ប្រទេសកូរ៉េខាងត្បូង ៖ តាមប្រភពព័ត៌មាន CNN បានឱ្យដឹងថា អាជ្ញាធរផ្នែកអប់រំរបស់ប្រទេសកូរ៉េខាងត្បូង បាននិយាយថា សាលារៀនជិត២០០កន្លែង នៅក្នុងរដ្ឋធានីសេអ៊ូលខាងត្បូង និងខេត្តហ្គីងសាងខាងជើង របស់ប្រទេសនេះ នឹងពន្យារពេលបើកសាលារៀនឡើងវិញ ដែលវាខុសនឹងការគ្រោងទុកថា នឹងចាប់បើកវិញនៅថ្ងៃពុធនេះ។
ការិយាល័យអប់រំក្រុងសេអ៊ូល បាននិយាយថា សាលាបឋមសិក្សាចំនួន៧ និងសាលាមត្តេយ្យចំនួន៥ ត្រូវលើកកាលបរិច្ឆេទចាប់ផ្តើមបើកឡើងវិញ ដោយសារតែសិស្សអាយុ៦ឆ្នាំម្នាក់ ត្រូវបានគេធ្វើតេស្តរកឃើញថា មានផ្ទុកជំងឺកូវីដ១៩។ សាលារៀនដែលរងផលប៉ះពាល់ភាគច្រើនផ្សេងទៀត នឹងបើកនៅថ្ងៃទី១ ខែមិថុនា ខាងមុខនេះ។
ការិយាល័យអប់រំនៅខេត្តហ្គីងសាងខាងជើង បានប្រកាសថា សាលារៀនចំនួន ១៨២កន្លែង រួមទាំងសាលាមត្ដេយ្យ សាលាបឋម និងអនុវិទ្យាល័យ នៅក្នុងខេត្តនេះ ក៏នឹងបើកផងដែរ នៅថ្ងៃទី១ ខែមិថុនា ពីព្រោះគ្រូសាលាមត្តេយ្យម្នាក់ បានធ្វើតេស្តរកឃើញកូវីដ១៩ នៅកាលពីថ្ងៃច័ន្ទ។
គួរបញ្ជាក់ផងដែរថា បច្ចុប្បន្ននេះ ប្រទេសកូរ៉េខាងត្បូង មានករណីកូវីដសរុប ១១,២៦៥ករណី ករណីរកឃើញថ្មី ៤០ករណី ករណីបាត់បង់ជីវិតសរុប ២៦៩ករណី និង ករណីជាសះស្បើយសរុប ១០,២៩៥ករណី៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ