ស្នាមឈាមនៅខាងក្រៅទ្វារឃ្លាំង គឺជាសញ្ញាបន្ទាន់តែមួយគត់ ដែលថា ឃាតកម្មបានកើតឡើងនៅប្រទេសសំប៊ី ។
ប៉ុន្តែរូបភាពស៊ីស៊ីធីវីស៊ី បានបង្ហាញឱ្យឃើញនូវរសៀលដ៏ឃោរឃៅនៃការសម្លាប់រង្គាល ។ នៅពាក់កណ្តាលថ្ងៃត្រង់ ថ្ងៃអាទិត្យទី២៤ ខែឧសភា អ្នកវាយប្រហារជនជាតិសំប៊ីបីនាក់ ដែលមានដំបងដែកបានចូលក្នុងឃ្លាំងវាយនភ័ណ្ឌដែលគ្រប់គ្រង ដោយជនជាតិចិន នៅទីក្រុងលូសាកា ។ ប៉ូលិសបាននិយាយថា ពួកគេបន្លំធ្វើជាអតិថិជន ។ ប៉ុន្តែអ្នកទាំងបីមិ នចង់រកស៊ីទិញដូរអ្វីទេ។
ក្នុងរយៈពេល ១៧នាទី វីដេអូស៊ីស៊ីធីវី បង្ហាញពួកគេបានវាយបុរសពីរនាក់ និងស្ត្រីម្នាក់រហូតដល់ស្លាប់នៅទីធ្លាមួយ មុនពេលអូសសាកសពរបស់ពួកគេចូលទៅក្នុងឃ្លាំងដែលនៅជាប់គ្នា ។ នោះហើយជាកន្លែងដែលវីដេអូបញ្ចប់ ។
យោងតាមប៉ូលិសអ្នកវាយប្រហារបន្ទាប់មកបានយកសាកសពចេញ ហើយបានដុតសាកសព និងអគាររហូតខ្ទេច ។ ប៉ូលិសបានចំណាយពេលរហូតដល់បីថ្ងៃ ដើម្បីរកសាកសពដែលខ្លោចនៅក្នុងគំនរកម្ទេចក្រោយការដុតបំផ្លាញនោះ ។
ឃាតកម្មដ៏គួរឱ្យរន្ធត់នោះកើតឡើង ទៅលើអ្នកស្រី ចាម ហ្គីហ្វាង អាយុ៥២ ឆ្នាំ ភរិយារបស់ម្ចាស់ឃ្លាំងវាយនភ័ណ្ឌ ដែលស្ថិតនៅក្នុងខេត្តកំណើតរបស់ពួកគេ គឺខេត្តចៀងសូ នៅភាគខាងកើតប្រទេសចិន ។
បុគ្គលិកប្រុសពីរនាក់របស់ គាត់ឈ្មោះ ប៉ាវ ចុនប៊ីន អាយុ៥៨ឆ្នាំ និងហ្វាន មីនជី អាយុ៣៣ ឆ្នាំ ក៏ត្រូវបានសម្លាប់នៅក្នុងហេតុការណ៍នោះ នៅពេលដែលអារម្មណ៍ប្រឆាំង នឹងចិននៅក្នុងរដ្ឋធានីសំប៊ីនេះកំពុងឈានដល់ចំណុចក្តៅ ។
ប៉ុន្មានថ្ងៃមុនឈានដល់ការធ្វើឃាតលោកអភិបាលក្រុង លូសាកា លោក ម៉ៃ សាមប៉ា បានចោទប្រកាន់ថៅកែជនជាតិចិននៅក្នុង រដ្ឋធានីថា បានធ្វើបាបអ្នកធ្វើការងារអោយដូចទាសករ ហើយប្រើពាក្យប្រមាថថា«បុរសចិន»និងបង្កការរើសអើងជាតិសាសន៍ ។ ហើយគាត់បាននិយាយរំលឹកដល់វីដេអូមួយផ្សាយតាមហ្វេសប៊ុក ដែលថា«ជនជាតិសំប៊ីស្បែកខ្មៅមិនមែនជាប្រភពដើមកំណើត វីរុសនោះទេ ។ វាមានដើមកំណើតនៅប្រទេសចិន។ »
មានជនជាតិចិនប្រមាណ ២២,០០០ នាក់ដែលកំពុងរស់នៅក្នុងប្រទេសសំប៊ីហើយប្រតិបត្តិការក្រុមហ៊ុនចំនួន ២៨០ ។ ទីក្រុងប៉េកាំងកាន់កាប់ប្រហែល ៤៤% នៃបំណុលរបស់ប្រទេសសំប៊ី ដែលនាំឱ្យមានការភ័យខ្លាចក្នុងចំណោមប្រជាជនសំប៊ីមួយចំនួនដែលថា ប្រទេសចិនអាចមានការគ្រប់គ្រងលើប្រទេសនេះច្រើនពេក ។
ខណៈពេលដែលប៉ូលិសមិនបានភ្ជាប់ដោយផ្ទាល់នូវឃាតកម្មនេះទៅនឹងអារម្មណ៍ប្រឆាំងនឹងជនជាតិចិននោះ បទឧក្រិដ្ឋនេះបានកើតឡើង ដោយធ្វើអោយមានការនឹកឃើញដល់ការផ្ទុះអំពើហិង្សាដែលជនជាតិចិនមួយចំនួនបានជួបប្រទះក្នុងពេលកំពុងរស់នៅក្នុងប្រទេសសំប៊ីដែលជាដៃគូសំខាន់សម្រាប់ប្រទេសចិន នៅក្នុងគំរោងខ្សែក្រវាត់ និងផ្លូវ ។
អ្នកជំនួញជនជាតិចិនម្នាក់ដែលរស់នៅក្នុងប្រទេសសំប៊ីអស់រយៈពេលជាងមួយទសវត្សន៍មកហើយនោះបាននិយាយថា«សូម្បីតែមនុស្ស មួយចំនួនដែលបានស្នាក់នៅទីនេះអស់រយៈពេលជាង ២០ ឆ្នាំមក ហើយពួកគេក៏មានការតក់ស្លុតចំពោះសកម្មភាពឧក្រិដ្ឋបែបនេះដែរ» ៕
ចែករំលែកព័តមាននេះ