សាធារណរដ្ឋហៃទី ៖ ប្រធានសហព័ន្ធបាល់ទាត់ហៃទីលោក Yves Jean-Bart ត្រូវបានបញ្ឈប់ពីមុខតំណែងបណ្តោះអាសន្នរយៈពេល៩០ថ្ងៃ បន្ទាប់សហព័ន្ធបាល់ទាត់ពិភពលោក FIFA បានចាត់វិធាន ក្រោយមានការចោទប្រកាន់ពីបទ បង្ខំកីឡាការិនីបាល់ទាត់វ័យជំទង់មួយចំនួនឱ្យរួមភេទជាមួយលោក ។
FIFA បានសម្រេចព្យួរការងារលោក Yves Jean-Bart ជាបណ្តោះអាសន្ន ដើម្បីរង់ចាំការស៊ើបអង្កេតលើបទចោទប្រកាន់ជុំវិញប្រធានសហព័ន្ធវ័យ៧៣ឆ្នាំរូបនេះ បានគំរាមលើកីឡាការិនីបាល់ទាត់ជំទង់មួយចំនួន ឱ្យរួមភេទជាមួយលោក នៅឯមជ្ឈមណ្ឌលហ្វឹកហាត់ជាតិ Croix-des-Bouquets ។
លោក Yves Jean-Bart ដែលត្រូវបានគេស្គាល់ថា «Dadou» បានបដិសេធយ៉ាងដាច់អហង្ការ ចំពោះការចោទប្រកាន់ខាងលើ។ រឿងហេតុដែលត្រូវបានចោទប្រកាន់ ត្រូវបានគេយល់ថាបានកើតឡើងកាលពី៥ឆ្នាំមុន ។
សូមរំលឹកថា រឿងរ៉ាវនេះ ត្រូវបានកាសែត The Guardian រាយការណ៍ជាលើកដំបូងកាលពីខែមុន។ ចាប់តាំងពីពេលនោះមក បុគ្គលិកជាច្រើន នៅសហព័ន្ធបាល់ទាត់ហៃទី ត្រូវបានចៅក្រមកោះហៅ ដើម្បីធ្វើការសាកសួរ ។
សូមបញ្ជាក់ថា នេះមិនមែនជាលើកទីមួយទេ ដែលមន្ត្រីជាន់ខ្ពស់របស់ FIFA បានជួបពាក់ព័ន្ធនឹងរឿងអាស្រូវរំលោភផ្លូវភេទ។ ដោយកាលពីខែមិថុនាឆ្នាំ ២០១៩ អតីតប្រធានសហព័ន្ធកីឡាបាល់ទាត់អាហ្វហ្គានីស្ថាន គឺលោក Keramuudin Karim ត្រូវបានជាប់បម្រាមមួយជីវិត បន្ទាប់ពីមានការចោទប្រកាន់ថាលោកបានរំលោភបំពានផ្លូវភេទ លើកីឡាករនៅក្នុងក្រុមជម្រើសជាតិនារី ៕ (ដកស្រង់ចេញពី theguardian)
ចែករំលែកព័តមាននេះ