រាជធានីភ្នំពេញ ៖ បន្ទាប់ពីបាត់មុខយូរត្រឡប់មកវិញ សួន ចាន់នី មកពីក្លិបបក្សីស្លាបដែក ត្រូវបានគេរៀបចំឱ្យជួបប្រកួតជាមួយឈាង ហុង មកពីក្លិបខ្លារខិនមានរិទ្ធ ដើម្បីសាកវិជ្ជាគុនគ្នានៅលើសង្វៀនបិទទ្វារស៊ីអិនស៊ី…
រាជធានីភ្នំពេញ ៖ បន្ទាប់ពីបាត់មុខយូរត្រឡប់មកវិញ សួន ចាន់នី មកពីក្លិបបក្សីស្លាបដែក ត្រូវបានគេរៀបចំឱ្យជួបប្រកួតជាមួយឈាង ហុង មកពីក្លិបខ្លារខិនមានរិទ្ធ ដើម្បីសាកវិជ្ជាគុនគ្នានៅលើសង្វៀនបិទទ្វារស៊ីអិនស៊ី នាថ្ងៃអាទិត្យស្អែកនេះ ក្នុងកម្មវិធីប្រដាល់អ្នកតស៊ូគុនខ្មែរគោជល់ ។
សួន ចាន់នី និងឈាង ហុង មិនធ្លាប់ជួបប្រកួតគ្នាពីមុនមកទេ ។ សម្រាប់ឈាង ហុងមួយរយៈមកនេះមិនដែលឃើញបង្ហាញខ្លួននៅលើសង្វៀនញឹកញាប់ដូចមុនទាល់តែសោះ។មុនពេលបាត់ខ្លួនមួយរយៈធំ ឈាង ហុងគឺជាអ្នកប្រដាល់ជើងខ្លាំងលំដាប់ជួរមុខមួយរូបដែរ តាមរយៈនៃការប្រើស្នៀតកែងនិងជង្គង់ដ៏ពូកែរបស់គេ។
ប៉ុន្តែពេលបង្ហាញខ្លួនកាលពីកន្លះខែមុនហាក់ចុះខ្សោយសមត្ថភាពជាងមុនដោយចាញ់ពិន្ទុ មឿន សុខហ៊ុច ដែលជាអ្នកប្រដាល់ទើបតែឡើងកូដ ។ ទោះបីជាយ៉ាងណាសម្រាប់ការមកប៉ះជាមួយសួន ចាន់នី លើកនេះប្រហែលជាមិនសូវបារម្ភប៉ុន្មានទេ ព្រោះបើធ្វើការប្រៀបធៀបមាឌ កម្ពស់ និងកម្លាំងគឺប្រហាក់ប្រហែលគ្នា អាចស៊ីសងគ្នាបាន។
មួយគូទៀត ឡុង សំណាង មកពីក្លិបសាលវ័ន្តកីឡា ត្រូវបានគេរៀបចំឱ្យជួបប្រកួតជាមួយសេក គឹមរួន មកពីក្លិបអង្គរមានជ័យខេត្តសៀមរាប ។ គេនៅចាំបានថា កាលពីសប្ដាហ៍មុន ឡុង សំណាង ត្រូវបានកីឡាករ មឿន សុខហ៊ុច វាយឱ្យបោះបង់ការប្រកួតត្រឹមទឹកទី២ម្ដងរួចមកហើយ ។ ចំណែកលើកនេះគេត្រូវបានគណៈកម្មការរៀបចំការប្រកួតរៀបចំឱ្យជួបប្រកួតជាមួយសេក គឹមរួនវិញម្ដង ។ រវាងគូនេះថ្វីដៃប្រកួតមិនលើសគ្នាទេ ម្យ៉ាងវិញទៀត សេក គឹមរួន មួយរយៈមកនេះការប្រកួតរបស់គេចាញ់ច្រើនជាងឈ្នះ ធ្វើឱ្យគេមានជំនឿចិត្តលើ ឡុង សំណាងច្រើនជាង ព្រោះឡុង សំណាងមិនត្រឹមតែមានប្រៀបខាងកម្ពស់ប៉ុណ្ណោះទេសូម្បីតែល្បិចប្រយុទ្ធក៏ល្អជាងសេក គឹមរួនដែរ ។
ក្រៅពីគូឯកនិងគូរងឯកនេះទៅ នៅលើសង្វៀនដដែលក៏មានការប្រកួតមិត្តភាពចំនួន២គូទៀត ។ កីឡាករ ផាន រះ មកពីក្លិបជ្រៃសែនជ័យខេត្តកំពង់ស្ពឺ ប្រកួតជាមួយកីឡាករសោ វិឆ័យ មកពីក្លិបវិបុលដារិទ្ធខណ្ឌពោធិសែនជ័យ និងកីឡាករ ហេង វិឆ័យ មកពីក្លិបកងពលតូចថ្មើរជើងលេខ៧០ ប្រកួតជាមួយកីឡាករតូច ទូមកពីក្លិបឃ្លាំងមឿងកីឡា ៕ (កែសម្រួលដោយ ៖ បុប្ផា)
ចែករំលែកព័តមាននេះ