ថៃ ៖ ថ្មីៗនេះ នៅក្នុងគណនីហ្វេសប៊ុករបស់នារីជនជាតិថៃម្នាក់ ឈ្មោះ Aum Aim បានបង្ហោះសារ បញ្ជាក់ថា បទពិសោធន៍ដ៏ជូរចត់មួយដែលធ្វើឲ្យនាងចងចាំមិនភ្លេចនោះ គឺនៅថ្ងៃទី១៩ ឧសភា ២០២០ កន្លងមកនេះ ដោយនាង បានទៅទិញថ្នាំ អ៊ីប៊ុយប្រូហ្វែន ibuprofen ដើម្បីលេបបំបាត់ការឈឺធ្មេញដោយគ្មានវេជ្ជបញ្ជា ជាលទ្ធផលដែលពុំនឹកស្មានគឺប្រតិកម្មស្បែក នេះបើតាមប្រភពព័ត៌មានថៃ tnews ។
នៅក្នុងការបង្ហោះចែករំលែកនៅលើបណ្តាញសង្គមថៃ កញ្ញា Aum Aim បានសរសេរថា ថ្ងៃដំបូងទិញថ្នាំ ២គ្រាប់ មកញ៉ាំ នាងបានលេបថ្នាំនេះ ១គ្រាប់នៅពេលព្រឹក និង១គ្រាប់ទៀត នៅពេលថ្ងៃត្រង់ ។ បន្ទាប់មកទៀត រូបនាងចាប់ផ្តើម មានអាការឈឺភ្នែក ឈឺមាត់ រលាកបំពង់ក ខ្លួនប្រាណទាំងមូលហាក់មិនមានកម្លាំងនោះទេ មិនយូរប៉ុន្មានស្មាមកន្ទួលចាប់ផ្តើមលេចឡើងលើកញ្ចឹងក ។ ដោយឃើញស្ថានភាពបែបនេះ នៅម៉ោងប្រហែល១០យប់ ថ្ងៃទី១៩ ឧសភា ២០២០ មិនអាចទ្រាំបានរូបនាងបានហៅមិត្តស្រីឲ្យជួយនាំរូបនាងទៅជួបគ្រូពេទ្យ នៅពេទ្យមន្ទីរពេទ្យ Map Ta Phut ។ ដោយសារសភាពធ្ងន់ធ្ងរខ្លាំង គ្រូពេទ្យបានបញ្ជូនរូបនាងបន្តទៅព្យាបាលនៅមន្ទីរពេទ្យ Queen Sirikit ។
កញ្ញា Aum Aim បញ្ជាក់ថា នាងបានចូលគេងក្នុងបន្ទប់សង្គ្រោះបន្ទាន់ ICU អស់ប្រហែល៧យប់ រួមនឹងបន្តសម្រាកព្យាបាលរយៈពេល ១៤ថ្ងៃ ។ សេចក្តីសន្និដ្ឋានពីក្រុមវេជ្ជបណ្ឌិតថា អាឡែរហ្សីស្បែកប្រតិកម្មនឹងថ្នាំនេះ ។ ខណៈពេលនេះ រូបនាងបានធូរស្បើយហើយ គ្រាន់តែរង់ចាំឲ្យស្បែកដែលរលាកខ្លោចនិងរបកនោះ បានស្រស់ថ្លាឡើងវិញ ។
សូមជម្រាបដែរថា ថ្នាំអ៊ីប៊ុយប្រូហ្វែន (Ibuprofen) គឺគេប្រើទៅតាមវេជ្ជបញ្ជាពេទ្យ គឺមានសុវត្ថិភាព សម្រាប់ព្យាបាលបំបាត់ការឈឺចុកចាប់ ដែលថ្នាំមួយប្រភេទនេះ មានតម្លៃថោក ហើយក៏ងាយស្រួលរកទិញ នៅតាមឱសថស្ថានភាគច្រើន នៅក្នុងប្រទេសនានា ។
បើយោងតាម BBC បានចុះផ្សាយកាលពីថ្ងៃទី០៣ មិថុនា ម្សិលមិញនេះ Ibuprofen ត្រូវបានធ្វើតេស្ត ជាការព្យាបាលជំងឺកូវីដ-១៩ ។ ក្រុមមកពីមន្ទីរពេទ្យ Guy’s និងមន្ទីរពេទ្យ St Thomas នៃទីក្រុងឡុងដ៍ និងមហាវិទ្យាល័យ King ជឿជាក់ថា ថ្នាំនេះ ជាថ្នាំប្រឆាំងនឹងការរលាក ក៏ដូចជាថ្នាំបំបាត់ការឈឺចាប់ អាចព្យាបាលការពិបាកដកដង្ហើមនៃអ្នកជំងឺ COVID-19 ៕
ចែករំលែកព័តមាននេះ