រាជធានីភ្នំពេញ ៖ មឿន សុខហ៊ុច មកពីក្លិបពុទ្ធសេរីវង្សពោធិសែនជ័យ និងផល សោភ័ណ្ឌ មកពីក្លិបតាឡីដំរីមានរិទ្ធ ត្រូវបានគេរៀបចំឱ្យជួបប្រកួតដណ្ដើមប្រាក់ពីរលានរៀលពីកម្មវិធីAlexandដែនដីអ្នកប្រយុទ្ធគុនខ្មែរ នៅលើសង្វៀនស៊ីអិនស៊ី…
រាជធានីភ្នំពេញ ៖ មឿន សុខហ៊ុច មកពីក្លិបពុទ្ធសេរីវង្សពោធិសែនជ័យ និងផល សោភ័ណ្ឌ មកពីក្លិបតាឡីដំរីមានរិទ្ធ ត្រូវបានគេរៀបចំឱ្យជួបប្រកួតដណ្ដើមប្រាក់ពីរលានរៀលពីកម្មវិធីAlexandដែនដីអ្នកប្រយុទ្ធគុនខ្មែរ នៅលើសង្វៀនស៊ីអិនស៊ី នាថ្ងៃទី៧ មិថុនា ខានស្អែកនេះ។
ការជួបគ្នារវាងអ្នកប្រដាល់ជើងចាស់ទាំងពីរនាក់ខាងលើលើកនេះ ត្រូវបានអ្នកតាមដានការប្រកួតរង់ចាំទស្សនាយ៉ាងអន្ទះសា ព្រោះអីពួកគេសុទ្ធតែជាអ្នកប្រដាល់ដែលធ្លាប់មានកេរ្តិ៍
ឈ្មោះល្បីល្បាញពីមុនមកដូចគ្នា ។ ម្យ៉ាង ការប្រកួតលើនេះអ្នកឈ្នះគ្រប់ទឹកតែម្ដងព្រោះ
ក្រៅពីបានតម្លៃខ្លួនខ្ពស់ ថែមទាំងទទួលបានប្រាក់រង្វាន់ចំនួនពីរលានរៀលស្មើនឹង៥០០ដុល្លារបន្ថែមទៀតផង ។
ដូច្នេះទាំងសងខាងរំពឹងថា មិនបន្ធូរដៃឬយល់យោគឱ្យគ្នានោះទេ ត្រូវតែបញ្ចេញឱ្យអស់ក្បាច់រៀងៗខ្លួនដើម្បីក្លាយជាម្ចាស់ប្រាក់ពីរលានរៀល ។ ទោះជាយ៉ាងណាមឿន សុខហ៊ុច ក៏មានការកោតញញើតផល សោភ័ណ្ឌខ្លះដែរ បើទោះជាការប្រកួតរបស់គេមួយរយៈមកនេះមិនធ្លាប់ស្គាល់ពាក្យថាចាញ់ម្ដងណាក៏ដោយ ។
មឿន សុខហ៊ុច បច្ចុប្បន្ននេះពិបាករកគូប្រកួតខ្លាំងណាស់ ប៉ុន្តែគេនៅមិនទាន់ដឹងថា សម្រាប់ការមកប៉ះផល សោភ័ណ្ឌលើកនេះអាចមានសំណាងយកឈ្នះដូចលើកមុនៗទៀតឬអត់នោះទេ ។ ផល សោភ័ណ្ឌគឺជាអ្នកប្រដាល់លំដាប់ជួរមុខម្នាក់ដែរ រីឯថ្វីដៃប្រកួតក៏មិនអន់ជាងមឿន សុខហ៊ុច ប៉ុន្មានដែរ។ សង្ឃឹមថា ជំនួបរវាងកីឡាករទាំងពីរជាលើកដំបូងនេះនឹងកក្រើកសង្វៀនមិនខាន។
ក្រៅពីគូដណ្ដើមប្រាក់លាន នៅលើសង្វៀនដដែលក៏មានគូខ្លាំងៗជាច្រើនទៀត ។ កីឡាករ ទិត្យ សុវណ្ណគីរី មកពីសមាគមកីឡាប្រដាល់ក្រសួងកសិកម្ម ត្រូវបានគេរៀបចំឱ្យជួបប្រកួតជាមួយកីឡាករ សេក ចាន់រាជ មកពីក្លិបអង្គរមានជ័យខេត្តសៀមរាប ។
ទិត្យ សុវណ្ណគីរី ពីមុនមកក៏ជាអ្នកប្រដាល់ជើងខ្លាំងម្នាក់ដែរ ប៉ុន្តែជាមួយនឹងការបាត់មុខពីលើសង្វៀនយូរឆ្នាំមកនេះ សូម្បីតែមុខរបស់គេក៏ចង់ភ្លេចដែរ ទម្រាំថ្វីដៃប្រកួតមិនដឹងថានៅល្អដូចមុនទៀតឬក៏អត់នោះទេ ។ អេលីត ឡុឡី មកពីក្លិបប៉ែនកាក់គុនខ្មែរ ត្រូវប្រកួតជាមួយពុទ្ធ ភារិន្ទមកពីក្លិបពុទ្ធសេរីវង្សពោធិសែនជ័យ ។
ឡុងពិសិដ្ឋ មកពីក្លិបខ្លារខិនមានរិទ្ធ ប្រកួតជាមួយធន់ វិណ្ណុ មកពីសមាគមកីឡាប្រដាល់កងយោធពលខេមរភូមិន្ទ និងគូបើកឆាក កីឡាករ លី រដ្ឋា មកពីក្លិបមិស្លីនគុនខ្មែរ ប្រកួតជាមួយកីឡាករ អាន សុខខាន់ មកពីក្លិបកងទ័ពពិសេសឆត្រយោង៩១១៕ (កែសម្រួលដោយ ៖ បុប្ផា)
ចែករំលែកព័តមាននេះ