ខេត្តព្រះសីហនុ ៖ សម្តេចតេជោ ហ៊ុន សែន នាយរដ្ឋមន្ត្រីកម្ពុជាបានថ្លែងឲ្យដឹងថា សម្តេចកំពុងជម្រុញជប៉ុនក្នុងការសាងសង់ឲ្យបានលឿនបំផុតនូវកំពង់ផែទឹកជ្រៅ ដើម្បីអភិវឌ្ឍវិស័យដឹកជញ្ជូន និងការផ្ទេរទំនិញតាមផ្លូវទឹកឲ្យកាន់តែប្រសើរឡើង ។
នាឱកាសអញ្ជើញជួបសំណេះសំណាលជាមួយមន្ត្រីរាជការ និងក្រុមការងារបច្ចេកទេសស្ថាបនាហេដ្ឋារចនាសម្ព័ន្ធផ្លូវក្រុង ក្នុងខេត្តព្រះសីហនុនាថ្ងៃទី ០១ មិថុនា សម្តេចតេជោ បានមានប្រសាសន៍ថា រាជរដ្ឋាភិបាលនឹងអភិវឌ្ឍខេត្តព្រះសីហនុ «ឲ្យក្លាយទៅជាទីក្រុងពហុបំណង» ។ ព្រោះទីក្រុងមួយនេះ ដើរតួជាមជ្ឈមណ្ឌលដឹកជញ្ជួន សម្រាប់តភ្ជាប់ពីផ្លូវទឹកទៅផ្លូវគោក និងពីផ្លូវគោកទៅផ្លូវទឹក ។ ការដឹកជញ្ជូនតភ្ជាប់ផ្លូវអាកាសពីក្នុងប្រទេស និងពីក្រៅប្រទេសចូលមកព្រលានយន្តហោះកងកេង ។
សម្តេចបានបញ្ជាក់ថា ខេត្តព្រះសីហនុ ក៏ជាកន្លែងតំបន់ឧស្សាហកម្ម ដែលបច្ចុប្បន្នមានតំបន់សេដ្ឋកិច្ចពិសេស ២ គឺមួយវិនិយោគដោយចិន និងមួយទៀតវិនិយោគដោយជប៉ុន ។
អញ្ចឹងបើយើងពិនិត្យមើលនៅទីនេះ ខេត្តព្រះសីហនុជាខេត្តចូលរួមអភិវឌ្ឍដោយពហុជាតិសាសន៍ ដូចជាជប៉ុនបានផ្តល់ហិរញ្ញប្បទាននិងជួយយើងឲ្យពង្រីកកំពង់ផែទឹកជ្រៅ ខេត្តព្រះសីហនុ ដែលនេះខ្ញុំបាននិយាយជាមួយនាយករដ្ឋមន្ត្រីជប៉ុន ហ្ស៊ីនហ្សូ អាបេ ឲ្យបន្តការខិតខំ ដើម្បីជម្រុញយ៉ាងម៉េច ឲ្យកំពង់ផែរបស់យើងនេះក្លាយជាកំពង់ផែទឹកជ្រៅ ដែលមានជម្រៅទឹកដូចជា ១៤,៥ ម៉ែត្រ ឲ្យបានឆាប់បំផុត ដើម្បីជៀសវាងការដឹកជញ្ជួនដែលត្រូវផ្ទេរ នៅសាំងហ្គាពួរ ឬត្រូវផ្ទេរនៅវៀតណាមរួចហើយទើបចូលមកកម្ពុជា ។
សម្តេចតេជោ បានបន្តថា «ខ្ញុំបានលើកជាមួយឯកឧត្តម អាបេ ឲ្យយកចិត្តទុកដាក់បញ្ហាហ្នឹង ។ ជប៉ុនបានស្ម័គ្រស្មោះជួយយើងតាំងពីដើមមក» ។ សម្តេចបានបន្ថែមថា បើតាមការចង់ចាំរបស់សម្តេច គឺឆ្នាំ ១៩៩៩ ជាឆ្នាំយើងទទួលយកឥណទានពីជប៉ុន ។ ហេតុអីបានចាំដល់ ១៩៩៩ បានចុះហត្ថលេខា ? ត្រង់នេះ គឺថាសម័យដើមមានការជំពាក់លុយជប៉ុន គិតទាំងការ ទាំងដើម និងពិន័យ ។
អញ្ចឹងជប៉ុនមានកម្មវិធីដោះបំណុលឲ្យកម្ពុជា។ គាត់ទិញសម្ភារៈសិង្កសី ប្រេងកាត និងទំនិញជប៉ុនផ្សេងៗយកមកប្រគល់ឲ្យកម្ពុជា ។ អញញ្ចឹងកម្ពុជាលក់បានហើយយកលុយសងជប៉ុន ។ ហើយជប៉ុនយកលុយដែលកម្ពុជាសងហ្នឹង មកទ្រទ្រង់ ផ្តល់ជំនួយដល់កម្ពុជា ។ អញ្ចឹងជប៉ុនឲ្យយើងឌុប ។ ឲ្យទំនិញមកយើងលក់ លក់បានលុយយកសងជប៉ុន បន្ទាប់មកជប៉ុនយកលុយនោះ មកជួយទ្រទ្រង់ខ្មែរវិញ ។ រហូតដល់ឆ្នាំ ១៩៩៩ យើងចាប់ផ្តើមចុះហត្ថលេខាយកឥណទានដំបូងអភិវឌ្ឍកំពង់ផែ ៕ (កែសម្រួលដោយ ៖ បុប្ផា)
ចែករំលែកព័តមាននេះ