ប្រទេសអង់គ្លេស ៖ ក្របខណ្ឌ Premier League បានផ្តល់ភ្លើងខៀវក្នុងការអនុញ្ញាតសម្រាប់ក្រុមទាំងអស់ ឱ្យមានការប្រកួតលក្ខណៈមិត្តភាព មុនពេលការវិលត្រឡប់មកដល់ នៃការប្រកួតប្រជែងលីគកំពូលអង់គ្លេសនៅពាក់កណ្តាលខែមិថុនានេះ ។…
ប្រទេសអង់គ្លេស ៖ ក្របខណ្ឌ Premier League បានផ្តល់ភ្លើងខៀវក្នុងការអនុញ្ញាតសម្រាប់ក្រុមទាំងអស់ ឱ្យមានការប្រកួតលក្ខណៈមិត្តភាព មុនពេលការវិលត្រឡប់មកដល់ នៃការប្រកួតប្រជែងលីគកំពូលអង់គ្លេសនៅពាក់កណ្តាលខែមិថុនានេះ ។
រំលឹកជូនថា ក្របខណ្ឌកំពូលអង់គ្លេសមួយនេះ ត្រូវបានផ្អាកចាប់តាំងពីខែមីនា ដោយសារតែការផ្ទុះឡើងនៃវីរុសកូវីដ-១៩ ប៉ុន្តែវានឹងចាប់ផ្តើមឡើងវិញនៅថ្ងៃទី១៧ ខែមិថុនា ឆ្នាំ២០២០ ហើយក្រុមទាំងអស់កំពុងស្វែងរកការប្រកួតមិត្តភាព ទាំងនៅក្នុងកីឡដ្ឋាន ឬកន្លែងហ្វឹកហាត់របស់ពួកគេ ដើម្បីត្រៀមលក្ខណៈមុនការប្រកួតលីគចូលមកដល់។
ក្លិបទាំងអស់ក៏បានទទួលយកវិធានការរឹតត្បិតជាច្រើន ដែលបានដាក់ចេញដោយក្របខណ្ឌ Premier League ក្នុងការអនុវត្ត ដើម្បីឱ្យការប្រកួតប្រជែងធ្វើទៅប្រកបដោយសុវត្ថិភាព និងកាត់បន្ថយករណីឆ្លងវីរុសដល់កីឡាករ ក្រុមគ្រូបង្វឹក បុគ្គលិកក្លិប ជាពិសេសមន្ត្រីដែលមានវត្តមានក្នុងការប្រកួត។
ក្នុងនោះនឹងមានការវាយតម្លៃពីហានិភ័យនៅគ្រប់ទីកន្លែង មុនពេលអនុញ្ញាតឱ្យមានការប្រកួតមិត្តភាព ខណៈដែលក្របខណ្ឌ Premier League នឹងពិចារណាអនុញ្ញាតឱ្យក្រុម Newcastle និង Norwich ដែលមានមូលដ្ឋានឆ្ងាយពីក្លិបដទៃ អាចធ្វើដំណើរមកលេងការប្រកួតមិត្តភាពបាន។
ក្រុមមួយចំនួនក្នុងក្របខណ្ឌ Premier League បានទាក់ទងទៅកាន់ក្រុមនៅលីគលំដាប់ទី២ (Championship) រួចហើយ ដែលនឹងត្រូវបានចេញសេចក្តីណែនាំពីលីគកីឡាបាល់ទាត់អង់គ្លេស (EFL) នៅចុងសប្តាហ៍នេះ ដើម្បីរៀបចំការប្រកួតមិត្តភាព។
សូមបញ្ជាក់ថា បច្ចុប្បន្នក្រុមហង្សក្រហម Liverpool កំពុងនាំមុខនៅកំពូលតារាង Premier League ដោយដាច់ចំនួន ២៥ពិន្ទុពីក្រុមចំណាត់ថ្នាក់លេខ២ Manchester City ដែលមាន ៥៧ពិន្ទុ ខណៈនៅសល់ ៩ប្រកួតទៀត ដែលត្រូវលេងដើម្បីបញ្ចប់រដូវកាល ២០១៩-២០ ៕ (ដកស្រង់ចេញពី Goal.com)
ចែករំលែកព័តមាននេះ