ខេត្តសៀមរាប ៖ បើតាមសេចក្តីរាយការណ៍បានឱ្យដឹងថា កម្លាំងនគរបាលខេត្តបន្ទាយមានជ័យ បានធ្វើការឃាត់ខ្លួនបុរស២នាក់ ដែលនាំពលរដ្ឋប្រុសស្រី ក្មេងចាស់ពីខេត្តសៀមរាប ចូលទៅបំរើការនៅប្រទេសថៃខុសច្បាប់ ចំនួន១៩នាក់ រួចប្រគល់ឲ្យប៉ូលិសខេត្តសៀមរាប ដើម្បីចាត់ការបន្តតាមនីតិវិធីច្បាប់ ហេតុការណ៍ឃាត់ខ្លួនបុរស២នាក់នាំពលករខុសច្បាប់នោះ បានធ្វើឡើងនាថ្ងៃទី៣០ ខែឧសភា ឆ្នាំ២០២០ ស្ថិតក្នុងឃុំសិង្ហ ស្រុកអូរជ្រៅ ខេត្តបន្ទាយមានជ័យ។
តាមប្រភពពីសមត្ថកិច្ចខេត្តសៀមរាបដែលទៅទទួលយកជនសង្ស័យពីសមត្ថកិច្ចខេត្តបន្ទាយមានជ័យនោះ បានប្រាប់ថា ជនសង្ស័យទាំង២នាក់ដែលឃាត់ខ្លួនបាននោះមាន ១. ឈ្មោះ ទួន ទី ភេទប្រុស អាយុ៣៦ឆ្នាំ និង២-ឈ្មោះ តិច សត់ ភេទប្រុស អាយុ២៣ឆ្នាំ នៅភូមិគោកដូង ឃុំត្រីញ័រ ស្រុកពួក ខេត្តសៀមរាប ជាមេខ្យល់ ហើយអ្នកទាំង២នាក់ត្រូវឃាត់ខ្លួនតាមបញ្ជាលោកព្រះរាជអាជ្ញាអមសាលាដំបូងខេត្តសៀមរាប នៅថ្ងៃទី ៣០ ខែឧសភា ឆ្នាំ២០២០ វេលាម៉ោង១០និង៣០នាទីព្រឹក។
តាមចម្លើយសារភាពរបស់ជនសង្ស័យបានឱ្យដឹងថា ពួកខ្លួនទាំងពីរនាក់ បានទំនាក់ទំនងថៅកែនៅប្រទេសថៃ ( រាក់យ៉ង ) ត្រូវការកម្មករទេ ពេលនោះថៅកែថា «ត្រូវការ» ខ្លួនក៏ជ្រើសរើសពលករទាំងអស់នេះ ហើយដោយសន្យាថា មិនបាច់មានលិខិតឆ្លងដែនទេ គឺគេយកម្នាក់ 3000 បាតពីថៅកែ ហើយរត់ការឆ្លងដែនដល់រាក់យ៉ង ប្រទេសថៃ បានធ្វើការ ទើបថៅកែកាត់ប្រាក់ខែពីពលករវិញម្នាក់ ៣០០០បាត ។
ចំណែលឯពលករទាំង១៥នាក់បានឆ្លើយថា មេខ្យល់ទាំង២នាក់នេះ បានសន្យាថា នឹងនាំពួកខ្លួនទាំងអស់គ្នាទៅដល់ រាក់យ៉ង (ប្រទេសថៃ) បានការងារធ្វើ ទើបកាត់ប្រាក់ខែឈ្នួលម្នាក់ ៣០០០ បាតវិញ ការធ្វើដំណើរពុំមានលិខិតឆ្លងដែនទេ លុះដល់ព្រំដែនភូមិក្លិនទា ឃុំសឹង្ហ ក៏ត្រូវសមត្ថកិច្ចចាប់បានបញ្ជូនមកវិញតែម្តង។
ក្រោយពីបានទទួលដំណឹងពីការឃាត់ខ្លួនបានបុរស២នាក់ ដែលបាននាំប្រជាពលរដ្ឋពីខេត្តសៀមរាប ទៅធ្វើការនៅក្រៅប្រទេសដោយឆ្លងដែនខុសច្បាប់ ចំនួន១៩នាក់ ត្រូវបានដឹកនាំដោយលោកជំទាវ យូ សុភា អភិបាលរងនៃគណៈអភិបាលខេត្ត តំណាងឲ្យលោក ទៀ សីហា អភិបាលនៃគណៈអភិបាលខេត្តសៀមរាប រួមទាំងអស់លោក លោកស្រីក្រុមការងារទទួលប្រជាពលរដ្ឋវិលត្រឡប់ពីក្រៅប្រទេស ដើម្បីទៅទទួលបងប្អូនពីអាជ្ញាធរឃុំ សិង្ហ ស្រុកអូរជ្រៅ ខេត្តបន្ទាយមានជ័យ ។
តាមការបញ្ជាក់របស់លោកអាជ្ញាធរខេត្តបន្ទាយមានជ័យ បានឲ្យដឹងថា នៅម៉ោង២២និង ៣០នាទីនារាត្រីថ្ងៃទី២៨ ខែឧសភា ដោយទទួលព័ត៌មានពីអ្នកចាំចំការថា មានបងប្អូនពលរដ្ឋ និងកូនតូចៗចំនួន១៩នាក់ មកពីស្រុកពួក ខេត្តសៀមរាប ធ្វើដំណើរតាមរយៈមេខ្យល់ យកមកទម្លាក់ចោលឲ្យដេកនៅកណ្តាលព្រៃចំការ ចំណុចក្លិនទា ភូមិរុន ឃុំសិង្ហ ស្រុកអូរជ្រៅ ខេត្តបន្ទាយមានជ័យ ហើយនៅពេលសួរនាំពួកគាត់ថា គឺដោយសារអ្នកបើករថយន្តនោះវង្វេងផ្លូវ ហើយទម្លាក់ពួកគាត់ទុកនៅក្នុងព្រៃ និងបានបើករថយន្តរត់ចោលបាត់ ។ ក្រោយមកត្រូវបានលោក ម្លិះ ប៊ុនថន បានដឹកតាមរថយន្តនាំមកឲ្យសម្រាកនៅផ្ទះរបស់ខ្លួន លុះព្រឹកថ្ងៃទី២៩ ឧសភានេះ ក៏ដឹកយកមកប្រគល់ឲ្យសាលាឃុំសិង្ហ រង់ចាំអាជ្ញាធរខេត្តសៀមរាប មកទទួលយក។
ក្នុងឱកាសទទួលបងប្អូនប្រជាពលរដ្ឋទាំង១៩នាក់នោះ លោកជំទាវ យូ សុភា ក៏ធ្វើការណែនាំ និងផ្សព្វផ្សាយពីសេចក្តីជូនដំណឹងរបស់រាជរដ្ឋាភិបាល ស្តីពីការទប់ស្កាត់ប្រជាពលរដ្ឋខ្មែរកុំឲ្យឆ្លងដែនដោយខុសច្បាប់ ចូលទៅប្រទេសជិតខាង តាមច្រករបៀងនានា និងសុំឲ្យបងប្អូនកុំឲ្យចាញ់ឧបាយកលរបស់មេខ្យល់ ដោយនាំឆ្លងដែនខុសច្បាប់ទៅប្រទេសជិតខាង ខណៈពេលដែលប្រទេសបជិតខាងកំពុងដាក់ប្រទេសក្នុងគ្រាអាសន្ន ដើម្បីបង្ការ ទប់ស្កាត់ការរីករាលដាលនៃជំងឺកូវីដ១៩ ។
លោកជំទាវក៏បានលើកផងដែរថា ទោះបីមានភាពធូរស្រាលពីជំងឺកូវីដ១៩ នៅកម្ពុជាក៏ពិតមែន តែភាពក្តៅគគុកនៅលើពិភពលោកនៅតែបន្តរីករាលដាល សំខាន់នៅប្រទេសជិត ខាងយើងនេះ ក៏នៅតែប្រឈមទៅនឹងបញ្ហាជំងឺកូវីដ១៩នេះនៅឡើយ ព្រមទាំងបន្តដាក់ប្រទេសរបស់ខ្លួនក្នុងគ្រាអាសន្នទៀតផង ។
ដោយកត្តានេះ ហើយបានប្រមុខរាជរដ្ឋាភិបាល និងក្រសួងសុខាភិបាល បន្តវិធានការ ការ ពារជំងឺឆ្លងកូវីដ១៩ នឹងត្រូវអនុវត្តគ្មានទីបញ្ចប់ បើសិនជាស្ថានភាពពិភពលោកត្រូវអូសបន្លាយបន្តទៀត ដើម្បីបង្កើននូវការប្រុងប្រយ័ត្នខ្ពស់ ចំពោះរលកទី២នៃជំងឺកូវីដ១៩នេះ ហើយបច្ចុប្បន្ននេះ ជនសង្ស័យទាំង២នាក់ ត្រូវបានកម្លាំងជំនាញរៀបចំកសាងសំណុំរឿងបញ្ជូនខ្លួនទៅកាន់តុលាការខេត្ត ដើម្បីចាត់ការបន្តតាមនីតិវិធីច្បាប់៕ (កែសម្រួលដោយ ៖ បុប្ផា)
ចែករំលែកព័តមាននេះ