ខេត្តកំពង់ស្ពឺ៖ លោកជំទាវកិត្តិសង្គហបណ្ឌិតម៉ែន សំអន រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចព្រមទាំងលោកស្រីទ្រី សុខា ពិធីការសម្តេចតេជោ លោកជំទាវឧកញ៉ាអុឹង ស៊ីស្រ៊ន និងលោកជំទាវឧកញ៉ាមហាឧបាសិការធម្មបណ្ឌិតញ៉ឹក ប៊ុនថា បានប្រគេនទៀនព្រះវស្សា និងទេយ្យវត្ថុព្រមទាំងថវិកាជិត៤០លានរៀលជាអំណោយដ៏ថ្លៃថ្លារបស់សម្តេចតេជោ និងសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ដល់ព្រះសង្ឃគង់ចាំព្រះវស្សាអស់ត្រីមាសនៅវត្តច័ន្ទគិរីហៅវត្តភ្នំចាស់ ក្នុងស្រុកឱរ៉ាល់ ខេត្តកំពង់ស្ពឺនាព្រឹកថ្ងៃទី៣ ឧសភា ឆ្នាំ២០២០ ។
ក្នុងនាមតំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន លោកជំទាវកិត្តិសង្គហបណ្ឌិតបានថ្លែងថា ក្រោយថ្ងៃរំដោះ៧ មករា ឆ្នាំ១៩៧៩ មកដល់បច្ចុប្បន្ននេះ អាស្រ័យដោយមានការគាំទ្រយ៉ាងរឹងមាំ ពីប្រជាពលរដ្ឋគ្រប់ស្រទាប់ជាន់ថ្នាក់ គណបក្សប្រជាជនកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន ជាប្រធាន និងជានាយករដ្ឋមន្ត្រីនៃព្រះរាជាណាចក្រកម្ពុជាបានខិតខំប្រឹងប្រែងដឹកនាំប្រទេស ឆ្លងកាត់ឧបសគ្គ និងការលំបាកយ៉ាងច្រើនឥតគណនា បានស្តារ កសាងជាតិឱ្យមានការរីកចម្រើន រក្សាបាននូវសុខសន្តិភាពពេញលេញនៅទូទាំងប្រទេស ព្រមទាំងសម្រេចបានសមិទ្ធផល ធំៗ ជាច្រើនទៀតជាប្រវត្តិសាស្ត្រមិនអាច កាត់ថ្លៃបានជូនជាតិមាតុភូមិ និងប្រជាជន ។
ដោយមានការដឹកនាំដ៏ត្រឹមត្រូវ ភ្លឺស្វាង និងទស្សនវិស័យវែងឆ្ងាយ គណបក្សបានធ្វើជាស្នូលនៃសាមគ្គីភាពជាតិ ឯកភាពជាតិតែមួយ និងសន្តិភាព ហើយដឹកនាំប្រទេសឈានទៅមុខជានិច្ចតាមទិសដៅដ៏ត្រឹមត្រូវ ។ ប្រមុខរាជរដ្ឋាភិបាលកម្ពុជាបានបំពេញតួនាទីដឹកនាំប្រទេស ប្រកបដោយការទទួលខុសត្រូវខ្ពស់បំផុតដោយធានាគ្រប់ដំណើរការនយោបាយសេដ្ឋកិច្ចសង្គមជាតិប្រព្រឹត្តទៅយ៉ាងល្អ ធានាបាននូវសន្តិភាព ស្ថិរភាព ឯកភាពជាតិ និងការរស់នៅដ៏សុខដុមរមនារបស់ប្រជាជនទូទាំងប្រទេស ។
លោកជំទាវកិត្តិសង្គហបណ្ឌិតម៉ែន សំអន បញ្ជាក់ថា ការចូលព្រះវស្សា គឺជាព្រះវិន័យដែលព្រះសម្មាសម្ពុទ្ធទ្រង់បញ្ញត្តិឡើង ដើម្បីឱ្យព្រះសង្ឃសាវ័កគ្រប់អង្គប្រតិបត្តិតាម ដែលមានរយៈពេល៣ខែ គឺចាប់ថ្ងៃ១រោច ខែអាសាឍ ដល់ទី១៥កើត ខែអស្សុជ ។ ការបញ្ញត្តិឱ្យមានការកាន់ព្រះវស្សា គឺព្រះពុទ្ធជាម្ចាស់ទ្រង់មានព្រះបំណងចង់ឱ្យព្រះសង្ឃ មានភាពងាយស្រួលក្នុងរដូវវស្សារយៈពេលបីខែនេះ ដែលជារដូវភ្លៀងធ្លាក់ជោកជាំ ។ ពិធីបុណ្យចូលព្រះវស្សា គឺជាពិធីបុណ្យមួយដែលមានសារសំខាន់ ក្នុងព្រះពុទ្ធសាសនា ជាពេលវេលាដ៏សំខាន់សម្រាប់ភិក្ខុសង្ឃ និងសាមណេរបានរៀនធម៌ និងវិន័យយ៉ាងខ្ជាប់ខ្ជួនតាមពុទ្ធឱវាទ ។
លោកជំទាវកិត្តិសង្គហបណ្ឌិតម៉ែន សំអន ថ្លែងថា ពិធីបុណ្យនេះដែរ ក៏មានជួបជុំពុទ្ធបរិស័ទ នមស្សការព្រះរតនត្រ័យ និមន្តព្រះសង្ឃចម្រើនព្រះបរិត្ត ដើម្បីឧទ្ទិសមហាកុសលផលបុណ្យជូនដល់ញាតកាទាំង៧ សន្តាន និងបុព្វការីជនដែលបានចែកឋានទៅកានបរលោកខាងមុខ មកទទួលយកផលាអានិសង្ឃ ដែលកើតចេញអំពីបុណ្យក្នុងថ្ងៃនេះ តាមបែបប្រពៃណីព្រះពុទ្ធសាសនា ដែលជាសាសនារបស់រដ្ឋ ។
លោកជំទាវកិត្តិសង្គហបណ្ឌិតម៉ែន សំអន បានបួងសួងថ្វាយព្រះពរជ័យ ថ្វាយព្រះមហាក្សត្រ ព្រះមហាក្សត្រី សម្តេចម៉ែ សម្តេចយាយ សម្តេចយាយទួត មុនិនាថ សីហនុ និងប្រគេនពរដល់ព្រះសង្ឃ គ្រប់ព្រះអង្គ និងឧទ្ទិសកុសលផលបុណ្យគោរពជូនសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ថ្នាក់ដឹកនាំសមាជិកព្រឹទ្ធសភា ថ្នាក់ដឹកនាំសមាជិករដ្ឋសភា ព្រមទាំងប្រជាពលរដ្ឋនៅទូទាំងប្រទេស សូមឲ្យជួបសេចក្តីសុខ សន្តិភាព និងសេចក្តីចម្រើន គ្រប់ៗគ្នា ។
លោកជំទាវកិត្តិសង្គហបណ្ឌិតម៉ែន សំអន បានឆ្លៀតក្រើនរំឭកប្រជាពលរដ្ឋ លោកយាយលោកតាពុទ្ធបរិស័ទចំណុះជើងវត្តទាំងអស់ឱ្យបន្តការប្រុងប្រយ័ត្នខ្ពស់ ពីជំងឺឆ្លងដ៏កាចសាហាវកូវីដ១៩ ដោយបង្កើនការធ្វើអនាម័យដើម្បីសុខភាពរស់នៅឱ្យបានល្អ ជាពិសេសត្រូវពាក់ម៉ាស់ ឬក្រមា និងត្រូវដុសលាងសម្អាតដៃឱ្យបានស្អាតជាប្រចាំ ជាមួយសាប៊ូ ទឹកអាល់កុល ឬជែលកម្ចាត់មេរោគ ៕ (កែសម្រួលដោយ ៖ បុប្ផា)
ចែករំលែកព័តមាននេះ