រាជធានីភ្នំពេញ ៖ ជនសង្ស័យ១ក្រុមមានគ្នា៦នាក់ត្រូវបានកម្លាំងនគរបាលនៃអធិការដ្ឋានខណ្ឌដង្កោដឹកនាំដោយលោកអធិការ ជឹម សុីថា ធ្វើការស្រាវជ្រាវចាប់ខ្លួនបានទាំងសម្បុក ខណៈក្រុមជនទាំងនោះប្រើយុទ្ធសាស្ត្រត្រីងៀតឆ្លៀតពងគឺធ្វើជាកម្មករសំណង់ ប៉ុន្តែធាតុពិតបានឆ្លៀតធ្វើសកម្មភាពជួញដូរគ្រឿងមួយមុខទៀត ។
ប្រតិបត្តិការបង្ក្រាបករណីខាងលើនេះបានធ្វើឡើងកាលពីវេលាម៉ោង១និង២០នាទីរសៀលថ្ងៃទី២៨ ខែឧសភា ឆ្នាំ២០២០ នៅក្នុងការដ្ឋានសំណង់បុរីភ្នំពេញសុខសាន្ត ស្ថិតនៅនៅក្នុងភូមិធម្មត្រ័យ សង្កាត់ព្រៃស ខណ្ឌដង្កោ រាជធានីភ្នំពេញ។
ជនសង្ស័យដែលត្រូវឃាត់ខ្លួនទាំង៦នាក់ខាងលើនោះរួមមាន១-ឈ្មោះ ជី ផាន់ណា ភេទប្រុស អាយុ២៩ឆ្នាំ ២-ឈ្មោះ លៀម ហះ ភេទប្រុស អាយុ២៧ឆ្នាំ ៣-ឈ្មោះ សូរ កែវមុន្នី ហៅ កែវ ភេទប្រុស អាយុ៣៧ឆ្នាំ ៤-ឈ្មោះ ហេង សុខម៉េង ហៅ ម៉េង ភេទប្រុស អាយុ៣៥ឆ្នាំ ៥-ឈ្មោះ ជាន ជា ភេទប្រុស អាយុ៣០ឆ្នាំ និង៦-ឈ្មោះ មុត សាត ភេទប្រុស អាយុ២៦ឆ្នាំ ។ ជនសង្ស័យទាំង៦នាក់នេះមានមុខរបរជាកម្មករសំណង់ ស្នាក់នៅក្នុងការដ្ឋានសំណង់បុរីមួយកន្លែង ស្ថិតនៅភូមិធម្មត្រ័យ សង្កាត់ព្រៃស ខណ្ឌដង្កោ រាជធានីភ្នំពេញ។
ក្រោយពេលឃាត់ខ្លួនរួចហើយ នគរបាលដកហូតបានវត្ថុតាងមួយចំនួនរួមមាន ថ្នាំញៀនចំនួន១៨កញ្ចប់ក្នុងនោះកញ្ចប់តូចចំនួន១៧កញ្ចប់និងកញ្ចប់ធំល្មម១កញ្ចប់, ទុយោចូកថ្នាំញៀន១, ទូរស័ព្ទចំនួន៣គ្រឿង, និងសម្ភារៈសម្រាប់ប្រើប្រាស់គ្រឿងញៀនមួយចំនួន ។
នគរបាលបានប្រាប់ឲ្យដឹងថា កម្លាំងសមត្ថកិច្ចនគរបាលខណ្ឌដង្កោដឹកនាំដោយលោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ ដែលមានការចូលរួមដោយលោកវរសេនីយ៍ទោ សូរ វិសាល អធិការរងនគរបាលខណ្ឌដង្កោ និងលោកវរសេនីយ៍ត្រី ស៊ុំ សារី នាយប៉ុស្តិ៍នគរបាលរដ្ឋបាលព្រៃស បានធ្វើការស្រាវជ្រាវរកមុខសញ្ញាប្រព្រឹត្តបទល្មើសផ្សេងៗនៅក្នុងមូលដ្ឋាន ។ ខណៈនោះបានទទួលព័ត៌មានពីប្រជាពលរដ្ឋថា មានមុខសញ្ញាជួញដូរដោយខុសច្បាប់នូវសារធាតុញៀន១ក្រុមកំពុងធ្វើសកម្មភាពយ៉ាងសកម្មនៅក្នុងការដ្ឋានសំណង់ខាងលើ បន្ទាប់មកកម្លាំងក៏បានចុះទៅបង្ក្រាបនិងចាប់ខ្លួនបានទាំងសម្បុកតែម្ដង។
ក្រោយពេលចាប់ខ្លួនរួចហើយ កម្លាំងសមត្ថកិច្ចបានឆែកឆេររកឃើញវត្ថុតាងខាងលើ និងធ្វើការដកហូត ព្រមទាំងឃាត់ខ្លួនជនសង្ស័យទាំងនោះរួមទាំងវត្ថុតាងទៅកាន់អធិការដ្ឋានខណ្ឌដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ