ខេត្តកណ្ដាល៖ មុខរបរជាងទងឆ្លាក់ប្រាក់ ឈើ និងស្ពាន់ នៅក្នុងឃុំកំពង់ហ្លួង ស្រុកពញាឮ ខេត្តកណ្តាល ចម្ងាយជាង៣០គីឡូម៉ែត្រខាងជើងរាជធានីភ្នំពេញ នាពេលបច្ចុប្បន្ននៅតែ២ទៅ៣គ្រួសារប៉ុណ្ណោះ ។ ដូច្នេះហើយនៅឃុំកំពង់ហ្លួងមិនឮសូរសំឡេងដំដែក ដំលោហធាតុលាន់ឮយ៉ាងរំពងដូចពីមុនទៀតឡើយ ។
លោកជុំ កុសល អាយុ៥៤ឆ្នាំ រស់នៅភូមិពោធិ៍តូច ប្រកបរបរជាងទងឆ្លាក់ប្រាក់ជាង២០ឆ្នាំមកហើយ ។ នាពេល ថ្មីៗកន្លងមកលោកឲ្យដឹងថា ពីមុនប្រជាជន៩០ភាគរយក្នុងឃុំមានមុខជំនាញផ្នែកចម្លាក់ជាងទងបន្ថែមលើមុខរបរធ្វើស្រែចម្ការ ។ គ្រាន់តែចូលទៅដល់ឃុំកំពង់ហ្លួងភ្លាម គេនឹងឮសូរសំឡេងដំដែកលាន់ឭរំពងរបស់អ្នកស្រុកដែលកំពុងមមាញឹកផលិតរូបចម្លាក់ ផ្សេងៗអំពីប្រាក់ ឈើ និងស្ពាន់ ទៅតាមការបញ្ជាទិញ និងសម្រាប់លក់ជូនអ្នកទេសចរ ។ ជំនាញចម្លាក់ជាងទងរបស់អ្នកស្រុក គឺរៀន តៗគ្នាពីជីដូនជីតា ឪពុកម្តាយ ទៅ កូនៗ ពុំបានទៅរៀននៅសាលាជំនាញណាមួយទេ ។
លោកជុំ កុសល និយាយថា «ជំនាញ និងទេពកោសល្យនៃចម្លាក់ជាងទងនេះ បានផ្តល់ទៅឲ្យមនុស្សគ្រប់វ័យរាប់តាំងពីកុមារ តូចៗឡើងទៅ ។ អាស្រ័យហេតុនេះបានធ្វើឲ្យឃុំកំពង់ហ្លួងសំបូរទៅដោយជាងទងចម្លាក់ប្រាក់ច្រើនជាងគេ។ ក៏ប៉ុន្តរយៈពេលប៉ុន្មានឆ្នាំចុងក្រោយនេះ ឃុំកំពង់ហ្លួងហាក់ដូចជាស្ថិតនៅភាពស្ងប់ស្ងាត់ភ្ញៀវជាតិ និងអន្តរជាតិ ចូលមកទិញ ក៏ដូចជាកុម្ម៉ង់ទិញរូបចម្លាក់ដែលធ្វើអំពីប្រាក់ ឈើ និងស្ពាន់ក្រោយពេលមានការកើតជំងឺកូវីដ១៩ ។ នៅក្នុងភូមិនេះគឺមានតែផ្ទះរបស់គាត់មួយប៉ុណ្ណោះដែលនៅប្រកបមុខរបរជាងទងចម្លាក់ប្រាក់ និងស្ពាន់រហូតសព្វថ្ងៃ បើទោះជាស្ងាត់ម៉ូយកុម្ម៉ង់ទិញដោយសារកើតជំងឺកូវីដ១៩ក៏ដោយ ។
មុខរបរជាងទងចម្លាក់របស់អ្នកភូមិពោធិ៍តូចនាពេលបច្ចុប្បន្ន ហាក់ដូចជានាំគ្នាបោះបង់មុខរបរនេះទាំងស្រុងហើយ ហើយយើងក៏លែងឮសូរសំឡេងដំដែកលាន់ឮរំពងដូចពីមុនទៀតហើយ»។
លោកម៉ាត់ រ៉ូហ្សា ខ្មែរអ៊ិស្លាមរស់នៅភូមិ ពោធិ៍តូច ដែរចាប់មុខរបរជាងទង ច្រើនឆ្នាំមកហើយ ។ លោកថា «ជំនាញនេះខ្ញុំចេះតពីឪពុក ហើយក៏ជាជំនោរចំណង់របស់ខ្ញុំដែលស្រឡាញ់មុខរបរនេះ ម្យ៉ាងទៀតចង់ឲ្យបរទេសគេដឹងអំពីស្នាដៃរបស់ខ្មែរយើងក្នុងការឆ្លាក់រូបដែលធ្វើអំពីប្រាក់ ឈើ និងស្ពាន់ ដែលធ្វើដោយដៃ ពិតៗ ។ រយៈជិត២០ឆ្នាំកន្លងមកនេះ វត្ថុដែលខ្ញុំបានធ្វើ ដូចជាប្រអប់ កូនដំរី កូនចាប ថង់រោង ផ្តិល ពានរង្វាន់ ធំៗ និងរូបជាច្រើនទៀត ។
ចម្លាក់ប្រាក់ជាការងារមួយដែលទាមទារការយកចិត្តទុកដាក់ និងការដាក់អារម្មណ៍ឲ្យបានច្រើនទៅតាមក្បាច់ នីមួយៗ ។ ការងារចម្លាក់ប្រាក់នេះបានប្រើពេលវេលាយូរ ទើបអាចបានជាផលិតផលសម្រចមួយដែលល្អ» ។
លោកមម៉ាត់ រ៉ូហ្សា បញ្ជាក់ថា បើក្បាច់រយលោកអាចធ្វើតែមួយថ្ងៃ តែបើក្បាច់ធ្វើដោយផ្ចិតផ្ចង់ប្រើពេលយូរពីបីទៅបួនថ្ងៃឯណោះ ។ ប៉ុន្តែស្របពេលមានជំងឺកូវីដ១៩បានកើតឡើងនៅកម្ពុជា ភ្ញៀវបរទេសធ្លាក់ចុះដល់លេខសូន្យហើយគ្មានអ្នកកុម្ម៉ង់ទិញរូបចម្លាក់ ផ្សេងៗ ធ្វើឲ្យប្រជាជនដែលមានមុខរបរជាងចម្លាក់នៅឃុំកំពង់ហ្លួង បោះបង់មុខរបរនេះស្ទើរតែទាំងអស់ សូម្បីតែរូបលោកប្រហែលជាឈប់ប្រកបមុខរបរចម្លាក់នេះដែរ បើនៅតែគ្មានអ្នកកុម្ម៉ង់ទៀតនោះ ។
អ្នកស្រីកាម ម៉ារីយ៉ា អាយុ៥៤ឆ្នាំ រស់នៅភូមិកំពង់ចម្លង ឃុំកំពង់ហ្លួង អតីតឈ្មួញកណ្តាលទិញគ្រឿងចម្លាក់ប្រាក់ និងស្ពាន់ពីអ្នកភូមិពោធិ៍តូច និងភូមិកំពង់ចម្លងឲ្យដឹងថា អ្នកភូមិទាំងពីរនោះបានចាប់យកមុខរបរជាងទងឆ្លាក់ប្រាក់ និងស្ពាន់ តាំងពីសម័យសាធារណរដ្ឋខ្មែរមកម្ល៉េះ ។ ពីមុនអ្នកស្រីជាឈ្មួញកណ្តាលយកប្រាក់ និងស្ពាន់ដាក់តាមផ្ទះជាងទង ឲ្យពួកគេឆ្លាក់តាមអ្វីដែលអ្នកស្រីចង់បាន ។ មុខរបរជាងទងនេះ ប្រជាជនភូមិកំពង់ចម្លង និងភូមិពោធិ៍តូច ឃុំកំពង់ហ្លួង នាំគ្នាប្រកបរបរនេះស្ទើរគ្រប់ផ្ទះ ។ មកដល់សម័យនេះ ក៏នៅបន្តមុខរបរជាងទងដដែល ព្រោះវាជារបរតពីពីដូចតាមក ម្យ៉ាងវិញទៀតមិនចង់បាត់បង់ ។
អ្នកស្រីកាម ម៉ារីយ៉ា បញ្ជាក់ថា «ប្រហែល៦ឆ្នាំចុងក្រោយនេះ អ្នកប្រកបរបរជាងទងមួយចំនួនធំបានបោះបង់ជា បណ្តើរៗ ។ មូលហេតុដោយសារតែគ្មានអ្នកកុម្ម៉ង់ឲ្យធ្វើ ហើយបើបានម៉ូយឲ្យធ្វើរូបចម្លាក់អ្វីមួយ ត្រូវប្រើពេលយូរ រួចប្រាក់កម្រៃបានតិចតួចមិនសមនឹងតម្លៃពលកម្ម។ ដូច្នេះប៉ុន្មានឆ្នាំចុងក្រោយជាងទងទាំង២ភូមិផ្អាកប្រកបមុខរបរនេះតែម្តង ។ ជាក់ស្តែងដូចឃើញស្រាប់ ចាប់ពីក្បាលភូមិដល់ចុងភូមិទាំងអស់លែងឮសូរសំឡេងដំដែកលាន់ឮរំពងដូចកាលពីមុនទៀតហើយ ។
ចំណែកខ្ញុំក៏ឈប់ប្រកបមុខរបរទិញ ឬកុម្ម៉ង់គ្រឿងចម្លាក់ទៀតដែរ ដោយចាប់យកមុខរបរធ្វើជាគ្រូព្យាបាលជំងឺឫសដូងបាតវិញម្តង ដែលខ្ញុំចេះបន្តពីឪពុក ។ ដោយឡែកអ្នកភូមិកំពង់ចម្លងនិងភូមិពោធិ៍តូច នាំគ្នាបោះបង់មុខរបរជាងទងចម្លាក់ប្រាក់ស្ពាន់នេះ ខ្ញុំមានសោកស្តាយជាខ្លាំង តែមិនដឹងធ្វើម្តេចដោយសារជីវភាព និងគ្មានទីផ្សារផង »។
ម្ចាស់ហាងលក់គ្រឿងចម្លាក់ប្រាក់មួយកន្លែងនៅក្បែរចំណតរថយន្តបាត់ដំបង ក្នុងសង្កាត់ផ្សារថ្មី២ ខណ្ឌដូចពេញ ឲ្យដឹងថា បច្ចុប្បន្នហាងរបស់គាត់លក់គ្រឿងប្រាក់មិនសូវដាច់ទេ ក្រោយពីប្រទេសយើងកើតជំងឺកូវីដ១៩ ម្យ៉ាងទៀតគ្មានភ្ញៀវបរទេសចូលមក ។ ដោយឡែកការកុម្ម៉ង់ទិញរូបចម្លាក់ពីជាងទងក្នុងស្រុកឥឡូវពិបាកខ្លាំងណាស់ ព្រោះជាងទងនៅឃុំកំពង់ហ្លួង ស្រុកពញាឮ ហាក់ដូចជាបោះបង់មុខរបរចម្លាក់ស្ទើរពេញមួយឃុំនោះទៅហើយ ។
ប្រភពដដែលនិយាយថា«សូមប្រមុខរាជរដ្ឋាភិបាល ក៏ដូចជាក្រសួងពាក់ព័ន្ធ មេត្តាជួយរកទីផ្សារលក់គ្រឿងចម្លាក់នេះផង យើងត្រូវគាំទ្រសិប្បកម្មជាងទងចម្លាក់ខ្មែរធ្វើពីស្ពាន់ ប្រាក់ និងទង់ដែងដែលជាស្នាដៃខ្មែរ» ។
សិប្បកម្មជាងទងចម្លាក់ខ្មែរដ៏ល្អប្រណីត ធ្វើពីស្ពាន់ ប្រាក់ និងទង់ដែងមានច្រើនប្រភេទ និងច្រើនសណ្ឋាន តម្រូវតាមចំណូលចិត្តនៃចម្លាក់របស់អ្នកប្រើ ដោយគេឃើញមានដូចជាចម្លាក់ផ្តិល ក្អម ឆត្ររួត តុម្ភកំបោរ ប្រអប់ស្លា ប្រអប់ក្រដាសជូតមាត់ ប៉ាន់តែ រូបផ្លែល្ពៅ និងរូបសត្វនានាផងដែរ គឺបានរចនា និងសម្រិតសម្រាំងផ្ចិតផ្ចង់ពីក្រុមសិប្បកម្មភ្ញីទេស ។ ក្រុមសិប្បកម្មភ្ញីទេស នៅភូមិពោធិ៍តូច ឃុំកំពង់ហ្លួង ហាក់ថយចំនួនក្រុមគ្រួសារប្រកបអាជីពទៅហើយ តែរាល់បណ្តុំស្នាដៃនៃចម្លាក់ នៅតែអាចរក្សាបានគុណភាព និងទឹកដៃដ៏ប្រណីតរបស់ខ្លួន៣ជំនាន់មកហើយ ៕ (កែសម្រួលដោយ ៖ បុប្ផា)
ចែករំលែកព័តមាននេះ