សហរដ្ឋអាមេរិក ៖ អតីតកំពូលអ្នកប្រដាល់ Floyd Mayweather បានចំណាយប្រាក់ចំនួន៨៨.៥០០ដុល្លារសម្រាប់ពិធីបុណ្យសព និងពិធីគោរពវិញ្ញាណក្ខន្ធរបស់បុរសជនជាតិស្បែកខ្មៅលោក George Floyd ដែលត្រូវប៉ូលិសស្បែកសសង្កត់ករហូតបាត់បង់ជីវិត ហើយក្រុមគ្រួសាររបស់សព ក៏បានទទួលយកការផ្តល់ជូននេះផងដែរ។
លោក Leonard Ellerbe នាយកប្រតិបត្តិក្រុមហ៊ុន Mayweather Promotions បាននិយាយថា Mayweather ផ្ទាល់បានធ្វើការទាក់ទងទៅកាន់ជាមួយគ្រួសារសព។ គេនឹងដោះស្រាយការចំណាយសម្រាប់ពិធីបុណ្យសពនាថ្ងៃទី ៩ មិថុនា ២០២០ នៅស្រុកកំណើតរបស់លោក George Floyd នៅទីក្រុង Houston រដ្ឋ Texas សហរដ្ឋអាមេរិក រួមទាំងការចំណាយផ្សេងៗបន្ថែមទៀត ។
លោក Leonard Ellerbe បានថ្លែងប្រាប់ទៅកាន់ ESPN.com កាលពីថ្ងៃច័ន្ទថា «គេ (Mayweather) ប្រហែលជាខឹងនឹងខ្ញុំ ចំពោះការនិយាយរឿងនេះជាសាធារណៈ ប៉ុន្តែជាការពិត គេពិតជាបានចំណាយសម្រាប់ពិធីបុណ្យសពនេះមែន» ។
សូមរំលឹកជូនថា បុរសជនជាតិស្បែកខ្មៅ George Floyd បានស្លាប់កាលពីថ្ងៃទី ២៥ ឧសភា ២០២០ បន្ទាប់ពីមន្ត្រីប៉ូលីសស្បែកសក្នុងទីក្រុង Minneapolis រដ្ឋ Minnesota ម្នាក់បានព្យាយាមយកជង្គង់សង្កត់ករបស់ George Floyd ខណៈពេលដែលដៃរបស់គេបានជាប់ខ្នោះ ដោយមិនអាចដកដង្ហើមបាន George Floyd ក៏បានបាត់បង់ជីវិតភ្លាមៗតែម្តង ។
មរណភាពរបស់ George Floyd បានបង្កឱ្យផ្ទុះការតវ៉ា និងភាពចលាចលក្នុងទីក្រុងជាច្រើន នៅសហរដ្ឋអាមេរិក ដែលបានឈានដល់ការប្រើប្រាស់អំពើហិង្សាផងដែរ។ ទង្វើខាងលើនេះ ត្រូវបានក្រុមអ្នកតវ៉ា ចាត់ទុកថាជាការរើសអើងជាតិសាសន៍លើជនជាតិស្បែកខ្មៅ៕ (ដកស្រង់ចេញពី TMZ)
ចែករំលែកព័តមាននេះ