រាជធានីភ្នំពេញ ៖ ជនសង្ស័យ៣នាក់ ក្នុងចំណោមគ្នាជាង១០នាក់ ត្រូវបានកម្លាំងនគរបាលខណ្ឌមានជ័យ សហការជាមួយនគរបាលស្ទឹងមានជ័យទី២ ធ្វើការបង្ក្រាបបានជាក់ស្តែងភ្លាមៗ ខណៈនាំគ្នាពពាក់ពពូនចែកចាយ និងប្រើប្រាស់ថ្នាំញៀននៅចំណុចដីឡូតិ៍ចំការពុទ្រា ស្ថិតក្នុងភូមិឬស្សី៣ សង្កាត់ស្ទឹងមានជ័យទី២ ខណ្ឌមានជ័យ កាលពីវេលាម៉ោង៣និង៤៥នាទីរសៀលថ្ងៃទី២៦ ខែឧសភា ឆ្នាំ២០២០ ចំណែកបក្ខពួកជាច្រើននាក់ផ្សេងទៀតបានរត់គេចខ្លួនបាត់ ។
ជនសង្ស័យទាំង៣នាក់រួមមាន ១-ឈ្មោះកុក វណ្ណា ភេទប្រុស អាយុ៣៧ឆ្នាំ ស្នាក់នៅផ្ទះជួល ក្នុងភូមិដីថ្មី សង្កាត់ស្ទឹងមានជ័យទី៣, ២-ឈ្មេាះ ជា វ៉ាន់ថេង ភេទប្រុស និង៣-ឈ្មេាះ សូ តុលា ភេទប្រុស អាយុ៣៦ឆ្នាំ ។ ជនសង្ស័យទាំង២នាក់ មុខរបរ និងទីលំនៅមិនពិតប្រាកដ ។
តាមប្រភពពីមន្ត្រីសមត្ថកិច្ចបានអោយដឹងថា ដោយទទួលបានសេចក្តីរាយការណ៍ពីសំណាក់ប្រជាពលរដ្ឋ ថា តែងមានក្រុមបងធំបងតូចពពាក់ពូនគ្នាចែកចាយ និងប្រើប្រាស់ថ្នាំញៀនជាញឹកញាប់ នៅចំណុចខាងលើរួចមក ទើបកម្លាំងនគរបាលខណ្ឌ ដោយមានបញ្ជាពីលោកអធិការនគរបាលខណ្ឌ បានសហការជាមួយនគរបាលប៉ុស្តិ៍ បានចុះដល់ចំណុចទីតាំងខាងលើ ដើម្បីបង្ក្រាបជាក់ស្តែង ខណៈពេលចុះបង្ក្រាបនោះ គឺឃើញមានជនសង្ស័យជាង១០នាក់ ប៉ុន្តែសមត្ថកិច្ចដេញចាប់ឃាត់បានតែ៣នាក់ប៉ុណ្ណោះ ចំណែកអ្នកផ្សេងៗទៀតបាននាំគ្នារត់គេចបាត់ស្រមោល ។
តាមប្រភពពីនាយប៉ុស្តិ៍នគរបាលស្ទឹងមានជ័យទី២ លោកណេង សាមឿន បានឱ្យដឹងថា ក្រោយការឃាត់ខ្លួន ជនសង្ស័យទាំង៣នាក់ត្រូវបញ្ចូនទៅកាន់ប៉ុស្តិ៍មូលដ្ឋានដើម្បីសាកសួរ ហើយក្រោយធ្វើការសាកសួរយ៉ាងល្អិតល្អន់រួចមក រកឃើញថា មានតែជនសង្ស័យម្នាក់ណ្ណោះដែលជាប់ពាក់ព័ន្ធនឹងការជួញដូរថ្នាំញៀន ព្រេាះអំឡុងពេលដែលសមត្ថកិច្ចចុះបង្ក្រាប គឺដកហូតបានថ្នាំញៀននៅលើខ្លួនគេតែម្នាក់ប៉ុណ្ណោះ ខណៈ២នាក់ផ្សេងទៀតពំុមានថ្នាំញៀនឡើយ ។
លោកនាយប៉ុស្តិ៍បានបន្តថា ជនសង្ស័យចំនួន២នាក់ (ឈ្មេាះ ជា វ៉ាន់ថេង និង ឈ្មេាះសូ តុលា) គឺត្រូវបានធ្វើការអប់រំ និងអនុញ្ញាតអោយត្រឡប់ទៅវិញ បន្ទាប់ពីសមត្ថកិច្ចពិនិត្យរកមិនឃើញមានសារធាតុញៀនក្នុងខ្លួនរបស់ពួកគេ ។ ម្យ៉ាងវិញទៀត ក្នុងចំណោមពួកគេទាំង២នាក់ មានម្នាក់មានសតិពំុសូវគ្រប់ផងដែរ និងម្នាក់ទៀតគ្រាន់តែជាអ្នកដើរកាត់ទីនោះស្របពេលសមត្ថកិច្ចកំពុងបើកការបង្ក្រាបតែប៉ុណ្ណោះ ។
ក្នុងការចុះបង្ក្រាបករណីខាងលើនេះ សមត្ថកិច្ចដកហូតបានថ្នាំញៀនប្រភេទម្សៅក្រាមសថ្លា១៦កញ្ចប់ , ដាវ២ដើម, ដែកកេស២ដើមផងដែរ ។ បច្ចុប្បន្នជនសង្ស័យត្រូវឃំុខ្លួនបណ្ណោះអាសន្ននៅប៉ុស្តិ៍រដ្ឋបាលនគរបាលស្ទឹងមានជ័យទី២ រង់ចាំកសាងសំណំុរឿងចាត់ការទៅតាមនីតិវិធីច្បាប់នៅពេលក្រោយ ៕ (កែសម្រួលដោយ ៖ ធីតា)
ចែករំលែកព័តមាននេះ