ខេត្តស្វាយរៀង ៖ សមត្ថកិច្ចបានបើកកិច្ចសហប្រតិបត្តិការបង្ក្រាបករណីជួញដូរគ្រឿងញៀននិងអាវុធឆ្លងដែន«កម្ពុជា-វៀតណាម»ចាប់បានឧក្រិដ្ឋបានជាបន្តបន្ទាប់ចំនួន៣នាក់ជាបន្តបន្ទាប់ ជនជាតិវៀតណាមចំនួន២នាក់ និងជនជាតិខ្មែរម្នាក់ ព្រមទាំងដកហូតបានអាវុធចំនួន៥ដើម និងគ្រឿងញៀនជាច្រើនប្រភេទមួយចំនួនទៀត។
បើតាមសមត្ថកិច្ចបានឲ្យដឹងថា ការចុះបង្ក្រាបករណីខាងលើនេះធ្វើឡើងកាលពីថ្ងៃទី២៥ ខែឧសភា ឆ្នាំ ២០២០ រួមមានសមត្ថកិច្ចយោធាការពារព្រំដែនវៀតណាម ខេត្តឡុងអាន បានបង្ក្រាបករណីជួញដូរគ្រឿងញៀននិងអាវុធឆ្លងដែននៅចំណុចព្រំដែនប៊ិញហៀប-ព្រៃវល្លិ៍ (ខេត្តស្វាយរៀង ខេត្តឡុងអាន) ដោយឃាត់ខ្លួនបុរសម្នាក់ជាជនជាតិវៀតណាម ព្រមទាំងដកហូតបានថ្នាំញៀនគ្រប់ប្រភេទទម្ងន់២០,៨គីឡូក្រាម និងអាវុធខ្លីចំនួន៣ដើម ។
តាមប្រភពដដែលបានបន្តថា បន្ទាប់ពីមានការបង្ក្រាបពីភាគីវៀតណាមនៅថ្ងៃទី២៦-២៨ខែឧសភា ឆ្នាំ២០២០ កម្លាំងជំនាញនៃស្នងការដ្ឋាននគរបាលខេត្តស្វាយរៀង សហការជាមួយកម្លាំងជំនាញការិយាលយ័(ក១០)របស់មន្ទីរប្រឆាំងគ្រឿងញៀនក្រសួងមហាផ្ទៃស្ថិតក្រោមការដឹកនាំសម្របសម្រូលផ្ទាល់ពីលោកព្រះរាជអាជ្ញាអមសាលាដំបូងខេត្តស្វាយរៀងនិងលោកព្រះរាជអាជ្ញាអមសាលាដំបូងរាជធានីភ្នំពេញបានដំណើរការស្រាវជ្រាវស៊ើបអង្កេតបន្ត។
តាមប្រភពដដែលបានបន្តទៀតថា ជាលទ្ធផល ឃាត់ខ្លួនជនសង្សយ័ចំនួន២នាក់ ក្នុងនោះម្នាក់ឈ្មោះឯក សារិទ្ធ ភេទប្រុស ជនជាតិខ្មែរ រស់នៅភូមិព្រៃវល្លិ៍ ឃុំថ្មីស្រុកកំពង់រោទិ៍ ខេត្តស្វាយរៀង និងម្នាក់ទៀតឈ្មោះង្វៀន វ៉ាន់សាង ហៅសួន គីមបូ ភេទប្រុស ជាជនជាតិវៀតណាម ។ ចំណែកទីតាំងបង្ក្រាបនៅបុរីមួយកន្លែង តាមផ្លូវលេខ១០ ផ្ទះលេខ៨០និងលេខ៨២ ក្រុម១ ភូមិព្រែកលៀប សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។
តាមប្រភពដដែលបានបន្តទៀតថា រីឯវត្ថុតាងចាប់យករួមមាន ហេរ៉ូអុីនទម្ងន់ ២១៣៥,៥៧ក្រាម, ថ្នាំគ្រាប់ចម្រុះពណ៌ ទម្ងន់ ១៤៩,២០ក្រាម(MDMA), ម្សៅម៉ត់ពណ៌សទម្ងន់ ៧,៣២ក្រាម(MDMA),
ម្សៅម៉ត់ពណ៌សទម្ងន់ ១០,៩១ក្រាម(កេតាមីន), ថ្នាំគ្រាប់នីមេតាហ្ស៊េប៉ាម ទម្ងន់ ១៥២,៤៦ក្រាម, ម្សៅម៉ត់ពណ៌កាហ្វេ ទម្ងន់ ២១៣,៩៥ក្រាម, ម្សៅម៉ត់ពណ៌ស ទម្ងន់ ៦១,២៣ក្រាម, អាវុធ២ដើម(ធុនAK៤៧)០១ដើមគ្រាប់២៥គ្រាប់ និងGLOCK ចំនួនមួយដើម គ្រាប់៣៨គ្រាប់, រថយន្ត២គ្រឿង(ម៉ាកឡង់រ៉ូវរ័មីនីពណ៌ស១គ្រឿង និងម៉ាកឡិចសុីស៤៧០ ពណ៌ខ្មៅ មួយគ្រឿង) និងម៉ូតូ៣គ្រឿងរួមនឹងឧបករណ៍សំភារះមួយចំនួនទៀត។
តាមប្រភពដដែលបានបន្តទៀតថា បច្ចុប្បន្នជនសង្ស័យម្នាក់ដែលចាប់ខ្លួននៅព្រំដែនកម្ពុជា-វៀតណាមនោះគ្រប់គ្រងដោយសមត្ថកិច្ចវៀតណាមចាត់ការតាមនីតិវិធី ។ ចំណែកជនស្ស័យ២នាក់ដែលចាប់បាននៅបុរីមួយកន្លែងក្នុងរាជធានីភ្នំពេញ គឺស្ថិតនៅក្នុងចំណាត់ការរបស់មន្ទីរប្រឆាំងគ្រឿងញៀនក្រសួងមហាផ្ទៃ កំពុងចាត់ការតាមស្រាវជ្រាវរកមេខ្លោងយកមកផ្តន្ទាទោសតាមច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ