យុវជន​ម្នាក់​ត្រូវ​ចាប់ខ្លួន​ក្រោយ​រួម​ភេទ​ជាមួយ​ក្មេង​ស្រី​រហូត​មាន​ផ្ទៃពោះ​


ខេត្តកណ្ដាល​ ៖ ​យុវជន​ម្នាក់​ត្រូវ​បាន​ក​ម្លាំ​ង​នគរបាល​ប៉ុស្តិ៍​បែក​ចាន​និង​ព្រហ្មទណ្ឌ​ស្រុក​អង្គស្នួល​ធ្វើការ​ចាប់ខ្លួន​បញ្ជូន​ទៅ​កាន់​សាលាដំបូង​ខេត្តកណ្ដាល​ចាត់ការ​តាម​ច្បាប់ ក្រោយ​ពេល​ដែល​យុវជន​រូប​នេះ​មាន​ទំនាក់ទំនង​ស្នេហា​ជាមួយ​ក្មេង​ស្រី​អាយុ​ជាង​១៣​ឆ្នាំ​ម្នាក់​ហើយ​លួងលោម​រួម​ភេទ​ជា​បន្តបន្ទាប់​រហូត​នាង​មាន​ផ្ទៃពោះ​ជិត​៤​ខែ​ទៅ​ហើយ ។​ មិនតែប៉ុណ្ណោះ​យុវជន​នោះ​ប្រើប្រាស់​គ្រឿងញៀន បន្ទាប់​មក​មាន​ទំនាស់​គ្នា​យ៉ាង​ខ្លាំង​ស្ទើរតែ​ប្រើ​ហឹ​ង្សា​ដាក់​នាង​ទៀត ត្រូវ​បាន​ស្ត្រី​ជា​ម្ដាយ​របស់​​ក្មេងស្រី​​ប្ដឹង ​និង​នាំ​ខ្លួន​ទៅ​ប្រគល់​ឲ្យ​នគរបាល​ប៉ុស្តិ៍​បែក​ចាន​និង​នគរបាល​ព្រហ្មទណ្ឌ​ស្រុក​អង្គស្នួល​ឃាត់ខ្លួន​កាលពី​ថ្ងៃ​ទី​៣០ ខែ
ឧសភា ឆ្នាំ​២០២០​។

យុវជន​​ដែលត្រូវឃាត់ខ្លួន​ខាងលើ​​ឈ្មោះ​ហុង សុខ​ខា ​អាយុ​២៤​ឆ្នាំ​ មុខរបរ​មិន​ពិតប្រាកដ​ មាន​ទីលំនៅ​ក្នុងភូមិ​ត្រពាំង​សុ​ក្រម ឃុំ​បែក​ចាន ស្រុក​អង្គស្នួល ខេត្តកណ្តាល​ ។ ​ចំណែក​ក្មេង​ស្រី​​​មាន​អាយុ​ទើបតែ​ជាង​១៣​ឆ្នាំ​ប៉ុណ្ណោះ នេះ​​បើ​យោង​តាម​សំបុត្រ​កំណើត​របស់​នាង​។

នគរបាល​ព្រហ្មទណ្ឌ​ស្រុក​អង្គស្នួល​បាន​ប្រាប់​ឲ្យ​ដឹង​ថា អ្នក​ទាំង​២​​មាន​ទំនាក់ទំនង​ស្នេហា​កាលពី​​ចុងឆ្នាំ​២០១៩​កន្លង​ទៅ​នេះ ហើយ​ក្រោយ​ពី​ស្គាល់​ចិត្តថ្លើម​និង​ស្រឡាញ់​ដកចិត្ត​ពុំ​រួច​រៀង​ៗ​ខ្លួន ​រហូត​ដល់​ថ្ងៃ​ទី​១០ ខែធ្នូ ឆ្នាំ​២០១៩ បាន​ឈាន​ដល់​ការ​រួម​ភេទ​ជាមួយ​គ្នា​ ។ ​លុះ​ក្រោយ​ៗ​មក​ទៀត​អ្នក​ទាំង​២​បាន​ដេក​នៅ​ជាមួយ​គ្នា​ជា​បន្តបន្ទាប់​រហូត​​នាង​មាន​ផ្ទៃពោះ ហើយ​នៅ​ថ្ងៃ​ទី​១៤ ខែឧសភា ឆ្នាំ​២០២០ បាន​ទៅ​ពិនិត្យ​ផ្ទៃពោះ​នៅ​ឯ​មន្ទី​ពេទ្យ​បង្អែក​ស្រុក​អង្គស្នួល ជា​លទ្ធផល​គ្រូពេទ្យ​បាន​ប្រាប់​ថា ទារក​ក្នុង​ផ្ទៃ​របស់​នាង​មាន​អាយុ​១៥​ស​ប្តា​ហ៍​និង​៤​ថ្ងៃ​ទៅ​ហើយ​។

តាម​ប្រភព​ដដែល​បាន​បន្ត​ថា អ្នក​ទាំង​២​បាន​រស់នៅ​ផ្ទះ​ខាង​ស្រី​ ហើយ​មានការ​ដឹង​ឮ​ពី​ក្រុម​គ្រួសារ​ទាំង​សងខាងផងដែរ​ ប៉ុន្តែ​អ្វី​ដែល​ជា​ឧ​ប​ស័គ្គ​ធំ​នោះ​មាន​២​យ៉ាង​គឺ ទី​១-​យុវជន​ខាងលើ​សេព​គ្រឿងញៀន​និង​តែងតែ​មានរឿង​ទំនាស់​កើតឡើង និង​ទី​២-ក្មេង​ស្រី​​មាន​អាយុ​នៅ​ក្រោម​១៥​ឆ្នាំ​នៅឡើយ​ ដែល​ច្បាប់​មិន​អនុញ្ញាតឲ្យ​រួម​ភេទ​នោះ​ទេ​។​

តាម​ប្រភពដដែល​បាន​បន្តទៀត​ថា ទោះបី​ជា​បែប​នេះ​ក្ដី​ គ្មាន​សមត្ថ​ក​ិច្ច​ណាមួយ​ទៅ​រករឿង​អ្នក​ទាំង​២​ឡើយ តែ​រហូត​ដល់​ដល់​ថ្ងៃ​ទី​២៩ ខែឧសភា ឆ្នាំ​២០២០ ស្រាប់តែ​អ្នក​ទាំង​២​មាន​ទំនាស់​ពាក្យ​សម្ដី​គ្នា​យ៉ាង​ខ្លាំង​ស្ទើរតែ​ក្លាយទៅជា​ហិ​ង្សា ​ទើប​ម្ដាយ​ខាង​ស្រី​ទៅ​ដាក់​ពាក្យ​ប្ដឹង​និង​នាំ​ខ្លួន​ទៅ​ប្រគល់​ជូន​នគរបាល​ប៉ុស្តិ៍​បែក​ចាន​និង​នគរបាល​ផ្នែក​ព្រហ្មទណ្ឌ​ស្រុក​អង្គស្នួល​សាកសួរ​និង​កសាង​សំណុំរឿង​បញ្ជូន​ទៅ​កាន់​សាលាដំបូង​ខេត្តកណ្ដាល​ ដើម្បី​ចាត់ការ​តាម​ច្បាប់​តែ​ម្ដង​៕​ (កែសម្រួលដោយ ៖ ធីតា​)

ព្រឹត្តិការណ៍សង្គម

Sponsored News

ការស្ទង់មតិគេហទំព័រថ្មី




សូម​អរគុណ