បានឱ្យដឹងថា មិនមានលទ្ធផលវិជ្ជមានកូវីដ-១៩ ថ្មីណាមួយ ត្រូវបានរកឃើញពីការធ្វើតេស្តដំណាក់កាលចុងក្រោយបង្អស់សរុបចំនួន ១.១៩៥ នៃក្របខណ្ឌ Premier League ។
សូមបញ្ជាក់ថា ការធ្វើតេស្តដំណាក់កាលទី ៦ ដែលធ្វើ ២លើកក្នុងមួយសប្តាហ៍ លើកីឡាករ និងបុគ្គលិកក្លិបទាំង២០ ក្នុងក្របខណ្ឌកំពូលអង់គ្លេសមួយនេះ ដែលបានធ្វើឡើងកាលពីថ្ងៃទី ៤-៥ ខែមិថុនា ឆ្នាំ២០២០។
ជម្រាបជូនថា ឆ្លងកាត់ការធ្វើតេស្តទាំងអស់ ក្នុងនោះគេបានរកឃើញសរុបមនុស្សចំនួន ១៣ នាក់មានសញ្ញាវិជ្ជមានកូវីដ-១៩ លើការធ្វើតេស្តសរុបចំនួន ៦,២៧៤ ចាប់តាំងពីពួកគេបានចាប់ផ្តើម។
ក្នុងនោះកីឡាករ ឬបុគ្គលិកណាម្នាក់ ដែលបានឆ្លងវីរុសនេះ ត្រូវបានដាក់ឱ្យនៅដាច់ដោយឡែកពីគេរយៈពេលមួយសប្តាហ៍ ដើម្បីបន្តតាមដាន និងទទួលការព្យាបាលពីក្រុមគ្រូពេទ្យរបស់ក្លិបរៀងខ្លួន តាមវិធានការដែលបានដាក់ចេញដោយក្របខណ្ឌ Premier League។
សូមរំលឹកថា ក្របខណ្ឌ Premier League ត្រូវបានផ្អាកសកម្មភាពទាំងស្រុង ចាប់តាំងពីថ្ងៃទី១៣ ខែមីនា ឆ្នាំ២០២០ នឹងត្រូវចាប់ផ្តើមឡើងវិញនៅថ្ងៃទី១៧ ខែមិថុនា ឆ្នាំ២០២០ ខាងមុខ ដោយបិទទ្វារកីឡដ្ឋាន ។
ក្រឡេកមកកាន់តារាងពិន្ទុ យើងឃើញថាក្រុមហង្សក្រហម Liverpool បានកំពុងនាំមុខ ២៥ ពិន្ទុលើក្រុមចំណាត់ថ្នាក់លេខ២ Manchester City ដោយមានភាគរយខ្ពស់ក្នុងការប្រជែងតំណែងជើងឯកលីគលើកទី១៩ របស់ខ្លួន ក្រោយខកខានអស់រយៈពេល ៣០ឆ្នាំកន្លងមក។
ដោយឡែកក្រុម Bournemouth, Aston Villa និងក្រុម Norwich City បច្ចុប្បន្នកំពុងស្ថិតនៅក្នុងតំបន់ដែលត្រូវកាត់ចោល ខណៈនៅសល់ ៩២ប្រកួតទៀត ដែលត្រូវលេងដើម្បីបញ្ចប់លីគរដូវកាល ២០១៩-២០៕
ចែករំលែកព័តមាននេះ