គ្រូបង្វឹកLiverpoolម្នាក់ចង់បំបែកកំណត់ត្រាសំខាន់មួយនៅ Premier League រដូវកាលនេះ
ប្រទេសអង់គ្លេស ៖ ក្រុមហង្សក្រហម Liverpool ត្រូវការជ័យជំនះតែ ២ប្រកួតទៀតប៉ុណ្ណោះ ដើម្បីក្លាយជាម្ចាស់ជើងឯក Premier League រដូវកាល…
ប្រទេសអង់គ្លេស ៖ ក្រុមហង្សក្រហម Liverpool ត្រូវការជ័យជំនះតែ ២ប្រកួតទៀតប៉ុណ្ណោះ ដើម្បីក្លាយជាម្ចាស់ជើងឯក Premier League រដូវកាល ២០១៩-២០ ជាលើកដំបូងក្នុងរយៈពេល៣០ឆ្នាំរបស់ខ្លួន ប៉ុន្តែគ្រូបង្វឹកលោក Jürgen Klopp ចង់ឈ្នះការប្រកួតដែលនៅសល់ទាំងអស់ ដើម្បីបំបែកកំណត់ត្រាពិន្ទុ ក្នុងប្រវត្តិសាស្ត្រក្របខណ្ឌកំពូលអង់គ្លេសមួយនេះ។
ក្រុមលោក Jürgen Klopp នៅមាន២៧ពិន្ទុពីការប្រកួតចំនួន៩ទៀត ដែលនៅសល់សម្រាប់លេង ដើម្បីបញ្ចប់រដូវកាលនេះ ហើយគ្រូបង្វឹកជនជាតិអាល្លឺម៉ង់ ចង់ឈ្នះការប្រកួតទាំង៩ ដែលធ្វើឱ្យក្រុមរបស់លោកមានពិន្ទុសរុប ១០៩ពិន្ទុ (ពេលបញ្ចប់លីគ) ដើម្បីបំបែកកំណត់ត្រាពិន្ទុច្រើនបំផុតមួយរដូវកាល ក្នុងប្រវត្តិសាស្ត្រ Premier League របស់ក្រុម Manchester City ដែលធ្វើបាន ១០០ពិន្ទុកាលពីរដូវកាល ២០១៧-១៨ ។
លោក Jürgen Klopp បានថ្លែងប្រាប់គេហទំព័រ BBC Sport ថា «វាពិតជាល្អណាស់ដែលគិតអំពីវា ប៉ុន្តែយើងមិនទាន់ក្លាយជាម្ចាស់ជើងឯកនៅឡើយទេ។ យើងនៅសល់ ២៧ ពិន្ទុទៀត ហើយយើងនឹងព្យាយាមធ្វើអ្វីៗទាំងអស់ដើម្បីយកវាឱ្យបាន។ យើងត្រូវតែឈ្នះពួកគេទាំងអស់។ យើងមិនចង់បញ្ឈប់ការឈ្នះ បន្ទាប់ពីនៅសល់ពីរប្រកួតទៀតនោះទេ។ ដូច្នេះពួកយើងត្រូវធ្វើការខ្លាំងបន្ថែម»។
ងាកមកកាន់តារាងពិន្ទុក្របខណ្ឌ Premier League បច្ចុប្បន្នក្រុម Liverpool កំពុងឈរតំណែងកំពូល ដោយនាំមុខ ២៥ពិន្ទុពីក្រុម Manchester City ដែលមាន ៥៧ពិន្ទុ។
សូមបញ្ជាក់ជូនថា ការប្រកួតប្រជែងក្របខណ្ឌ Premier League នឹងចាប់ផ្តើមឡើងវិញនៅថ្ងៃទី ១៧ ខែ មិថុនា ឆ្នាំ ២០២០ បន្ទាប់ពីត្រូវបានផ្អាកទាំងស្រុងកាលពីខែមីនា ដោយសារតែការផ្ទុះឡើងនៃវីរុសកូវីដ-១៩ ក្នុងប្រទេសអង់គ្លេស៕
ចែករំលែកព័តមាននេះ