ប្រទេសអង់គ្លេស ៖ យោងតាមសេចក្តីប្រកាសពីលីគបាល់ទាត់អង់គ្លេស (EFL) បានបញ្ជាក់កាលពីថ្ងៃសៅរ៍ថា មនុស្សចំនួន ១០នាក់មកពីក្លិបចំនួន៨ ក្នុងក្របខណ្ឌ Championship បានធ្វើតេស្តវិជ្ជមានវីរុសកូវីដ-១៩…
ប្រទេសអង់គ្លេស ៖ យោងតាមសេចក្តីប្រកាសពីលីគបាល់ទាត់អង់គ្លេស (EFL) បានបញ្ជាក់កាលពីថ្ងៃសៅរ៍ថា មនុស្សចំនួន ១០នាក់មកពីក្លិបចំនួន៨ ក្នុងក្របខណ្ឌ Championship បានធ្វើតេស្តវិជ្ជមានវីរុសកូវីដ-១៩ ខណៈដែលក្របខណ្ឌ Premier League បានថាគ្មានករណីឆ្លងថ្មី លើលទ្ធផលធ្វើតេស្តចុងក្រោយ ។
នៅក្នុងសេចក្តីថ្លែងការណ៍របស់ EFL បានឱ្យដឹងថា កីឡាករ និងបុគ្គលិកចំនួន ១.០៥៨ នាក់មកពីក្លិបចំនួន ២៤ របស់ក្របខណ្ឌលំដាប់ទីពីរអង់គ្លេស (Championship) ត្រូវបានធ្វើតេស្តកាលពីថ្ងៃព្រហស្បតិ៍ និងថ្ងៃសុក្រ។ ក្នុងនោះជាលទ្ធផលត្រឡប់មកវិញ គឺមានមនុស្សចំនួន ១០នាក់មកពីក្លិបចំនួន ៨ ដែលមិនត្រូវបានបញ្ចេញឈ្មោះ មានសញ្ញាវិជ្ជមានកូវីដ-១៩ ។
សេចក្តីថ្លែងការណ៍បានបន្តទៀតថា កីឡាករ ឬបុគ្គលិកក្លិបណា ដែលបានធ្វើតេស្តវិជ្ជមាន នឹងត្រូវផ្តាច់ខ្លួននៅដោយឡែកពីគេរយៈពេលមួយសប្តាហ៍ ស្របតាមគោលការណ៍ណែនាំ ដែលផ្តល់ដោយ EFL ហើយមានតែអ្នកដែលបានធ្វើតេស្តិ៍អវិជ្ជមានប៉ុណ្ណោះ ដែលត្រូវបានអនុញ្ញាតឱ្យចូលក្នុងជំរំហ្វឹកហាត់ ។
បើទោះបីជា EFL មិនបានបញ្ជាក់ពីបុគ្គលឆ្លងក៏ដោយ ប៉ុន្តែក្លិប Preston North End បានបញ្ជាក់ថាខ្សែប្រយុទ្ធអង់គ្លេស Jayden Stockley បានធ្វើតេស្តវិជ្ជមានលើវីរុសនេះ ។
សូមបញ្ជាក់ថា ព័ត៌មាននេះបានកើតឡើង បន្ទាប់ពីការធ្វើតេស្តចុងក្រោយរបស់ក្របខណ្ឌ Premier League ដែលបានបញ្ជាក់ថា មិនមានករណីវិជ្ជមានថ្មី នៅក្នុងការធ្វើតេស្តដំណាក់កាលទី ៣ ។ ខណៈដែលក្របខណ្ឌកំពូលមួយនេះ បានរកឃើញ ១២ករណីឆ្លងរួចមកហើយ ។
សូមបញ្ជាក់ថាទាំងក្របខណ្ឌ Championship, League One និង League Two នៅមិនទាន់ធ្វើការប្រកាសជាផ្លូវការណាមួយ ជុំវិញកាលបរិច្ឆេទវិលត្រឡប់មកកាន់សកម្មភាពប្រកួតប្រជែងវិញនៅឡើយទេ។ ដោយបច្ចុប្បន្នបញ្ហាមួយចំនួន កំពុងត្រូវបានពិភាក្សា ដោយក្នុងនោះវិបត្តិហិរញ្ញវត្ថុគឺជាបញ្ហាចំបងសម្រាប់ក្លិបមួយចំនួន ៕ (ដកស្រង់ចេញពី Goal.com)
ចែករំលែកព័តមាននេះ