ខេត្តកំពង់ធំ ៖ ក្មេងស្រី២នាក់បងប្អូនបង្កើតទៅឃ្វាលគោជាមួយឪពុក រួចបានចុះងូតទឹកស្ទឹង បណ្តាលឱ្យលង់បាត់បង់ជីវិតទាំងពីរនាក់ បង្កការភ្ញាក់ផ្អើលកើតឡើងកាលពីវេលាម៉ោង១០និង៣០នាទីព្រឹកថ្ងៃទី២៧ ខែឧសភា ឆ្នាំ២០២០ នៅភូមិទួលចាន់ ឃុំតាំងក្រសាំង…
ខេត្តកំពង់ធំ ៖ ក្មេងស្រី២នាក់បងប្អូនបង្កើតទៅឃ្វាលគោជាមួយឪពុក រួចបានចុះងូតទឹកស្ទឹង បណ្តាលឱ្យលង់បាត់បង់ជីវិតទាំងពីរនាក់ បង្កការភ្ញាក់ផ្អើលកើតឡើងកាលពីវេលាម៉ោង១០និង៣០នាទីព្រឹកថ្ងៃទី២៧ ខែឧសភា ឆ្នាំ២០២០ នៅភូមិទួលចាន់ ឃុំតាំងក្រសាំង ស្រុកសន្ទុក ខេត្តកំពង់ធំ ។
ក្មេងរងគ្រោះទាំង២នាក់ខាងលើ ក្នុងនោះម្នាក់ឈ្មោះ ឈ្មោះ ម៉ៅ ស្រីម៉ាស ភេទស្រី អាយុ១៤ឆ្នាំ និងម្នាក់ទៀតឈ្មោះ ម៉ៅ ស្រីកា ភេទស្រី អាយុ១៣ឆ្នាំ ។ ក្មេងស្រីរងគ្រោះទាំង២នាក់ជាបងប្អូនបង្កើតនឹងគ្នា រស់នៅក្នុងភូមិឃុំកើតហេតុខាងលើ ។
បើយោងតាមការបំភ្លឺពីឪពុករបស់ក្មេងស្រីរងគ្រោះបានបញ្ជាក់ថា នៅព្រឹកថ្ងៃកើតហេតុ កូនស្រីរបស់គាត់ទាំងពីរនាក់ បានទៅឃ្វាលគោជាមួយគាត់ ហើយពួកនាងបានដេញគោអោយសីុស្មៅនៅម្ដុំបឹងពពេល រហូតដល់វេលាម៉ោងកើតហេតុខាងលើ ស្រាប់តែឃើញឈ្មោះ ណុល នេត បានរត់មប្រាប់គាត់ថា «ពូៗ កូនពូឯងបានលង់ទឹក» ។
តាមប្រភពដដែលបានបន្តថា នៅពេលឮគេប្រាប់ដូច្នេះ គាត់ក៏បាននាំឈ្មោះ ចេន ទឹម ភេទប្រុស និងមានមនុស្សជាច្រើនទៀត បានជិះម៉ូតូទៅដល់កន្លែងកើតហេតុ បន្ទាប់មកគាត់ជាឪពុកក៏បានចុះមុជទឹករាវរកកូនទាំងពីរនាក់ ពេលនោះគាត់ក៏បានស្រែកហៅគេអោយជួយចុះទឹករាវរកបានប្រហែល១០នាទីក្រោយមក ក៏ប្រទះឃើញកូនស្រីម្នាក់ឈ្មោះម៉ៅ ស្រីកា ហើយក៏បានយកមកដាក់នៅលើគោក បន្ទាប់មកក៏ចុះរាវរកកូនស្រីឈ្មោះម៉ៅ ស្រីមាស បន្តទៀត លុះបានប្រហែល៥នាទីក្រោយ ក៏បានប្រទះឃើញនៅចំងាយពីគ្នាប្រហែល១៥ម៉ែត្រ នៅចំណុចទឹកមានជំរៅប្រហែលជា៣ម៉ែត្រ ។
តាមប្រភពដដែលបានបន្តទៀតថា ពេលរកឃើញកូនទាំងពីរនាក់រួចហើយ ក៏បាននាំគ្នាធ្វើចលនារលាក់ចុះឡើងៗ តែពួកនាងនៅតែមិនដឹងខ្លួន ក៏នាំគ្នាដឹកតាមម៉ូតូយកទៅមណ្ឌលសុខភាពទាំងពីនាក់តែម្ដង រហូតដល់១១ព្រឹកថ្ងៃដដែល គ្រូពេទ្យបានដាក់ខ្យល់អុកសីុសែនឱ្យពួកនាងទាំងពីរនាក់ លុះបានប្រហែល២០នាទីក្រោយមក គ្រូពេទ្យបានប្រាប់គាត់ថា «គ្មានសង្ឃឹមទេ ពួកនាងបាត់បង់ជីវិតបាត់ទៅហើយ» ។ គ្រាន់តែឮគ្រូពេទ្យប្រាប់បែបនេះភ្លាម ធ្វើឲ្យពួកគាត់ជាឪពុកម្តាយស្ទើរគាំបេះដូងស្លាប់ទៅតាមកូនទៅហើយ ។ បន្ទាប់មកពួកគាត់ជាឪពុកម្តាយ និងសាច់ញាតិ ក៏ដឹកសពកូនស្រីទាំងពីរនាក់តាមរថយន្តមន្ទីរពេទ្យមណ្ឌលសុខភាពតាំងក្រសាំង ដើម្បីយកទៅធ្វើបុណ្យតាមប្រពៃណី ។
ក្រោយពេលទទួលបានព័ត៌មានខាងលើភ្លាម កម្លាំងជំនាញបានសហការជាមួយប៉ុស្តិ៍រដ្ឋបាល និងក្រុមប្រឹក្សាឃុំមេភូមិ ចុះទៅដល់ទីកន្លែងកើតហេតុដើម្បីពិនិត្យកន្លែងកើតហេតុ និងក្មេងស្រីរងគ្រោះ ជាលទ្ធផលរកឃើញថា នៅលើដងខ្លួនក្មេងស្រីរងគ្រោះទាំង២នាក់ពុំមានស្លាកស្នាមអ្វីគួរឲ្យកត់សម្គាល់ឡើយ ក្រោយពិនិត្យរួចរាល់ ក៏បានធ្វើកំណត់ហេតុប្រគល់សពជូនក្រុមគ្រួសារដើម្បីយកទៅធ្វើបុណ្យតាមប្រពៃណី៕ (កែសម្រួលដោយ ៖ ធីតា)
ចែករំលែកព័តមាននេះ